‘অসমৰ পাৰিপাৰ্শ্বিকতা আৰু জৈৱ বিবিধতা সংৰক্ষণৰ দিশত আমি দায়বদ্ধ। সেয়েহে ৰাজ্যখনৰ প্ৰাকৃতিক শোভা, ইয়াৰ সেউজ আৱৰণ আৰু প্ৰাকৃতিক সমলসমূহ সংৰক্ষণৰ দিশত ৰাজ্য চৰকাৰৰ ঐকান্তিকতাৰ ওপৰত কোনেও সন্দেহৰ চকুৰে চোৱা উচিত নহয়। মই ইতিমধ্যে ৰাজ্যৰ বন আৰু পৰিৱেশ বিভাগৰ মন্ত্ৰী পৰিমল শুক্লবৈদ্যক দিহিং-পাটকাই পৰিদৰ্শন কৰি অঞ্চলটোৰ বৰ্তমানৰ পৰিস্থিতিৰ চৰজমিন বুজ লোৱাৰ নিৰ্দেশ দিয়াৰ লগতে এই সম্বন্ধে প্ৰতিবেদন দাখিলৰ নিৰ্দেশ দিছো যাতে ৰাজ্যৰ চৰকাৰে এই দিশত পৰৱৰ্তী পদক্ষেপ ল’ব পাৰে,’’-আজি ডিব্ৰুগড়ত সাংবাদিকৰ সৈতে হোৱা কথা-বতৰাত মুখ্য মন্ত্ৰী সোণোৱালে এই মন্তব্য কৰে।
মুখ্য মন্ত্ৰী সৰ্বানন্দ সোণোৱালে আজি কোভিড-১৯ ৰোগৰ বাবে দ্বিতীয় পৰ্যায়ত স্থাপন কৰা সৰ্বমুঠ ৪ টা কোৱাৰেণ্টাইন চেণ্টাৰ পৰিদৰ্শন কৰি ইয়াত উপলব্ধ বিভিন্ন সা-সুবিধাৰ বুজ লয়। মুখ্য মন্ত্ৰীয়ে এম ডি কে কানৈ মহাবিদ্যালয়, ডি এইচ এছ কে মহাবিদ্যালয়ৰ ছাত্ৰী নিবাস, ডিকম পাৰ্বতী দেৱী মধ্য ইংৰাজী বিদ্যালয়ৰ বস্তুৰৱা গান্ধী ছাত্ৰী নিবাস আৰু চাবুৱাৰ অসম বিদ্যাপীঠ হাইস্কুলত স্থাপন কৰা কোৱাৰেণ্টাইন চেণ্টাৰ পৰিদৰ্শন কৰে।
ল’কডাউনৰ ফলত দেশৰ বিভিন্ন ঠাইত আৱদ্ধ হৈ পৰা অসমৰ জনসাধাৰণক ৰাজ্যখনলৈ ওভতাই অনাৰ দিশত ৰাজ্য চৰকাৰে যথাসম্ভৱ সকলো প্ৰয়োজনীয় ব্যৱস্থা গ্ৰহণ কৰিছে বুলি উল্লেখ কৰি কোভিড-১৯-ত আক্ৰান্ত ৰোগীৰ সংখ্যা বৃদ্ধি হোৱাৰ বাবে কোনেও আতংকিত হোৱাৰ প্ৰয়োজন নাই বুলিও মুখ্য মন্ত্ৰীয়ে কয়।
মুখ্য মন্ত্ৰীয়ে কোভিড-১৯ সম্পৰ্কে নিজৰ নিজৰ সমষ্টিত ব্যপক জনসচেতনতা সৃষ্টি তথা জিলা প্ৰশাসন আৰু স্বাস্থ্য বিভাগে গ্ৰহণ কৰা পদক্ষেপ সমূহ নিৰীক্ষণৰ দিশত সাংসদ, বিধায়ক তথা অন্যান্য জনপ্ৰতিনিধিসকলে আগবাঢ়াই থকা সক্ৰিয় ভূমিকাৰো শলাগ লয়।
আজিৰ এই পৰিদৰ্শনৰ সময়ত বিধায়ক প্ৰশান্ত ফুকন, ঋতুপৰ্ণ বৰুৱা, তেৰচ গোৱালা, বিনোদ হাজৰিকাৰ লগতে ডিব্ৰুগড় জিলাৰ উপায়ুক্ত পল্লৱ গোপাল ঝাও উপস্থিত থাকে।