বিশ্বজুৰি ত্ৰাস সৃষ্টিকাৰী কৰ’না ভাইৰাছৰ উৎপত্তিস্থল হিচাপে চীনক বিশ্বই সমালোচনা কৰি আহিছে। বিশ্বজুৰি এই ভাইৰাছে মৃত্যুৰ কিৰিলি পৰা বাবে বহুতে চীনক কটু সমালোচনাও কৰা পৰিলক্ষিত হৈছে।
বৰ্তমানলৈকে সমগ্র বিশ্বতে ২৭ লক্ষাধিক লোকলৈ এই ভাইৰাছৰ সংক্ৰমণ হোৱাৰ লগতে ডেৰ লক্ষাধিক লোকে মৃত্যুক আঁকোৱালি লৈছে। ভাৰততো ২৩ সহস্ৰাধিক লোক এই ভাইৰাছৰ কৱলত পৰাৰ লগতে ৭ শতাধিক লোকে ইতিমধ্যে প্ৰাণ হেৰুৱাইছে।
বিশ্বজুৰি এই কৰ’নাৰ সন্ত্ৰাসৰ পাছতো বৰ্তমানো চীনত নিৰ্মিত ভিডিও sharing app টিক-টকৰ জনপ্ৰিয়তা হ্ৰাস পোৱা নাই। বিশ্বৰ ভিতৰত নৱম ধনী ব্যক্তি চীনৰ ৩৬ বছৰীয়া Zhang YiMing য়ে এই এপ প্ৰস্তুত কৰি উলিয়াইছিল য’ত নেকি আপুনি ৩ চেকেণ্ডৰ পৰা ৬০ চেকেণ্ড পৰ্যন্ত ভিডিও প্ৰস্তুত কৰি বিভিন্ন সামাজিক মাধ্যমত আপলোড কৰিব পাৰে।
স্বাভাৱিকতে ভাৰতীয় লোকে বিভিন্ন সময়ত চীনক গালি পাৰি আহিছে যদিও তাৎপৰ্যপূৰ্ণভাৱে লকডাউনৰ ৩১ দিনলৈকে ভাৰতত বৃদ্ধি পাইছে এই টিক-টকৰ জনপ্ৰিয়তা।
ইণ্টাৰনেটত লাভ কৰা তথ্য অনুসৰি সমগ্ৰ বিশ্বতে প্ৰায় ৮০০ মিলিয়ন সক্ৰিয় টিক-টক ব্যৱহাৰকাৰী আছে। তাৰে ভাৰতত আছে ১১৯ মিলিয়ন সক্ৰিয় ব্যৱহাৰকাৰী। লগতে প্ৰায় ২৭৭ মিলিয়ন লোকে এই এপ ডাউনলোড কৰিছে। আমেৰিকাতো ১২৩ মিলিয়ন লোকে সক্ৰিয়ভাৱে ব্যৱহাৰ কৰে এই এপ।
আপুনি শুনি আচৰিত হ’ব যে ভাৰতত লকডাউনৰ দিনকেইটাত whatsapp তকৈ অধিক জনপ্ৰিয় হৈ পৰিছে টিক-টক এপ। এই দিনকেইটাত ২০ মিলিয়ন লোকে whatsapp ডাউনলোড কৰাৰ বিপৰীতে প্ৰায় ৫০ মিলিয়ন লোকে নতুনকৈ একাউণ্ট খুলিছে টিক-টকত।
লকডাউনৰ ফলত শিক্ষানুষ্ঠান, কাৰ্য্যালয় বন্ধ তথা জৰুৰীকালীন সেৱাক বাদ দি সৰহসংখ্যক লোক গৃহ বন্দী হৈ আছে। যাৰ ফলত অস্বস্তি বা অশান্তিৰ মাজেৰে দিন কটাবলগীয়া হৈছে বহুতে।
বহু সংখ্যক লোকে ঘৰৰ ভিতৰত আবদ্ধ হৈ থকা ফলত সু-স্বাদু ৰন্ধন প্ৰকৰণ তৈয়াৰ কৰি সময় অতিবাহিত কৰিছে। অন্য কিছু সংখ্যকে ফেচবুক, whatsapp কৰি তথা কিতাপ পঢ়ি, গেম খেলি সময় অতিবাহিত কৰিছে।
তাৰ ভিতৰত আকৌ বহুতেই মনোৰঞ্জনৰ আহিলা হিচাপে বাচি লৈছে টিক-টক। বলিউড, হলিউডৰ তাৰকা, কণ্ঠশিল্পী, অভিনেতা-অভিনেত্ৰীৰ পৰা আৰম্ভ কৰি তথা যুৱক-যুৱতীৰ পৰা আৰম্ভ কৰি বয়োজ্যেষ্ঠলৈকে এতিয়া এই এপৰ জৰিয়তে ভিডিও প্ৰস্তুত কৰি ছচিয়েলl মিডিয়াত চৰ্চিত হৈছে।
বহু প্ৰতিভা ইতিমধ্যে টিক-টকৰ জৰিয়তে বিকশিত হোৱাও পৰিলক্ষিত হৈছে।
তাৎপৰ্যপূৰ্ণভাৱে বহুসংখ্যকে এই টিক-টক এপক পূৰ্বতে গালি পাৰিছিল বা সমালোচনা কৰিছিল যদিও লকডাউনৰ সময়ছোৱাত তেওঁলোকেও এই এপ ব্যৱহাৰ কৰি বিভিন্ন ভংগীমা প্ৰকাশ কৰা পৰিলক্ষিত হৈছে।
শেহতীয়াকৈ শাসকীয় বিজেপিকে ধৰি অন্য বিৰোধী দলৰ অনুৰাগী সকলেও নিজ নিজ দলৰ নীতি-কৌশলক সমৰ্থন জনাই টিক-টকত ভিডিও প্ৰস্তুত কৰিছে।
সেয়েহে ক’ব পাৰি যে, এফালে মৃত্যুৰ আতংকৰ সৃষ্টিকাৰী বুলি গালি পৰা চীনে এতিয়া লকডাউনৰ সময়ছোৱাত মনোৰঞ্জনৰ মাজেৰে সময় অতিবাহিত কৰিবলৈ ভাৰতীয়লৈ আগবঢ়াইছে এক সুন্দৰ উপহাৰ!
