সমাগত বিটিচি নিৰ্বাচন, গতিকে বিটিএডিত এতিয়া ৰাজনৈতিক বাক্ বিতণ্ডাৰ যুঁজখন অধিক তীব্ৰতৰ হৈ পৰিছে। কোকৰাঝাৰৰ সাংসদ নৱ শৰণীয়া বড়ো-অবড়ো ৰাজনীতিত ব্যস্ত থকা বুলি গুৰুতৰ অভিযোগ চলি থকাৰ মাজতে এবছুৰ সভাপতি প্ৰমোদ বড়োলৈ তেওঁ আগবঢ়াইছে এক প্ৰস্তাৱ।
দিচপুৰ প্ৰেছ ক্লাৱত বৃহস্পতিবাৰে সম্বোধন কৰা বিটিচি নিৰ্বাচন কেন্দ্ৰিক এখন সংবাদমেলত প্ৰমোদ বড়োক নৱগঠিত গণ সুৰক্ষা পাৰ্টীলৈ আমন্ত্ৰণ জনালে সাংসদ শৰণীয়াই।
‘প্ৰমোদ বড়ো আমাৰ লগত আহক, আমাৰ লগত একেলগে কাম কৰক। তেতিয়া আমি আদৰণি জনাম,‘-শৰণীয়াই সংবাদমেলত এইদৰে কয়।
অৱশ্যে, এটা চৰ্ত সাপেক্ষেহে দলৰ মজিয়ালৈ বড়োক আমন্ত্ৰণ জনালে শৰণীয়াই।
‘যদি প্ৰমোদ বড়োৱে বড়োৰ সমান্তৰালকৈ অন্যান্য জাতি-জনগোষ্ঠীৰ অধিকাৰসমূহ মানি লয়, তেতিয়া তেওঁ আমাৰ লগত চামিল হ’ব পাৰে,‘-প্ৰমোদ বড়োক উদ্দ্যেশি শৰণীয়াই এইদৰে কয়।
ইপিনে, এই চৰ্ত ৰাখিলে প্ৰমোদ বড়োক নতুনকৈ গঠন হোৱা ৰাজনৈতিক দলটোৰ মুৰব্বী পতাতো আপত্তি নাথাকিব বুলি সদৰী কৰে সাংসদগৰাকীয়ে।
তেওঁ কয়, ‘বড়ো চীফ হয়, এ.এম হয় হওঁক, আমাৰ আপত্তি নাই। দললৈ আহি ৰাইজৰ সেৱাৰ দায়িত্ব ল’লে তেওঁক আমি মুৰব্বী নিশ্চিতভাৱে বনাই দিম।‘
শৰণীয়াৰ মতে ‘এবছু এতিয়া বিপিএফৰ লগত নাই। কিন্তু ভিতৰুৱাভাৱে অহা নিৰ্বাচনত বুজা পৰা হ’ব পাৰে।‘
আনহাতে, সেই একেখন সংবাদমেলতে যিকোনো মুহূৰ্তত বিটিএডি কাউন্সিলৰ নিৰ্বাচন অনুষ্ঠিত হ’লেও গণ সুৰক্ষা পাৰ্টী চিন্তিত নহয় বুলি দাবী কৰে শৰণীয়াই।
শৰণীয়াই কয়, ‘যিকোনো মূহুৰ্তত নিৰ্বাচন অনুষ্ঠিত কৰিলেও আমি সাজু আছো। অহা ২৪ ঘন্টাৰ ভিতৰত নিৰ্বাচন পাতিলেও যুঁজিবলৈ সাজু হৈ আছো। আমাৰ হাতত এতিয়ালৈকে প্ৰায় ৩০০ লোকে প্ৰাৰ্থিত্ব বিচাৰি আবেদন জনাইছে।‘
ইপিনে, ‘গণ সুৰক্ষা পাৰ্টী খোলাৰ সিদ্ধান্ত গ্ৰহণ কৰাৰ লগে লগে লক্ষাধিক বিপিএফ, কংগ্ৰেছ, বিজেপিকে ধৰি বিভিন্ন দলৰ কৰ্মীসকল এই দললৈ অহাৰ বাবে সাজু হৈ আছে বুলি দাবী কৰি শৰণীয়াই কয়, ‘কেৱল সঠিক সময় সুযোগৰ বাবে অপেক্ষা কৰি আছো। বিটিএডিত বিপিএফ আৰু গণ সুৰক্ষা পাৰ্টীক বাদ দি অন্য কোনো ৰাজনৈতিক দলৰ কাম নাই।‘
শৰণীয়াই লগতে কয়, ‘হাগ্ৰামাই আৰম্ভ কৰা ৰাজনীতিৰ বিকল্প হিচাপে গণ সুৰক্ষা পাৰ্টী গঠিত হৈছে। এইবাৰ বিটিচি নিৰ্বাচনত কাউন্সিল দখল কৰি পৰিৱৰ্তনৰ স্বাৰ্থত এক নতুন দিগন্তৰ সুচনা কৰাটো বিচাৰিছো।‘
তদুপৰি, ২০১০ চনত বিটিচি কাউঞ্চিলে বড়োলেণ্ড লাগিব বুলি কেন্দ্ৰীয় চৰকাৰলৈ প্ৰস্তাৱ প্ৰেৰণ কৰিছিল বুলি সদৰী কৰি তেওঁ কয়, ‘নৱ শৰণীয়া অহা দেখি এতিয়া তেওঁলোকে ওলোটা খৰ দিবলৈ ওলাইছে। এতিয়া বড়োলেণ্ড নালাগে বুলি হাগ্ৰামাই নাটক কৰিছে বুলি আমাৰ মানুহে জানে।‘
