অসমৰ মুখ্য মন্ত্ৰী সৰ্বানন্দ সোণোৱালে মঙলবাৰে নতুন দিল্লীত কেন্দ্ৰীয় গৃহমন্ত্ৰী অমিত শ্বাহক সাক্ষাৎ কৰি ৰাষ্ট্ৰীয় নাগৰিকপঞ্জী প্ৰকাশৰ পাছত হ’ব পৰা আইন-শৃংখলাজনিত পৰিস্থিতিৰ প্ৰত্যাহবানৰ লগতে ভালেমান গুৰুত্বপূৰ্ণ বিষয়ত আলোচনা কৰে।
মুখ্য মন্ত্ৰী সোণোৱালে তাৰোপৰি ৰাজ্যত বানপানীৰ ফলত হোৱা ক্ষয়-ক্ষতিৰ বিষয়ে গৃহমন্ত্ৰীক অৱগত কৰে।
গৃহমন্ত্ৰী অমিত শ্বাহে সোণোৱালক ৩১ আগষ্টত প্ৰকাশ পাবলগীয়া সম্পূৰ্ণ নাগৰিকপঞ্জীৰ পাছত ৰাজ্য চৰকাৰলৈ কেন্দ্ৰ চৰকাৰৰ তৰফৰ পৰা সকলো প্ৰকাৰৰ সাহায্য প্ৰদানৰ আশ্বাস দিয়ে।
আনহাতে, চলিত বানপানীত ৰাজ্যত হোৱা ক্ষয়-ক্ষতিৰ সবিশেষ তথ্য গৃহমন্ত্ৰীগৰাকীৰ ওচৰত দাঙি ধৰি সোণোৱালে বানপানীৰ পাছৰ পৰ্যায়ত কেন্দ্ৰ চৰকাৰৰ সহযোগিতা আশা কৰে।
শ্বাহে বানপানীৰ পাছত অসমত পুনৰ সংস্থাপন আৰু পুনৰনিৰ্মাণৰ কাম–কাজত কেন্দ্ৰ চৰকাৰে সকলো ধৰণে সহায় কৰিব বুলিও নিশ্চয়তা প্ৰদান কৰে।
উল্লেখযোগ্য যে, গৃহমন্ত্ৰীৰ সৈতে হোৱা বৈঠকৰ অন্তত মুখ্য মন্ত্ৰী সোণোৱালে এন আৰ চি উন্নীতকৰণৰ ক্ষেত্ৰত উচ্চতম ন্যায়ালয়ৰ অভিভাৱকত্বত বৰাক-ব্ৰহ্মপুত্ৰ, পাহাৰ-ভৈয়ামৰ সকলো লোকে সহায়-সহযোগিতা কৰে বুলি উল্লেখ কৰে।
তেওঁ চূড়ান্ত এন আৰ চি প্ৰকাশৰ পাছতো ৰাজ্যৰ জনসাধাৰণক শান্তি শৃংখলা অটুত ৰখাৰ বাবে আহ্বান জনায়।