Guwahati: পি পি ই কিট কেলেংকাৰীৰ চিবিআইৰ তদন্ত বিচাৰি চিলাপথাৰত ছাত্ৰ মুক্তিৰ প্ৰতিবাদ ।
ৰাজপথত মুখ্যমন্ত্ৰীৰ প্ৰতিকৃতি দাহ কৰি প্ৰতিবাদ সাব্যস্ত কৰে ছাত্ৰ মুক্তি সংগ্ৰাম সমিতিয়ে ।
পিপিই কীট কেলেংকাৰীৰ তদন্তৰ দাবীৰ লগতে মুখ্যমন্ত্ৰীৰ পদত্যাগৰ দাবী তোলে প্ৰতিবাদকাৰীসকলে ।
ৰাজ্যত শেহতীয়াকৈ পোহৰলৈ অহা পিপিই কীট কেলেংকাৰীৰ প্ৰতিবাদত আজি ছাত্ৰ মুক্তি সংগ্ৰাম সমিতিয়ে প্ৰতিবাদেৰে উত্তাল কৰি তোলে চিলাপথাৰ নগৰ। প্ৰচণ্ড বৰষুণকো নেওচি প্ৰতিবাদকাৰী সকলে মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে বিভিন্ন শ্লোগান দি চিলাপথাৰ-লিকাবালি সংযোগী ৰাজপথৰ ওপৰত মুখ্যমন্ত্ৰী গৰাকীৰ পুত্তলিকা দাহ কৰে ।
প্ৰতিবাদত অংশগ্ৰহণ কৰি ছাত্ৰ মুক্তি সংগ্ৰাম সমিতিৰ কেন্দ্ৰীয় সহকাৰী সাধাৰণ সম্পাদক ৰুদ্ৰ ভূঞাই কয় “ক’ৰণা সাহায্যৰ নামত ৰাইজৰ গাঁঠিৰ ধন সংগ্ৰহ কৰি সেই ধনেৰে পত্নীপ্ৰেম দেখুওৱা মুখ্যমন্ত্ৰী হিমন্ত বিশ্ব শৰ্মাৰ পদত্যাগৰ দাবী জনাইছো । লগতে সমগ্ৰ ঘটনাটো চিবিআইৰ দ্বাৰা নিৰপেক্ষ তদন্তৰো দাবী জনাইছো।“
প্ৰতিবাদকাৰীসকলে বিজেপি চৰকাৰ কাম নাই , হিমন্ত বিশ্বৰ কাম নাই আদি চৰকাৰ বিৰোধী শ্লোগানৰে কঁপাই তোলে চিলাপথাৰৰ আকাশ- বতাহ ।
