বিশ্বৰ আটাইতকৈ জনবহুল চীনত এতিয়া জনসংখ্যাৰ মন্থৰ বৃদ্ধিয়ে চিন্তিত কৰি তুলিছে দেশ খনৰ চৰকাৰক। চীনৰ চৰকাৰে দেশ খনৰ জনসংখ্যা বৃদ্ধিৰ বাবে চেষ্টা অব্যাহত ৰাখিছে। সেইমৰ্মে গ্ৰহণো কৰিছে কেতবোৰ অভিনৱ পন্থা। প্ৰশাসনৰ তৰফৰ পৰা নৱ দম্পতিক সোধা হৈছে এক বিশেষ প্ৰশ্ন। এগৰাকী নৱ বিবাহিতা মহিলাই কয় যে তেওঁ স্থানীয় প্ৰশাসনৰ পৰা তেওঁলৈ এটা ফোনকল আহিছিল।
তেওঁক সোধা হৈছিল যে তেওঁ গৰ্ভৱতী নেকি? মহিলাগৰাকীৰ অভিজ্ঞতাটো নেটত শ্বেয়াৰ কৰাৰ লগে লগেই ভাইৰেল হৈ পৰিছে। হাজাৰ হাজাৰ ব্যৱহাৰকাৰীয়ে কৈছে যে তেওঁলোকেও একে অভিজ্ঞতাৰ সন্মুখীন হৈছে। আন্তৰ্জাতিক সংবাদ মাধ্যমৰ সূত্ৰ অনুসৰি টুইটাৰৰ আৰ্হিত সৃষ্টি কৰা চীনা মাইক্ৰ’ব্লগিং ছাইট ‘ৱেইবো’তো এই সন্দৰ্ভত আলোচনা কৰা হৈছে। ইপিনে চীনে দেশখনত জন্মৰ হাৰ বৃদ্ধি কৰিবলৈ এক নতুন নীতি প্ৰস্তুত কৰিবলৈ আগবাঢ়িছে। ৰাষ্ট্ৰপতি জি জিনপিঙে এই কথা ঘোষণা কৰে।
ৰাষ্ট্ৰপতি জি জিনপিঙে কয় যে নীতি নিৰ্দ্ধাৰণকাৰীসকল চিন্তিত যে চীনৰ জনসংখ্যা হ্ৰাসৰ ফলত বিশ্বৰ দ্বিতীয় সৰ্ববৃহৎ অৰ্থনীতি ক্ষতিগ্ৰস্ত হ’ব পাৰে।
তেওঁ কয়, “আমি জন্মৰ হাৰ বৃদ্ধি কৰিবলৈ এক নীতি প্ৰস্তুত কৰিম আৰু বয়সস্থ জনসাধাৰণৰ বাবে এক সক্ৰিয় ৰাষ্ট্ৰীয় কৌশল অনুসৰণ কৰিম।”
চীনৰ বৰ্তমানৰ জনসংখ্যা ১৪০ বিলিয়ন। অৱশ্যে এই বছৰ দেশত জন্মৰ হাৰ যথেষ্ট হ্ৰাস পাব যিটো এতিয়ালৈকে নথিভুক্ত কৰা সৰ্বনিম্ন অভিলেখ হ’ব পাৰে।
দেশখনৰ জনসংখ্যা তত্ত্ববিদসকলে জানিবলৈ দিয়া মতে যোৱা বছৰ চীনত ১ কোটি ৬০ লাখ শিশুৰ জন্ম হৈছিল। কিন্তু এই বছৰ ই ১ কোটিতকৈও কম হ’ব। ইপিনে, ২০২০ চনৰ তুলনাত জন্মৰ হাৰ ১১.৫ শতাংশ হ্ৰাস পাইছে।
