২০৫০ চনৰ ভিতৰত অসমত চিকিৎসালয়ৰ সংখ্যা আধালৈ হ্রাস কৰাৰ আহ্বান জনাইছে মুখ্য মন্ত্ৰী সৰ্বানন্দ সোণোৱালে।
শিক্ষক দিৱসৰ দিনা বৃহস্পতিবাৰে অসমৰ শিক্ষক সমাজৰ লগতে ৰাইজলৈ এই আহ্বান মুখ্য মন্ত্ৰী গৰাকীৰ।
বৃহস্পতিবাৰে সমগ্ৰ অসমৰ লগতে শ্ৰীমন্ত শংকৰদেৱ আন্তৰ্জাতিক প্ৰেক্ষাগৃহতো ৰাজ্যিক ভিত্তিত ৫৮তম শিক্ষক দিৱস পালন কৰা হয়।
অনুষ্ঠানত মুখ্য মন্ত্ৰী সৰ্বানন্দ সোণোৱাল, শিক্ষা মন্ত্ৰী সিদ্ধাৰ্থ ভট্ৰাচাৰ্য আৰু আন বহুতো বিশিষ্ট অতিথিৰ লগতে উপস্থিত থাকে কৃতি শিক্ষাবিদ সকল।
গুৰুবন্দনাৰে আৰম্ভ কৰা অনুষ্ঠানত অসমৰ বিভিন্ন অঞ্চলৰ ৩৬ গৰাকী কৃতি শিক্ষকক সম্বৰ্ধনা জনোৱা হয়।
অনুষ্ঠানৰ মাজতে মুখ্য মন্ত্ৰীয়ে ভাষণ প্ৰসংগত প্ৰধানমন্ত্ৰী মোডীয়ে আৰম্ভ কৰা ফিট ইণ্ডিয়াৰ কথা উল্লেখ কৰি কয়, ‘’আমি যদি প্ৰধানমন্ত্ৰী ডাঙৰীয়াই আৰম্ভ কৰা ফিট ইণ্ডিয়া আৰু যোগ চৰ্চা আদি বিষয়বোৰ গুৰুত্ব সহকাৰে লৈ নিষ্ঠাৰে পালন কৰো তেন্তে আমি চিকিৎসালয় যোৱাৰ প্ৰয়োজন নাই।‘’
তেওঁ কয়, ‘’মানুহ বেমাৰী হোৱাৰ ফলত আজি চিকিৎসালয়ৰ সংখ্যা বাঢ়িছে। আমি যদি সংকল্প লৈ সদায় যোগ চৰ্চা কৰিবলৈ আৰম্ভ কৰো তেন্তে চিকিৎসালয় নোহোৱা হ’ব। সেয়েহে আমি থিৰাং কৰিব লাগে ২০৫০ চনৰ ভিতৰত যেন অসমৰ চিকিৎসালয়ৰ সংখ্যা আজিৰ তুলনাত আধা হয়।‘’
তদুপৰি তেওঁ কয়, ‘’বৰ্তমানৰ যুগটো হৈছে প্ৰতিযোগিতাৰ যুগ। এতিয়া সকলো দিশ পৰীক্ষা-নিৰীক্ষা কৰি চলাৰ পৰিস্থিতি সৃষ্টি হৈছে। এই কথা আমি জানি উঠিব লাগিব আৰু শিক্ষক-শিক্ষয়ত্ৰী সকলে ছাত্ৰ-ছাত্ৰীক এই শিক্ষা প্ৰদান কৰিব লাগিব।‘’
