কেগৰ ভয়াৱহ বিত্তীয় সতৰ্কবাণীৰ পাছতো অসম চৰকাৰে পুনৰ বৃহৎ পৰিমাণৰ ঋণ ল‘বলৈ তৎপৰ হৈ উঠিছে। ৰাজ্যৰ বিত্তীয় ভৱিষ্যত বিপদাপন্ন কৰি চৰকাৰে অহা ১৬ ডিচেম্বৰত চৰকাৰী বণ্ড বন্ধকত দি পুনৰ ৯০০ কোটি টকাৰ ঋণ ল’ব।
ইতিমধ্যে বিত্ত বিভাগে ইয়াৰ বাবে ভাৰতীয় ৰিজাৰ্ভ বেংকৰ ওচৰত প্ৰস্তাৱ দাখিল কৰিছে। কেগৰ শেহতীয়া প্ৰতিবেদনত স্পষ্টকৈ কোৱা হৈছে যে মুখ্যমন্ত্ৰী হিমন্ত বিশ্ব শৰ্মাৰ অসম চৰকাৰৰ ঋণৰ পৰিমাণ বাৰ্ষিক গড়ে ২০.৬৭ শতাংশ হাৰত বৃদ্ধি পাইছে। ২০২৩-২৪ বৰ্ষৰ ৰাজ্যিক বিত্তৰ হিচাপ পৰীক্ষা কৰি বিধানসভাত দাখিল কৰা এই প্ৰতিবেদনৰ পৃষ্ঠাই পৃষ্ঠাই ঋণৰ ওপৰত নিৰ্ভৰশীলতা পৰিহাৰ কৰাৰ বাবে কঠোৰ পৰামৰ্শ দিয়া হৈছিল। কিন্তু ৰাজ্য চৰকাৰে এই সকলোবোৰ সতৰ্কবাণী উলাই কৰি পুনৰ ঋণৰ বোজা বৃদ্ধি কৰিবলৈ লৈছে।
বিত্ত মন্ত্ৰী অজন্তা নেওগে যোৱা ২৫ নৱেম্বৰত বিধানসভাত দাখিল কৰা তথ্য মতে, ২০২৪-২৫ বৰ্ষত অসম চৰকাৰৰ মুঠ ঋণৰ পৰিমাণ আছিল ১,৫৪,৩৩৩ কোটি টকা। চলিত ২০২৫-২৬ বৰ্ষত ঋণ সংগ্ৰহৰ লক্ষ্য আছে ৩৬,১৮৫ কোটি টকা। ইয়াৰ বিপৰীতে ইতিমধ্যে ২০ হেজাৰ কোটি টকাৰো অধিক ঋণ লোৱা হৈছে বুলি জানিব পৰা গৈছে। লক্ষণীয় যে, স্বৰাজোত্তৰ কালত মুখ্যমন্ত্ৰী হিমন্ত বিশ্ব শৰ্মা নেতৃত্বাধীন চৰকাৰখনেই হৈছে অসমৰ প্ৰথম চৰকাৰ, যিয়ে ২০২২-২৩ বৰ্ষৰ পৰা প্ৰতিটো বিত্তীয় বৰ্ষতে কুৰি হেজাৰ কোটি টকাৰ অধিক ঋণ লৈ আহিছে। যিয়ে অদূৰ ভৱিষ্যতৰ বাবে ৰাজ্যখনলৈ বিত্তীয় বিপদ কঢ়িয়াই আনিছে।
কেগৰ প্ৰতিবেদনে আন এক গুৰুত্বপূৰ্ণ তথ্য উন্মোচন কৰিছে যে চৰকাৰে বৰ্তমান বছৰি ঋণৰ সুত পৰিশোধৰ নামতেই প্ৰায় ৯,৪৬৭ কোটি টকা আদায় দিবলগীয়া হৈছে। আৰু এই সুত পৰিশোধৰ বাবেও ঋণৰ ধন ব্যয় কৰাৰ তথ্য পোহৰলৈ আহিছে। চলিত বৰ্ষৰ পৰা অহা দহ বছৰৰ ভিতৰত সুতসহ ১ লাখ ৫৯ হেজাৰ ২০৯ কোটি টকা বকেয়া ঋণ পৰিশোধ কৰাৰ প্ৰত্যাহ্বানে চৰকাৰৰ সন্মুখত থিয় দি আছে। এই সম্ভাব্য বোজাৰ পৰা তাৎক্ষণিকভাৱে উদ্ধাৰ পাবলৈ চৰকাৰে শেহতীয়াকৈ ঋণ পৰিশোধৰ ম্যাদ বৃদ্ধি কৰাৰ কৌশল গ্ৰহণ কৰিছে। পূৰ্বৰ পাঁচ-দহ বছৰৰ ঠাইত এতিয়া নতুনকৈ লোৱা ঋণৰ ম্যাদ ১৪ বছৰৰ পৰা ২০ বছৰলৈ বৃদ্ধি কৰা হৈছে। দিছপুৰৰ শীৰ্ষ সূত্ৰৰ তথ্যমতে, অহা ২০২৬ চনৰ ফেব্ৰুৱাৰী মাহৰ শেষৰ ফালে বিধানসভা নিৰ্বাচনৰ দিন-বাৰ ঘোষিত হোৱাৰ সম্ভাৱনাৰ প্ৰতি লক্ষ্য ৰাখি চৰকাৰে অহা ফেব্ৰুৱাৰীৰ আগভাগলৈকে কমেও ৩,০০০ কোটি টকাৰ নতুনকৈ ঋণ লোৱাৰ লক্ষ্য নিৰ্ধাৰণ কৰিছে।
নিৰ্বাচনী দিন-বাৰ ঘোষিত হোৱাৰ পূৰ্বে নগদ উপকৃত হোৱা হিতাধিকাৰী আঁচনিসমূহৰ জৰিয়তে ৰাইজৰ মন জয় কৰাৰ বাবে চৰকাৰে তৎপৰ হৈ উঠিছে। যোৱা ছেপ্টেম্বৰত ঋণ লোৱাৰ পাছত ৰাজ্যজুৰি সৃষ্টি হোৱা গণ জাগৰণৰ বাবে চৰকাৰে দুটা মাহ নতুনকৈ ঋণ লোৱাৰ পৰা বিৰত আছিল। কিন্তু শেহতীয়াকৈ এই আঁচনিসমূহ খৰতকীয়াভাৱে কাৰ্যকৰীকৰণৰ জৰিয়তে সমাগত নিৰ্বাচনৰ বাবে ভোটবেংক সবল কৰাৰ লক্ষ্যৰে পুনৰ ঋণ লোৱাৰ প্ৰক্ৰিয়া হাতত লৈছে। মুখ্যমন্ত্ৰীয়ে বি টি আৰতো ৰাজহুৱা অনুষ্ঠান পাতি অৰুণোদয় আঁচনি মুকলি কৰিছে। কেগে বিত্তীয় ঘাটি হ্ৰাস, নিজস্ব ৰাজহ বৃদ্ধি আৰু ৰাজহুৱা ঋণৰ বোজা এৰাই চলিবলৈ পৰামৰ্শ দিয়াৰ লগতে কুৰি বছৰৰ পিছত ৰাজ্যৰ ভৱিষ্যৎ প্ৰজন্মই কি কু-পৰিণাম ভোগ কৰিব লাগিব তাৰ আগতীয়া সতৰ্কবাণী দিয়াৰ পাছতো নিৰ্বাচনী ভোটবেংক সবল কৰাৰ লক্ষ্যৰে আগবঢ়া চৰকাৰখনে তালৈ কেৰেপ কৰা নাই।
