কেন্দ্ৰীয় চৰকাৰে ভাৰতত বাংলাদেশী নাগৰিকৰ অবৈধ বসবাসৰ বিষয়ে সতৰ্কতা জাৰি কৰিছে। ৰাজ্য তথা কেন্দ্ৰীয় শাসিত অঞ্চলসমূহৰ আৰক্ষী সঞ্চালক প্ৰধানক পশ্চিম বংগৰ বাংলাদেশ সীমান্তৰে দেশখনত প্ৰৱেশ কৰা আৰু সমগ্ৰ দেশজুৰি বসতি স্থাপন কৰা অবৈধ অনুপ্ৰৱেশকাৰীসকলৰ ওপৰত উপযুক্ত ব্যৱস্থা ল’বলৈ কোৱা হৈছে। আৰক্ষী সূত্ৰৰ উদ্ধৃতিৰে এই বাতৰি প্ৰকাশ কৰিছে দ্য হিন্দুৱে।
বিদেশী নাগৰিকসকলক ভুৱা ঠিকনা, পৰিচয় আদিৰ সহায়ত মূল নথিপত্ৰ প্ৰাপ্ত কৰাত সহায় কৰি প্ৰৱেশৰ সুবিধা কৰি দিয়া পশ্চিম বংগৰ স্থানীয় লোক আৰু এজেণ্টৰ এক সু-সম্পৰ্কিত নেটৱৰ্কৰ বিষয়ে নিৰাপত্তা সংস্থাসমূহক অৱগত কৰা হৈছিল।
লগতে পঢ়ক: সাজু জুকাৰবাৰ্গ! টুইটাৰৰ পিছত এইবাৰ বৃহৎ সংখ্যক কৰ্মচাৰীক ছাঁটাই কৰিব মেটাই!
প্ৰথমতে আধাৰ কাৰ্ড প্ৰাপ্ত কৰা অবৈধ অনুপ্ৰৱেশকাৰীসকলে কাম বিচাৰি দেশৰ বিভিন্ন প্ৰান্তলৈ স্থানান্তৰিত হৈছিল আৰু তাত বসতি স্থাপন কৰিছিল। সূত্ৰটোৱে কয় যে কিছুমানে ঠিকনা বা পৰিচয়ৰ আন প্ৰমাণ যেনে বেংক পাছবুক, ভোটাৰ পৰিচয় পত্ৰ আৰু পেন কাৰ্ড লাভ কৰিবলৈও সক্ষম হৈছিল।
এজন জ্যেষ্ঠ আৰক্ষী বিষয়াৰ উদ্ধৃতি দি দ্য হিন্দুত কোৱা হৈছে, “এই নথিপত্ৰবোৰে তেওঁলোকক এটা নিৰ্দিষ্ট ঠিকনাত এটা ভুৱা পৰিচয় প্ৰতিষ্ঠা কৰাত আৰু নিযুক্তি লাভত সহায় কৰে। বহুতে বিদেশ ভ্ৰমণৰ বাবে পাছপোৰ্ট পাবলৈ সেইবোৰ ব্যৱহাৰ কৰি আছে। যিহেতু পাছপোৰ্টকে ধৰি নথিপত্ৰসমূহ সংশ্লিষ্ট উপযুক্ত কৰ্তৃপক্ষই জাৰী কৰে, সেয়ে অভিযুক্ত ব্যক্তিসকলে সন্দেহ বা ধৰা নপৰাকৈ ভ্ৰমণ কৰে।”
লগতে পঢ়ক: বাংলাদেশৰ গাঁৱত বিহু, বাগৰুম্বা পৰিৱেশন কৰিব অসমৰ সাংস্কৃতিক দলে
কেন্দ্ৰৰ সতৰ্কবাণীত কোৱা হৈছে যে পশ্চিম বংগৰ কিছুমান স্থানীয় লোকে মাচুলৰ বিনিময়ত প্ৰৱঞ্চনাৰে ভাৰতীয় পৰিচয় নথিপত্ৰ, বিশেষকৈ আধাৰ কাৰ্ড প্ৰদানত সহায় কৰি দিয়াৰ এজেণ্ট হিচাপে কাম কৰি আছে।
ভাৰতীয় নাগৰিক হিচাপে আত্মপ্ৰকাশ কৰা বিদেশীসকলে সমগ্ৰ ভাৰতত বিভিন্ন উদ্দেশ্যৰ বাবে নথিপত্ৰসমূহ ব্যৱহাৰ কৰি আছে। বিষয়াজনে সতৰ্ক বাৰ্তাৰ উদ্ধৃতি দি লগতে কয় যে অভিযুক্ত বিদেশী নাগৰিকসকল তামিলনাডু, কেৰালা আৰু কৰ্ণাটককে ধৰি কেইবাখনো ৰাজ্যত বসতি স্থাপন কৰিছে।
লগতে পঢ়ক: ঝাৰখণ্ডত বৃহৎ পৰিমাণৰ বিস্ফোৰক সামগ্ৰী উদ্ধাৰ: আৰক্ষীয়ে ধ্বংস কৰিলে মাওবাদী নিৰ্মিত সুৰংগ
কেন্দ্ৰীয় চৰকাৰে এই সতৰ্কবাণী জাৰি কৰাৰ কেইদিনমান পিছতে গৃহ মন্ত্ৰালয়ে গুজৰাটৰ মেহছানা আৰু আনন্দ অঞ্চলৰ জিলা উপায়ুক্তসকলক পাকিস্তান, আফগানিস্তান আৰু বাংলাদেশৰ পৰা অহা হিন্দু, শিখ, পাৰ্চী, খ্ৰীষ্টান, বৌদ্ধ আৰু জৈন সম্প্ৰদায়ৰ সদস্যক নাগৰিকত্বৰ প্ৰমাণপত্ৰ দিয়াৰ ক্ষমতা প্ৰদান কৰে।
