নিজৰ দেশক ক’ৰ’না ভাইৰাছৰ পৰা মুক্ত কৰি বৰ্তমান যুদ্ধ অভ্যাস আৰম্ভ কৰিছে ভাৰতৰ চুবুৰীয়া দেশ চীনে।
সমগ্ৰ বিশ্ব চীনৰ পৰা সংক্ৰমণ হোৱা কোভিদ-১৯-ৰ দ্বাৰা ভয়াবহভাৱে আক্ৰান্ত হৈ থকা সময়ত চীনে আৰম্ভ কৰা এই যুদ্ধ অভ্যাসক সহজভাৱে গ্ৰহণ কৰিব পৰা নাই বিশ্বৰ দেশসমূহে।
সমগ্ৰ বিশ্বই ক’ৰ’না ভাইৰাছৰ সৈতে সংগ্ৰাম অব্যাহত ৰখাৰ সময়ত চীনে ২৯ মাৰ্চত এক গোপন ঠাইত বৃহৎ সংখ্যক সৈন্যৰে যু্দ্ধ অভ্যাস আৰম্ভ কৰিছে।
চীনৰ এই যুদ্ধ অভ্যাসক লৈ বিশেষভাৱে চিন্তিত হৈ পৰিছে চুবুৰীয়া দেশ টাইৱান আৰু জাপান।
ক’ৰ’না ভাইৰাছৰ সুযোগ গ্ৰহণ কৰি চীনে টাইৱান আৰু জাপানৰ ওপৰত আক্ৰমণ সংঘটিত কৰিব বুলি দুয়োখন দেশে ভয় খাইছে।
চীনৰ যুদ্ধ অভ্যাসৰ প্ৰতি নজৰ ৰাখি জাপানেও নিজৰ সীমান্তত সৈন্যৰ উপস্থিতি বৃদ্ধি কৰাৰ লগতে মিছাইলৰ শক্তিও বৃদ্ধি কৰিছে।
আনহাতে, চীনে টাইৱানৰ বায়ুসীমা অতিক্ৰম কৰি যুদ্ধবিমান প্ৰেৰণ কৰিছে বুলিও টাইৱানে অভিযোগ কৰিছে।
২৯ মাৰ্চৰ নিশা টাইৱানৰ বায়ুসীমাৰ আভ্যন্তৰত প্ৰৱেশ কৰা চীনা যুদ্ধবিমানক টাইৱানৰ যুদ্ধ বিমানে খেদি পঠিয়াই বুলি জানিব পৰা গৈছে।
উল্লেখযোগ্য যে, বিশ্বৰ অধিকাংশ শক্তিশালী দেশ বৰ্তমান চীনৰ পৰা সংক্ৰমিত ভাইৰাছত আক্ৰান্ত হৈ থকাৰ সময়তে চীনে ইয়াৰ সুযোগ গ্ৰহণ কৰি টাইৱানৰ ওপৰত নিজৰ অধিকাৰ সাব্যস্ত কৰিব বুলি বহুতে ধাৰণা কৰিছে।
চীনে বিশ্বক ক’ৰ’না মুক্ত কৰাৰ বাবে যিধৰণৰ সহযোগিতা কৰিব লাগিছিল সেয়া নকৰি এতিয়া যুদ্ধ অভ্যাস আৰম্ভ কৰা কাৰ্য্যই দেশখনৰ আচৰণক লৈ সকলোৱে চিন্তা ব্যক্ত কৰিছে।
