যেন হেৰাই গ’ল মাতৃত্বৰ সংজ্ঞা। পৃথিৱীৰ আটাইতকৈ নিৰাপদ মাতৃৰ আশ্ৰয়ো হৈ পৰিল জীৱনৰ নিষ্ঠুৰ সময়ৰ সাক্ষী। নিজৰ কন্যাৰ জীৱনৰ সৰ্বনাশ কৰা ঘটনাৰ কাৰণ হৈ পৰিল চেন্নাইৰ এগৰাকী মাতৃ।
নিজৰ কন্যাক ধৰ্ষণ কৰাত প্ৰেমিকক সহায় কৰা এই মহিলাগৰাকীৰ বাবেই গৰ্ভৱতী হ’বলগীয়া হয় ১৫বছৰীয়া নাবালিকাগৰাকী।
বৰ্তমান চৰকাৰী ‘হোম’ত এটি সন্তানৰ জন্মও দিছে নাবালিকাগৰাকীয়ে। এই ঘটনাত আৰক্ষীয়ে দুজন লোকক গ্ৰেপ্তাৰ কৰিছে।
ঘটনা অনুসৰি, অভিযুক্ত মহিলাগৰাকীৰ কেইবছৰমান পূৰ্বে বিবাহ বিচ্ছেদ ঘটিছিল। ইয়াৰ পাছতে শেখৰ নামৰ এজন ৰং মিস্ত্ৰীৰ সৈতে মহিলাগৰাকী প্ৰেমৰ সম্পৰ্কত জড়িত হৈ পৰে।
ইয়াৰ মাজতে মহিলাগৰাকীৰ সৈতে দেখা কৰিবলৈ অহা সেই প্ৰেমিকে মহিলাগৰাকীৰ ১৫ বছৰীয়া কন্যাকো যৌন নিৰ্যাতন কৰিবলৈ লয়।
মাকক কথাটো জনায় যদিও মহিলাগৰাকীয়ে কন্যাক সুৰক্ষা দিয়াৰ পৰিৱৰ্তে সেয়া মানি ল’বলৈহে কয়। তাৰ পাছত ব্যক্তিগৰাকীৰ নিৰ্যাতন বৃদ্ধি পাই গৈ থাকে আৰু তাৰ মাজতে নাবালিকাগৰাকী গৰ্ভৱতী হৈ পৰে।
কথাটো জানিব পাৰি অভিযুক্ত মহিলাগৰাকীয়ে কন্যাক তেওঁৰ ভায়েকৰ ঘৰত থৈ আহে যদিও তাই গৰ্ভৱতী হোৱাৰ কথা জানিব দিয়া নাছিল।
পাছত নাবালিকাগৰাকীয়ে মোমায়েকক সকলো ঘটনা বিবৰি কয়। মোমায়েকে ইয়াৰ পাছত ভনীয়েকৰ সৈতে কথা পতাৰ চেষ্টা কৰে যদিও যোগাযোগ কৰিব নোৱাৰি অৱশেষত আৰক্ষীৰ কাষ চাপে।
আৰক্ষীয়ে লগে লগে কাৰ্যব্যৱস্থা গ্ৰহণ কৰি পস্কো আইনত দুয়োজনৰ নামত গোচৰ তৰে। অভিযুক্ত দুয়োজনক গ্ৰেপ্তাৰো কৰা হয়।
ইপিনে, নাবালিকাগৰাকীক এখন ‘নাৰীগৃহ’লৈ প্ৰেৰণ কৰা হয়। তাত এটি সন্তানৰো জন্ম দিয়ে। ঘটনাতো পোহৰলৈ অহাৰ পাছতে মাতৃগৰাকীৰ নিন্দাত মুখৰ হৈ পৰিছে বহুতেই। দোষীৰ উপযুক্ত শাস্তিক দাবী তুলিছে।
চৰিত্ৰহীন প্ৰেমিকৰ লগতে এগৰাকী মাতৃৰ এনে গৰ্হিত কাৰ্যক সকলোৱে একমুখে ধ্বিকাৰ দিছে।
