‘এখন প্ৰদূষণমুক্ত অসম গঢ়ি তোলাৰ বাবে ৰাজ্য চৰকাৰে অতি শীঘ্ৰে ৰাজ্যৰ প্ৰতিখন জিলাতে চি এন জি ফিলিং ষ্টেশ্যন মুকলি কৰিব।’ আজি ডিব্ৰুগড় জিলাৰ চৌকিডিঙ্গীত ৰাজ্যৰ প্ৰথমটো চি এন জি ফিলিং ষ্টেশ্যন মুকলি কৰি মুখ্য মন্ত্ৰী সৰ্বানন্দ সোণোৱালে এই মন্তব্য কৰে।
উল্লেখযোগ্য যে প্ৰদূষণমুক্ত অসম গঢ়াৰ দিশত এক ঐতিহাসিক পদক্ষেপ ৰূপে অসম গেছ কোম্পানী লিমিটেডে অসম ৰাজ্যিক পৰিবহণ নিগমৰ সহযোগত আজি ৰাজ্যৰ প্ৰথমটো চি এন জি ফিলিং ষ্টেশ্যন মুকলি কৰে।
আজি অনুষ্ঠিত সভাত মন্ত্ৰী চন্দ্ৰমোহন পাটোৱাৰীয়ে অতি শীঘ্ৰে গুৱাহাটীত পাইলত ভিত্তিত ১৫ খন চি এন জি বাছৰ সেৱা আৰম্ভ কৰা হ’ব বুলি উল্লেখ কৰে।
লগতে বৈদ্যুতিক বাহনৰ সেৱা আৰম্ভ কৰাৰ বাবে হাংগেৰীৰ এক প্ৰতিষ্ঠানৰ সৈতে বুজা-বুজিৰ চুক্তি স্বাক্ষৰ কৰাৰ দিশত প্ৰয়োজনীয় পদক্ষেপ গ্ৰহণ কৰা হৈছে বুলিও মন্ত্ৰী গৰাকীয়ে উল্লেখ কৰে।
