বিজেপিক মিথ্যাচাৰী দল আখ্যাৰে আগন্তুক নিৰ্বাচনত দলটোক চুতীয়া অধ্যুষিত সমষ্টিত প্ৰত্যাখান কৰাৰ হুংকাৰ প্ৰদান কৰিছে সদৌ অসম চুতীয়া ছাত্ৰ সন্থা আৰু চুতীয়া যুৱ সন্মিলন অসমে |
শনিবাৰে দিছপুৰ প্ৰেছ ক্লাবত দুয়োটা সংগঠনে এক যৌথ সংবাদমেল সম্বোধন কৰি চুতীয়া ছাত্ৰ সন্থাৰ সভাপতি মহেন বৰাই আগন্তুক বিধানসভাৰ নিৰ্বাচনত বিজেপি প্ৰাৰ্থী তালিকাত চুতীয়া জনগোষ্ঠী অধ্যুষিত সমষ্টিত জনগোষ্ঠীটোৰ প্ৰাৰ্থীক অগ্ৰাধিকাৰ নিদিয়াত ক্ষোভ প্ৰকাশ কৰে |
তেওঁ কয়, ‘পূৰ্বৰ কংগ্ৰেছৰ দৰেই বিজেপিয়ে চুতীয়া জনগোষ্ঠীক ৰাজনৈতিকভাৱে হত্যা কৰাৰ ষড়যন্ত্ৰ ৰচনা কৰিছে | বিশেষকৈ ৬০ শতাংশৰো অধিক চুতীয়া জনগোষ্ঠীৰ ভোটাৰ থকা গোলাঘাট, সৰুপথাৰ, তিতাবৰ, টিয়ক, আমগুৰি আৰু লখিমপুৰ এটা সমষ্টিটো বিজেপিয়ে জনগোষ্ঠীৰ প্ৰাৰ্থীক অগ্ৰাধিকাৰ প্ৰদান নকৰি জনগোষ্ঠীক প্ৰতাৰণা কৰিছে |”
ইয়াৰ ফল বিজেপিয়ে আগন্তুক নিৰ্বাচন ভোগ কৰিব লাগিব বুলি তেওঁ সকিয়াই দিয়ে।
উল্লিখিত সমষ্টিকেইটাত জনগোষ্ঠীটোৰ একক সংখ্যাগৰিষ্ঠা থকা উপৰি যোৰহাট, মাহমৰা, মৰাণ, নাহকটীয়া, শদিয়া, লাহোৱাল, বিহপুৰীয়া, গহপুৰ, খুমটাই, মৰিয়নি, ডিগবৈ, জোনাই, ধেমাজি, ঢকুৱাখানা আৰু বৰাকৰ বদপুৰ বিধানসভা সমষ্টিত নিৰ্ণায়ক ভূমিকা গ্ৰহণ কৰি অহা বুলি বৰাই জানিবলৈ দিয়ে |
এনেক্ষেত্ৰত শাসকীয় বিজেপিয়ে জনগোষ্ঠীৰ প্ৰাৰ্থীক অগ্ৰাধিকাৰ প্ৰদান নকৰাতো দুৰ্ভাগ্যজনক আখ্যা দিয়ে বৰাই।
তেওঁ পুনৰ কয় “প্ৰতাৰক বিজেপিক আগন্তক নিৰ্বাাচনত উৎখাত কৰাৰ লক্ষ্য লৈছে চুতীয়া জনগোষ্ঠীয়ে | আমি বিজেপিত থকা জনগোষ্ঠীটোৰ সকলো নেতা-কৰ্মীক বিজেপি দল ত্যাগ কৰিবলৈ আহ্বান জনাইছো |”
অন্যান্য ৰাষ্ট্ৰীয় ৰাজনৈতিক দল আৰু আঞ্চলিক দল সমূহক চুতীয়া অধ্যুষিত সমষ্টিত জনগোষ্ঠীটোক সন্মান প্ৰদৰ্শন কৰিবলৈ চুতীয়া ছাত্ৰ সন্থাৰ সভাপতিজনে আহ্বান জনায় অন্যথা বিকল্প ৰাজনৈতিক চিন্তা কৰা হুংকাৰ প্ৰদান কৰে ৷
ইফালে, চুতীয়া অধ্যুষিত সমষ্টিত বিজেপিক জনগোষ্ঠীটোৰ প্ৰাৰ্থিত্ব দিবলৈ অনুৰোধ জনোৱাৰ পাছতো বিজেপিয়ে গুৰুত্ব নিদিয়াৰ অভিযোগ তুলি চুতীয়া যুৱ সন্মিলনৰ সম্পাদক নৃপেন খনিকৰে আগন্তুক নিৰ্বাচনত বিজেপিক প্ৰত্যুত্তৰ দিয়া হ’ব বুলি হুংকাৰ প্ৰদান কৰে |