তিনিচুকীয়া জিলাৰ কাকপথাৰত চুতীয়া ছাত্ৰ সন্থাই এক উত্তাল প্ৰতিবাদী কাৰ্যসূচী ৰূপায়ণ কৰে। যোৱা ২৬ জুলাইত অসম উচ্চ মাধ্যমিক শিক্ষা পৰিষদে জাৰি কৰা এক নিৰ্দেশত নৱম আৰু দশম শ্ৰেণীৰ ‘বৈচিত্ৰ্যময় অসম’ দ্ৰুতপাঠত চুতীয়া জনগোষ্ঠীৰ ইতিহাস অন্তৰ্ভুক্ত নকৰাৰ বাবেই আজি এই প্ৰতিবাদী কাৰ্যসূচী গ্ৰহণ কৰে।
প্ৰতিবাদকাৰী সকলে কাকপথাৰ হিন্দী হাইস্কুলৰ সন্মুখৰ পৰা ছেবাৰ অধ্যক্ষৰ প্ৰতিকী শৱদেহ কাকপথাৰ থানা চাৰিআলিলৈ কঢ়িয়াই নি উক্ত স্থানত দাহ কৰি প্ৰতিবাদ সাব্যস্ত কৰে।
সন্থাই ছেবাৰ নিৰ্দেশৰ প্ৰতিলিপিও দাহ কৰে আৰু ২৬ জুলাইৰ নিৰ্দেশ উঠাই লৈ চুতীয়া জনগোষ্ঠীক অন্তৰ্ভুক্ত কৰাৰ দাবী জনায়।
জনগোষ্ঠীয় ছাত্ৰ সংগঠনটোৰ সদস্য সকলে বৈচিত্ৰ্যময় অসমত চুতীয়া সকলক অন্তৰ্ভুক্ত কৰক, শিক্ষা বিভাগ হায় হায়, ছেবাৰ কাম নাই আদি ধ্বনিৰে পৰিবেশ উত্তাল কৰি তোলে।
ইফালে জনগোষ্ঠীয় ছাত্ৰ সংগঠনটোৰ কাকপথাৰ আঞ্চলিক সমিতিৰ সভাপতি সুনীল চুতীয়া আৰু সম্পাদক সত্যব্ৰত চুতীয়াই ছেবাৰ এনে কাৰ্যক তীব্ৰ প্ৰতিক্ৰিয়া প্ৰকাশ কৰি শীঘ্ৰেই চুতীয়া জনগোষ্ঠীকো পাঠ্যক্ৰমত অন্তৰ্ভুক্ত কৰাৰ দাবী জনায়।
উল্লেখ্য যে, অসমৰ আদিম ভূমিপুত্ৰ চুতীয়া জনগোষ্ঠীক অৱমাননা কৰি ৰাজ্যখনৰ ছয়টাকৈ জনগোষ্ঠীক অন্তৰ্ভুক্ত কৰি বৈচিত্ৰ্যময় অসম নামেৰে ছেবাই এই বৰ্ষৰ পৰা এক নতুন দ্ৰুত পাঠ প্ৰৱৰ্তন কৰিছে।
