উৎসৱৰ বতৰত চৰকাৰী কৰ্মচাৰীসকললৈ অগ্ৰিম ভাট্টাৰ কথা ঘোষণা কৰিছে কেন্দ্ৰীয় বিত্ত মন্ত্ৰী নিৰ্মলা সীতাৰমণে।
এই ঘোষণা অনুসৰি সকলো কেন্দ্ৰীয় চৰকাৰৰ কৰ্মচাৰীলৈ এককালীন ১০,০০০টকা আগবঢ়োৱা হ’ব।
সোমবাৰে এখন সংবাদমেলত কেন্দ্ৰীয় বিত্তমন্ত্ৰীগৰাকীয়ে জনায় যে সপ্তম দৰমহা আয়োগৰ পৰামৰ্শৰ ভিত্তিত অগ্ৰিম উৎসৱ ভাট্টাৰ দৰে সকলো ভাট্টা উঠাই দিয়া হৈছিল।
কিন্তু কৰ’না মহামাৰীৰ ফলত বিধ্বস্ত হৈ পৰা অৰ্থনীতিত ক্ৰেতাৰ চাহিদা বৃদ্ধিৰ বাবে এইবাৰ অগ্ৰিম ভাট্টা আগবঢ়োৱা হৈছে। অৱশ্যে, এই অগ্ৰিম ধন এবাৰহে লাভ কৰিব।
অগ্ৰিম ভাট্টাৰ গুৰুত্বপূৰ্ণ বিষয়সমূহ হ’লঃ
ক) ১০,০০০টকা দিয়া হ’ব আৰু ইয়াত কোনো সুত দিব নালাগে। সৰ্বাধিক ১০টা কিস্তিত এই ধন তুলিব পাৰিব।
খ) প্ৰিপেইড ৰুপে কাৰ্ড হিচাপে এই ধন দিয়া হ’ব। কিন্তু এই কাৰ্ডৰ জৰিয়তে এটিএমৰ পৰা টকা উলিয়াব পৰা নাযাব।
গ) অহা বছৰ ৩১মাৰ্চৰ ভিতৰত কেন্দ্ৰীয় চৰকাৰৰ কৰ্মচাৰীসকলে এই ধন খৰচৰ সুযোগ পাব। তদুপৰি, ২০২১চনৰ ৩১মাৰ্চৰ ভিতৰত যিকোনো উৎসৱৰ বাবে কৰ্মচাৰীসকলে খৰচ কৰিবলৈ এই সুবিধা লাভ কৰিব।
ঘ) গেজেটেড আৰু নন গেজেটেড সকলো চৰকাৰী কৰ্মচাৰীকে এই অগ্ৰিম ভাট্টা দিয়া হ’ব।
ঙ) এইক্ষেত্ৰত বেংকৰ চাৰ্জো কেন্দ্ৰই বহন কৰিব।
