মুখ্য মন্ত্ৰী সৰ্বানন্দ সোণোৱালে আজি গৃহ সমষ্টি মাজুলীৰ গড়মূৰস্থিত শ্ৰী শ্ৰী পিতাম্বৰদেৱ গোস্বামী মহকুমা অসামৰিক চিকিৎসালয় পৰিদৰ্শন কৰি হস্পাতালখনত থকা আছুতীয়া কক্ষকে ধৰি অন্যান্য সা-সুবিধাৰ বুজ লয়।
চিকিৎসালয়খন পৰিদৰ্শন কৰাৰ পাছতে মাজুলী জিলা উপায়ুক্ত কাৰ্য্যালয়ৰ সভা কক্ষত মুখ্য মন্ত্ৰীয়ে জিলাখনত কোভিদ-১৯ সংক্ৰমণ প্ৰতিৰোধ কৰাৰ বাবে জিলা প্ৰশাসনে লোৱা ব্যৱস্থাৱলীৰ পৰ্যালোচনা কৰে।
মুখ্য মন্ত্ৰীয়ে কৃষি বিভাগৰ বিষয়া-কৰ্মচাৰীসকলক সামাজিক দূৰত্ব বজাই ৰাখি কৃষকে যাতে কৃষি কাৰ্য্যত নিয়োজিত হ’ব পাৰে তাৰ বাবে গাঁৱে গাঁৱে, ঘৰে-ঘৰে গৈ কৃষক সকলক দিহা-পৰামৰ্শ আগবঢ়াবলৈও নিৰ্দেশ দিয়ে।
ল’কডাউনৰ সময়ছোৱাত যাতে জনসাধাৰণে অত্যাৱশ্যকীয় সা-সামগ্ৰী লাভ কৰাৰ ক্ষেত্ৰত কোনো ধৰণৰ অসুবিধাৰ সন্মুখিন নহয় সেইটো নিশ্চিত কৰাৰ বাবেও জিলা প্ৰশাসনক তেওঁ নিৰ্দেশ দিয়ে।
মুখ্য মন্ত্ৰীয়ে প্ৰতিটো বিভাগৰ ল’কডাউনৰ সময়ছোৱাত কৰা কাম-কাজ সমূহৰ বিতং পৰ্যালোচনা কৰে।
অহা ৩ মে’লৈকে লকডাউনৰ সময়ছোৱাত জনসাধাৰণে যাতে সামাজিক দূৰত্ব বজাই ৰাখে সেয়া নিশ্চিত কৰিবলৈও সোণোৱালে উপায়ুক্তক নিৰ্দেশ দিয়ে।
পৰ্যালোচনা বৈঠকত মন্ত্ৰী নৱ কুমাৰ দলে, বিধায়কদ্বয় ক্ৰমে প্ৰশান্ত ফুকন, বিমল বৰা, উপায়ুক্ত বিক্ৰম কৈৰী, আৰক্ষী অধীক্ষককে ধৰি শীৰ্ষ বিষয়া সকল উপস্থিত থাকে।
