আজি মুখ্য মন্ত্ৰী সৰ্বানন্দ সোণোৱালৰ পৌৰোহিত্যত জনতা ভৱনৰ মুখ্য মন্ত্ৰীৰ সভাকক্ষত দীপৰ বিল সংৰক্ষণ আৰু উন্নয়ন চ’ছাইটিৰ পৰিচালনা সমিতিৰ এখন বৈঠক অনু্ষ্ঠিত হয়।
জৈৱ-বৈচিত্ৰ্যৰে ভৰপূৰ দীপৰ বিলৰ সংৰক্ষণ আৰু উন্নয়নৰ বিভিন্ন দিশ সম্পৰ্কত বৈঠকত বিস্তৃতভাবে আলোচনা কৰা হয়।
বৈঠকত মুখ্য মন্ত্ৰীয়ে দীপৰ বিলৰ মাটি কালিৰ সাম্প্ৰতিক স্থিতি নিৰূপনৰ বাবে ব্যৱস্থা ল’বলৈ কামৰূপ মহানগৰ জিলাৰ উপায়ু্ক্ত আৰু আৰ্দ্ৰ ভূমি কৰ্তৃপক্ষক নিৰ্দেশ দিয়ে।
দীপৰ বিলৰ সৰু-বৰ প্ৰাকৃতিক জলধাৰা পুনৰ মুকলি কৰি এই বিলখনৰ প্ৰাকৃতিক অৱস্থা অটুত ৰখাৰ ওপৰতো বৈঠকত গুৰুত্ব আৰোপ কৰা হয়। এই সম্পৰ্কত মুখ্য মন্ত্ৰীয়ে ইয়াৰ বাবে গুৱাহাটী পৌৰ নিগম, গুৱাহাটী উন্নয়ন কৰ্তৃপক্ষ আৰু জলসম্পদ বিভাগক বিস্তৃত অধ্যয়ণ কৰি তিনিমাহৰ ভিতৰত প্ৰতিবেদন দাখিলৰ ব্যৱস্থা ল’বলৈ নিৰ্দেশ দিয়ে।
বৰগাঁৱত বৰ্তমানৰ আৱৰ্জনা নিষ্কাশন থ’লীৰ পৰা দীপৰ বিলৰ প্ৰদূষণ ৰোধ কৰাৰ বিষয়টো আজিৰ বৈঠকত গুৰুত্ব সহকাৰে আলোচনা কৰা হয়। মুখ্য মন্ত্ৰীয়ে আৱৰ্জনাৰ পৰা জৈৱিক সাৰ, বিকল্প শক্তিৰ লেখীয়া উৎপাদনমুখি কাম-কাজৰ সম্ভাৱনীয়তা সমূহ গুৰুত্ব সহকাৰে লৈ ২ মাহৰ ভিতৰত সংশ্লিষ্ট বিভাগক এই সম্পৰ্কত প্ৰতিবেদন দাখিলৰ বাবে নিৰ্দেশ দিয়ে।
দীপৰ বিলৰ জলধাৰৰ মূল উৎসৰ লগতে ইয়াৰ বৰ্হিগমণ পথ সমূহৰ ওপৰত বিজ্ঞান সন্মত অধ্যয়ন কৰি ইয়াৰ বাবে প্ৰয়োজনীয় সকলো ব্যৱস্থা গুৱাহাটী উন্নয়ণ বিভাগক ল’বলৈও মুখ্য মন্ত্ৰীয়ে নিৰ্দেশ দিয়ে।
তদুপৰি গুৱাহাটীৰ পামহিত প্ৰথমটো পয়-প্ৰণালী ব্যৱস্থাপনা প্ৰকল্প স্থাপনৰ ব্যৱস্থা ল’বলৈও মুখ্য মন্ত্ৰীয়ে গুৱা্হাটী উন্নয়ন বিভাগক নিৰ্দেশ দিয়ে। দীপৰ বিলৰ মাজেৰে যোৱা বিদ্যুতৰ উচ্চ পৰিবাহী তাৰৰ ফলত দীপৰ বিলত থকা পক্ষীকুলকে ধৰি বিশ্বৰ বিভিন্ন প্ৰান্তৰ পৰা অহা পৰিভ্ৰমী চৰাইৰ বিচৰণ বাধাপ্ৰাপ্ত হৈছে নেকি সেই বিষয়ে সঠিকভাবে অধ্যয়ন কৰি বন বিভাগক প্ৰতিবেদন দাখিল কৰিবলৈ আজিৰ বৈঠকত মুখ্য মন্ত্ৰীয়ে নিৰ্দেশ দিয়ে।
দীপৰ বিলৰ নৈসৰ্গিক শোভা অক্ষুন্ন ৰখা তথা ইয়াৰ শোভাবৰ্দ্ধনৰ বাবে যুটীয়াভাৱে পৰ্যটন আৰু বন বিভাগক উদ্যোগ ল’বলৈ মুখ্য মন্ত্ৰীয়ে আজিৰ বৈঠকতে নিৰ্দেশ দিয়ে।
আজি অনুষ্ঠিত বৈঠকত গুৱাহাটী উন্নয়ন বিভাগৰ মন্ত্ৰী সিদ্ধাৰ্থ ভট্টাচাৰ্য, বন মন্ত্ৰী পৰিমল শুক্লবৈদ্য, সমাজ কল্যাণ বিভাগৰ মন্ত্ৰী প্ৰমীলা ৰাণী ব্ৰহ্ম, ৰাজহ আৰু দুৰ্যোগ ব্যৱস্থাপনা বিভাগৰ ৰাজ্যিক মন্ত্ৰী ভৱেশ কলিতা, পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ণ কলিতা, মুখ্য সচিব আলোক কুমাৰ, অতিৰিক্ত মুখ্য সচিবদ্বয় ক্ৰমে ৰাজীৱ বৰা, ৰবি কাপুৰৰ লগতে বিভিন্ন বিভাগৰ উচ্চপদস্থ বিষয়া সকলৰ লগতে প্ৰকৃতি সুৰক্ষাৰ লগত জড়িত বিভিন্ন সংস্থাৰ প্ৰতিনিধি উপস্থিত থাকে।
