ক’ৰ’না মহামাৰীৰ আতংকৰ বাবে বিগত সাতমাহৰো অধিক কাল ধৰি বন্ধ হৈ থকা ৰাজ্যৰ শিক্ষানুষ্ঠানসমূহ পুনৰ মুকলি কৰা সন্দৰ্ভত আলোচনাৰ বাবে মুখ্য মন্ত্ৰী সৰ্বানন্দ সোণোৱালে আজি শিক্ষা, স্বাস্থ্য আদি বিভাগৰ বিষয়ববীয়াসকলৰ সৈতে এখন বৈঠকত মিলিত হয়।
বৈঠকত উচ্চ শিক্ষা বিভাগৰ প্ৰধান সচিব বি কল্যাণ চক্ৰৱৰ্তীয়ে এক প্ৰজেষ্টেশ্যনযোগে বিদ্যালয়সমূহৰ পাঠদান আৰম্ভ কৰাৰ বাবে শিক্ষা বিভাগে প্ৰস্তুত কৰা সুনিৰ্দিষ্ট কাৰ্য্যবিধিৰ বিষয়ে বিস্তৃতভাৱে মুখ্য মন্ত্ৰীক অৱগত কৰে।
কেইবাটাও গুৰুত্বপূৰ্ণ দিশত এই বিধিৰ সংশোধন কৰাৰ লগতে শ্ৰেণীসমূহ পুনৰ আৰম্ভ কৰাৰ দিশত কোভিড বিধি কঠোৰভাৱে মানি চলাটো সুনিশ্চিত কৰিবলৈ সোণোৱালে শিক্ষা বিভাগক নিৰ্দেশ দিয়ে।
শ্ৰেণীসমূহ পুৱাবেলা যথাসম্ভৱ সোনকালে আৰম্ভ কৰিবলৈ, শিক্ষাৰ্থীৰ দুটা দলৰ অহা আৰু যোৱা সময়ৰ মাজত উপযুক্ত ব্যৱধান ৰাখিবলৈ তথা শ্ৰেণীকোঠা, প্ৰস্ৰাৱগাৰ আদিৰ নিয়মীয়া আৰু উপযুক্ত পৰিচ্ছন্নতা সুনিশ্চিত কৰাৰ দিশত মুখ্য মন্ত্ৰীয়ে বিশেষ গুৰুত্ব আৰোপ কৰে।
ছাত্ৰ-ছাত্ৰীৰ মন আনুষ্ঠানিক পাঠদান প্ৰক্ৰিয়াৰ মাজলৈ পুনৰ ঘুৰাই অনাৰ বাবে পাঠদানৰ প্ৰথম মাহটোত তেওঁলোকক দৃশ্য-শ্ৰাব্য ব্যৱস্থা, কাহিনী কথন আদি আকৰ্ষণীয় পদ্ধতিৰ আশ্ৰয় ল’বলৈ, ছাত্ৰ-ছাত্ৰী আৰু অভিভাৱকসকলৰ মাজত কোভিড-১৯ সন্দৰ্ভত সজাগত সৃষ্টি কৰা তথা এই মহামাৰীক নিয়ন্ত্ৰণলৈ অনাৰ বাবে চৰকাৰে গ্ৰহণ কৰা ব্যৱস্থাৱলী সন্দৰ্ভত অৱগত কৰাৰ ব্যৱস্থা ল’বলৈও মুখ্য মন্ত্ৰী সোণোৱালে শিক্ষা বিভাগক নিৰ্দেশ দিয়ে।
ছাত্ৰ-ছাত্ৰীৰ ৰোগ প্ৰতিৰোধ ক্ষমতা বঢ়োৱাৰ বাবে তেওঁলোকক আইৰণ আৰু ফলিক এচিডৰ বড়ি যোগান ধৰা, নিয়মীয়া যোগাভ্যাসৰ প্ৰশিক্ষম দিয়া তথা নিয়মীয়া স্বাস্থ্য পৰীক্ষাৰ ব্যৱস্থা কৰিবলৈ তেওঁ বিভাগটোক নিৰ্দেশ দিয়ে।
বিদ্যালয়সমূহত স্থাপন কৰা কোভিড কেয়াৰ কেন্দ্ৰ সমূহ শীঘ্ৰে স্থানান্তৰ কৰিবলৈ তথা যিকোনো জৰুৰী পৰিস্থিতিৰ বাবে প্ৰতিখন বিদ্যালয়ৰ লগতে একোখনকৈ স্বাস্থ্য কেন্দ্ৰক সমন্বিতকৰণৰ ব্যৱস্থা গ্ৰহণ কৰিবলৈ তেওঁ বৈঠকত উপস্থিত থকা স্বাস্থ্য বিভাগৰ কৰ্ম-কৰ্তাসকলক নিৰ্দেশ দিয়ে।
পৰিৱৰ্তিত পৰিস্থিতিত শিক্ষাদানৰ পাৰম্পৰিক পদ্ধতিৰ লগতে ডিজিটেল মাধ্যমৰ অপৰিহাৰ্য্যতাৰ প্ৰতি লক্ষ্য ৰাখি অনলাইনযোগ্য পাঠ গ্ৰহণ কৰিব পৰা স্মাৰ্টফোনৰ দৰে সঁজুলি নথকা দৰিদ্ৰ সীমাৰেখাৰ তলৰ অভিভাৱকসকলক তেনে সঁজুলি প্ৰদানৰ ব্যৱস্থা গ্ৰহণ কৰিবলৈও মুখ্য মন্ত্ৰীয়ে আজি শিক্ষা বিভাগক নিৰ্দেশ দিয়ে।
উল্লেখযোগ্য যে, শিক্ষা বিভাগে প্ৰস্তত কৰা সুনিৰ্দিষ্ট কাৰ্য্যবিধি অনুসৰি অহা ২ নৱেম্বৰৰ পৰা ৰাজ্যৰ বিদ্যালয়সমূহৰ ষষ্ঠ শ্ৰেণীৰ ওপৰৰ ছাত্ৰ-ছাত্ৰীসকলৰ আনুষ্ঠানিক পাঠদান আৰম্ভ হ’ব।
ষষ্ঠ, সপ্তম, নৱম আৰু দ্বাদশ শ্ৰেণীৰ পাঠদান সোম, বুধ আৰু শুকুৰবাৰে হোৱাৰ বিপৰীতে অষ্টম, দশম আৰু একাদশ শ্ৰেণীৰ পাঠদান মঙল, বৃহস্পতি আৰু শনিবাৰে হ’ব।
