ক্ৰমশঃ কঠোৰ হৈ উঠিছে হংকঙৰ গণতান্ত্ৰিক কৰ্মীৰ প্ৰতি ৰঙা চীন।
বুধবাৰে চীনে স্বায়ত্ত শাসিত প্ৰদেশখনৰ ১০ গৰাকীকৈ গণতান্ত্ৰিক কৰ্মীক কাৰাৰুদ্ধ কৰিছে।
চীনৰ এখন আদালতে হংকং এৰি টাইৱানলৈ পলায়নৰ চেষ্টা কৰাৰ অপৰাধত হংকঙৰ ১০ গৰাকী গণতান্ত্ৰিক কৰ্মীক তিনি বছৰ পৰ্যন্ত কাৰাদণ্ড বিহিছে।
সংবাদ সংস্থা এএফপিএ প্ৰকাশ কৰা খবৰ অনুসৰি যোৱা ১০ আগষ্টত এখন নাৱেৰে হংকঙৰ পৰা টাইৱানলৈ পলায়ন কৰিব খোজা ১০ গৰাকী গণতান্ত্ৰিক কৰ্মীক চীনৰ উপকূলৰক্ষী বাহিনীয়ে গ্ৰেপ্তাৰ কৰিছিল।
হংকঙৰ উক্ত ১০ গৰাকী গণতান্ত্ৰিক কৰ্মীৰ বিৰুদ্ধে চীনৰ শেনঝেন চহৰৰ আদালত বিচাৰ প্ৰক্ৰিয়া আৰম্ভ কৰা হৈছিল আৰু বুধবাৰে বিচাৰৰ অন্তত আটাইকেইগৰাকীকে কাৰাদণ্ডৰ নিৰ্দেশ দিয়ে আদালতে।
পলায়নৰ সমগ্ৰ পৰিকল্পনা কৰাৰ অপৰাধত কাই-ইন আৰু কুইন মুন নামৰ দুই গণতান্ত্ৰিক কৰ্মীক তিনি বছৰৰ কাৰাদণ্ড বিহাৰ লগতে অন্যসকলক সাত মাহৰ কাৰাদণ্ড বিহিছে চীনৰ আদালতখনে।
উল্লেখ্য যে চীনে প্ৰদেশখনত নতুন নিৰাপত্তা আইন বলৱৎ কৰাৰ পিছতে টাইৱানে চীনৰ গণতান্ত্ৰিক কৰ্মীসকল ৰাজনৈতিক আশ্ৰয় দিয়াৰ কথা ঘোষণা কৰিছিল। চীনে টাইৱানৰ এই সিদ্ধান্তৰ তীব্ৰ বিৰোধ কৰি আহিছে।
স্মৰ্তব্য যে চীনে হংকঙত নতুন ৰাষ্ট্ৰীয় নিৰাপত্তা আইন বলৱৎ কৰা পিছৰে পৰা হংকঙত তীব্ৰ বিক্ষোভ আৰম্ভ হৈছিল। আনকি আন্তৰ্জাতিক সম্প্ৰদায়েও চীনৰ এই নতুন আইন বলৱৎ কৰা কাৰ্য বিৰোধিতা কৰি আহিছে।
