মুখ্য মন্ত্ৰী সৰ্বানন্দ সোণোৱালে বৃহস্পতিবাৰে কেন্দ্ৰীয় অসামৰিক পৰিবহন দপ্তৰৰ ৰাজ্যিক(স্বতন্ত্ৰ) মন্ত্ৰী হৰদ্বীপ সিং পুৰীক নতুন দিল্লীত সাক্ষাৎ কৰি প্ৰধানমন্ত্ৰী নৰেন্দ্ৰ মোদীৰ ‘এক্ট ইষ্ট পলিচি’ ৰূপায়নৰ দিশটো ত্বৰান্বিত কৰাৰ দিশত সহায়ক হোৱাকৈ গুৱাহাটীৰ পৰা ছিংগাপুৰ, কুৱালালামপুৰ, য়াংগুন আরু হানায় লৈ আন্তৰ্জাতিক বিমান সেৱা আৰম্ভ কৰাৰ পদক্ষেপ ল’বলৈ আহ্বান জনায়।
গুৱাহাটীৰ পৰা ঢাকালৈ প্ৰত্যক্ষ আন্তৰ্জাতিক বিমান সেৱা আৰম্ভ কৰাৰ বাবে কেন্দ্ৰীয় মন্ত্ৰী গৰাকীক ধন্যবাদ জ্ঞাপন কৰি মুখ্য মন্ত্ৰীয়ে গুৱাহাটী-মুম্বাই-ডুবাই অথবা দিল্লী-গুৱহাটী-বেংক’ক সামৰি হোপিং ফ্লাইটৰ সেৱা আৰম্ভ কৰাৰ দিশটো বিবেচনা কৰাৰ বাবেও আহ্বান জনায়। এই প্ৰসংগত মুখ্য মন্ত্ৰীয়ে কয় যে এই ব্যৱস্থাই গুৱাহাটীৰ সৈতে আন্তৰ্জাতিক বিমান সেৱা সংযোগীকৰণৰ দিশত বিশেষ সহায় কৰিব।
মুখ্য মন্ত্ৰী সোণোৱালে লগতে কেন্দ্ৰীয় মন্ত্ৰীগৰাকীক ৰূপচি বিমান বন্দৰৰ পুনৰুজ্জীৱিতকৰণৰ কাম-কাজ ক্ষীপ্ৰ গতিত সম্পন্ন কৰাৰ পদক্ষেপ ল’বলৈও আহ্বান জনায় যাতে নিৰ্দ্ধাৰিত লক্ষ্য অনুসৰি ইয়াৰ পৰা বিমান সেৱা আৰম্ভ কৰিব পৰা যায়।
মুখ্য মন্ত্ৰীয়ে বৰাক উপত্যকাৰ শিলচৰ বিমান বন্দৰৰ পৰিসৰ বৃদ্ধি আৰু উন্নীতকৰণৰ পদক্ষেপ ল’বলৈও আহ্বান জনায় যাতে ই আঞ্চলিক বিমান সেৱাৰ এক হাব হিচাপে পৰিগণিত হয়। মুখ্য মন্ত্ৰীয়ে যোৰহাট আৰু তেজপুৰ বিমান বন্দৰত ‘উড়ান’ আঁচনিৰ জৰিয়তে অধিক বিমান সেৱা প্ৰাৰম্ভণৰ ব্যৱস্থা ল’বলৈও কেন্দ্ৰীয় মন্ত্ৰীগৰাকীক আহ্বান জনায়।
উড়ান আঁচনিৰ অধীনত গুৱাহাটী আৰু উমৰাংছুত ছিপ্লেন সেৱা আৰম্ভ কৰাৰ বাবে ৱাটাৰ এৰ’ড্ৰম নিৰ্মাণৰ কাম ক্ষীপ্ৰতাৰে আৰম্ভ কৰাৰ বাবেও কেন্দ্ৰীয় মন্ত্ৰীগৰাকীক মুখ্যমন্ত্ৰীয়ে আহ্বান জনায়।
মুখ্য মন্ত্ৰীৰ অনুৰোধৰ প্ৰতি ইতিবাচক সঁহাৰি জনাই কেন্দ্ৰীয় অসামৰিক পৰিবহন দপ্তৰৰ ৰাজ্যিক(স্বতন্ত্ৰ) মন্ত্ৰী গৰাকীয়ে এই প্ৰকল্প সমূহৰ দিশত তেওঁৰ মন্ত্ৰালয়ে সম্ভৱপৰ সকলো কাৰ্য্য ব্যৱস্থা গ্ৰহণ কৰিব বুলি আশ্বাস প্ৰদান কৰে।