দ্বিতীয় পৰ্যায়ৰ পঞ্চায়ত নিৰ্বাচনৰ প্ৰচাৰ অভিযানৰ আজি সামৰণিৰ দিনা মুখ্য মন্ত্ৰী সৰ্বানন্দ সোণোৱালে নামনি অসমৰ বিভিন্ন ঠাইত নিৰ্বাচনী সভাত অংশ গ্ৰহণ কৰি বিজেপি দলৰ সমৰ্থনত নিৰ্বাচনী প্ৰচাৰ চলায়।
মুখ্য মন্ত্ৰী গৰাকীয়ে আজি প্ৰথমে বৰপেটাৰ বহৰি মিনি ষ্টেডিয়ামত অনুষ্ঠিত নিৰ্বাচনী সভাত অংশ গ্ৰহণ কৰি কংগ্ৰেছ, অগপ আৰু এ আই ইউ ডি এফ দলক সমালোচনা কৰে। লগতে মুখ্য মন্ত্ৰী গৰাকীয়ে পৰিৱৰ্তন আৰু সু-শাসন লাভ কৰাৰ স্বাৰ্থত গ্ৰাম্যাঞ্চলৰ ঐক্যবদ্ধ ৰাইজে বিজেপি দলৰ প্ৰাৰ্থীক জয়ী কৰিব বুলি আশা ব্যক্ত কৰে।
আজিৰ নিৰ্বাচনী সভাখনত অসম বিত্তীয় নিগমৰ অধ্যক্ষ, উপাধ্যক্ষ ক্ৰমে বিজয় গুপ্তা, অনিল দাস, অসম ঔদ্যোগিক নিগমৰ উপাধ্যক্ষ জিতু তালুকদাৰৰ লগতে কেইবাগৰাকীও বিজেপি নেতা উপস্থিত থাকে।
আনহাতে বহৰিৰ সভাৰ পিছতেই মুখ্য মন্ত্ৰী গৰাকীয়ে সৰভোগৰ নিৰ্বাচনী সভাত অংশ গ্ৰহণ কৰে বুলি জানিব পৰা গৈছে।
