দৰং জিলাৰ সহস্ৰাধিক গৃহহীন শিশুৰ জীৱনলৈ নতুন আশা ঘুৰাই অনাৰ লক্ষ্যৰে চাইল্ড লাইন ফাউণ্ডেশ্যনে দৰং জিলাৰ লগতে অসম আন অতিৰিক্ত চৈধ্যখন জিলালৈ সেৱা সম্প্ৰসাৰণৰ পৰিকল্পনা হাতত লৈছে ২০১৯-২০ বিত্তিয় বৰ্ষত। চাইল্ড লাইন ফাউণ্ডেশ্যন হৈছে শিশুসকলৰ বাবে ২৪ ঘণ্টীয়া বিনামূলীয়া জৰুৰীকালীন টেলিফোন আৰু উদ্ধাৰকাৰী সেৱা আগবঢ়োৱা স্বেচ্ছাসেৱী সংস্থা।
বুধবাৰে, নতুন পদক্ষেপৰ বাবে দৰং জিলা উপায়ুক্তৰ সভাকক্ষত জিলা শিশু সুৰক্ষা গোট, দৰঙৰ উদ্যোগত চৰকাৰী অংশীদাৰী সংস্থা আৰু অন্যান্য বেচৰকাৰী স্বেচ্ছাসেৱী সংস্থাসমূহৰ লগত এখন বৈঠকত অংশগ্ৰহণ কৰে।
বৈঠকত অংশলৈ চাইল্ড লাইন কলিকতাৰ আঞ্চলিক উৎস কেন্দ্ৰৰ জেষ্ঠ সমন্বয়ক দেৱনাথ ঘোষে ভাৰত চৰকাৰৰ শিশু আৰু মহিলা বিকাশ মন্ত্ৰালয়ৰ অধীনৰ সংস্থা চাইল্ড লাইন, কেন্দ্ৰীয়ভাৱে নিয়ন্ত্ৰিত শিশুসকলৰ বাবে বিনামূলীয়া নম্বৰ ১০৯৮, শিশু সুৰক্ষাৰ বাবে ইয়াৰ কৰ্মপদ্ধতি, দেশব্যাপী সংযোগ আৰু প্ৰসাৰ, সহযোগি স্বেচ্ছাসেৱী গোট আদিৰ বিষয়ত বিষদভাৱে পাৱাৰ পইণ্ট প্ৰেজেণ্টেশ্যন আগবঢ়ায়।
অসমত চাইল্ড লাইনৰ পৰিষৰ বৃদ্ধিৰ সন্দৰ্ভত ঘোষে কয় ‘আমি গোটেই দেশত ইতিমধ্যে পাঁচশতকৈও অধিক ঠাইত ৭০০ কৈ অধিক সহযোগিৰ সৈতে সেৱা আগবঢ়াই আছো। ২০২৩ চনৰ ভিতৰত সমগ্ৰ দেশলৈ আমাৰ সেৱাৰ পৰিসৰ বৃদ্ধি কৰাৰ লক্ষ্য স্থিৰ কৰিছো’’। চলিত বিত্তিয় বৰ্ষত অসমৰ চৈধ্যখন জিলালৈ চাইল্ড লাইনৰ সেৱা বৃদ্ধি কৰা হ’ব বুলিও তেওঁ কয়।
চাইল্ড লাইনে ইতিমধ্যে ৰে’লৱেক সামৰি অসমৰ তেৰখন জিলাত সেৱা আগবঢ়াই আহিছে। চাইল্ড লাইনৰ কাৰ্য্যলয় সহায়কে বৈঠকত অংশগ্ৰহণকাৰীসকলৰো প্ৰশ্নৰ উত্তৰ দিয়ে।
বৈঠকত অংশগ্ৰহণ কৰি দৰং জিলাৰ সহকাৰী জিলা উপায়ুক্ত কুলেন শৰ্মাই শিশু বিকাশ মন্ত্ৰালয়ক চৈধ্যখন জিলাৰ ভিতৰত দৰং জিলাকো অন্তৰ্ভুক্ত কৰাৰ বাবে ধন্যবাদ জ্ঞাপন কৰে। তেওঁ দৰং জিলাৰ উপায়ুক্তৰ কাৰ্য্যালয়ৰ পৰা এই ক্ষেত্ৰত প্ৰয়োজনীয় সকলো প্ৰকাৰৰ সহায় আগবঢ়োৱাৰ প্ৰতিশ্ৰুতি দিয়ে।
বৈঠকত শিশু কল্যান মন্ত্ৰালয়, জুভেলাইন জাষ্টিচ বোৰ্ড, বিদ্যালয় পৰিদৰ্শক, স্বাস্থ্য বিভাগকে ধৰি বিভিন্ন অংশীদাৰী দল সমূহে অংশগ্ৰহণ কৰে।