উল্লেখ্য যে ১৯৮০ চনৰ পৰা ২০১৫ চনলৈ চীনত এক সন্তান নীতি কাৰ্যকৰী হৈছিল। জন্মৰ হাৰ হ্ৰাস হোৱা আৰু দেশৰ বৃদ্ধ জনসংখ্যা বৃদ্ধিৰ বাবে দেশখন ইয়াৰ পূৰ্বৰ স্থিতিৰ পৰা আঁতৰি আহিছে।
বৰ্তমান যদিও দেশত তিনিটা সন্তানৰ নীতি বলবৎ আছে, অৰ্থনৈতিক কাৰণত দেশত দম্পতীসকলৰ মাজত সন্তান জন্ম দিয়াৰ আকাংক্ষা হ্ৰাস পাইছে।
দেশ খনত লক্ষ্যণীয় ভাবে কমিছে বিবাহৰ সংখ্যাও।চীনত বিবাহৰ সংখ্যা ৩৬ বছৰৰ ভিতৰত নিম্নতম স্তৰত উপনীত হৈছে । চীনৰ ৰাষ্ট্ৰীয় পৰিসংখ্যা ব্যুৰোই প্ৰকাশ কৰা তথ্য অনুসৰি ২০১৩ আৰু ২০১৯ চনৰ ভিতৰৰ এই ছয় বছৰৰ সময়ছোৱাত চীনত বিবাহৰ সংখ্যা ৪১ শতাংশলৈ হ্ৰাস পাইছে।
বিগত বৰ্ষত দেশ খনৰ মাত্ৰ ৭.৬ নিযুত দম্পতীয়ে বিবাহৰ বাবে পঞ্জীয়ন কৰিছিল। এয়া যোৱা ৩৬ বছৰৰ ভিতৰত সৰ্বনিম্ন সংখ্যা। ফলস্বৰূপে চীনত জন্মৰ হাৰ প্ৰতি ১০০০ জন লোকৰ ভিতৰত ৭.৫ শতাংশলৈ হ্ৰাস পাইছে।দেশ খনত ২০২১ চনত বিবাহিত দম্পতীৰ পঞ্জীয়ন আঠ নিযুতৰ তললৈ হ্ৰাস পাইছিল।, যি সংখ্যা আছিল ১৯৮৬ চনৰ পিছত সৰ্বনিম্ন। নিম্ন জন্ম হাৰ আৰু হ্ৰাস হোৱা জনসংখ্যাই উদ্বেগ বৃদ্ধি কৰিছে চীনৰ চৰকাৰ।
এই গতিত চলি থাকিলে ২০২৫ চনৰ ভিতৰত দেশ খনৰ জনসংখ্যা বৃদ্ধিৰ হাৰ আৰু অধিক মন্থৰ হৈ পৰিব। চীনৰ অসামৰিক পৰিক্ৰমা বিকাশ দপ্তৰে প্ৰকাশ কৰা শেহতীয়া পৰিসাংখ্যিক বুলেটিন অনুসৰি ২০২১ চনত বিশ্বৰ আটাইতকৈ জনবহুল ৰাষ্ট্ৰ চীনত বিবাহ পাশত আৱদ্ধ হ’বলৈ কেৱল ৭.৬৪ নিযুত দম্পতীয়ে।
২০২০ চনৰ তুলনাত ২০২১ চনত বিবাহ পাশত আৱদ্ধ হোৱা দম্পতীৰ সংখ্যা ৬.১ শতাংশ হ্ৰাস পাইছে। তথ্যই দেখুৱাইছিল যে একেৰাহে অষ্টম বছৰৰ বাবে বিবাহৰ সংখ্যা হ্ৰাস পাইছে।যোৱা বছৰ বিবাহিত জনসংখ্যাৰ ভিতৰত ২৫ ৰ পৰা ২৯ বছৰ বয়সৰ লোকৰ সংখ্যা আছিল ৩৫.৩ শতাংশ, যি হাৰ ২০২০ চনৰ তুলনাত ০.৪ শতাংশ বেছি আছিল।
