অসমৰ সংগীত জগতৰ প্ৰাণস্পন্দন জুবিন গাৰ্গৰ ৰহস্যজনক মৃত্যুৰ তদন্ত অব্যাহত ৰাখি অপৰাধ অনুসন্ধান বিভাগে সমগ্ৰ গুৱাহাটীত একাধিক অভিযান চলাইছে আৰু গোচৰৰ সৈতে জড়িত কেইবাজনো ব্যক্তিক আটক কৰিছে।
বৃহস্পতিবাৰে চিআইডিৰ বিষয়াসকলে গীতানগৰৰ শ্যামকানু মহন্তৰ বাসগৃহত অভিযান চলাই বাসৃহটো জব্দ কৰি ৭টা মোবাইল ফোন, দুটা লেপটপ, ৯টা হাৰ্ড ড্ৰাইভ, কেইবাটাও পেন ড্ৰাইভ, এটা চিপিইউ, আৰু চৰকাৰী নথি-পত্ৰকে ধৰি ডিজিটেল প্ৰমাণৰ উৎস উদ্ধাৰ কৰে।
তথ্যপাতিসমূহ উদ্ধাৰ কৰাৰ পিছত কৰ্তৃপক্ষই সম্পত্তিটো জব্দ কৰে যদিও মহন্তৰ অৱস্থান এতিয়াও জানিব পৰা হোৱা নাই।
আনুষংগিক এক অভিযানত চিআইডিৰ জোৱানৰ সৈতে বিশেষ তদন্তকাৰী দলে (এছআইটি) শেখৰজ্যোতিৰ বাসগৃহত সাত ঘণ্টীয়া অভিযান চলাই ডিজিটেল ষ্ট’ৰেজ ডিভাইচ আৰু কাগজ-পত্ৰৰ একেধৰণৰ উৎস জব্দ কৰে। পিছত বিষয়াসকলে নিশ্চিত কৰে যে তেওঁলোকে শেখৰজ্যোতিক জেৰাৰ বাবে জিম্মাত লৈছিল।
সূত্ৰসমূহে প্ৰকাশ কৰিছে যে ২০২৫ চনৰ ১৯ ছেপ্টেম্বৰত ছিংগাপুৰত, ৫২ বছৰ বয়সত জুবিন গাৰ্গৰ আকস্মিক মৃত্যুৰ তদন্তৰ সৈতে এই অভিযানসমূহৰ প্ৰত্যক্ষ সম্পৰ্ক আছে।
ৰহস্যজনক পৰিস্থিতিত প্ৰিয় কণ্ঠশিল্পীগৰাকীৰ বিয়োগে অসমত শোকৰ জোৱাৰ তুলিছে। ইপিনে, কৰ্তৃপক্ষই সত্য উন্মোচন কৰাৰ প্ৰতিশ্ৰুতি দিছে।
সমগ্ৰ ঘটনা প্ৰবাহ জুবিন গাৰ্গৰ দীৰ্ঘদিনীয়া মেনেজাৰ সিদ্ধাৰ্থ শৰ্মাৰ সৈতে জড়িত। চিআইডিৰ বিষয়াসকলে সন্দেহ কৰিছে যে শৰ্মাৰ হাতত গুৰুত্বপূৰ্ণ তথ্য আছে যিয়ে এই ৰহস্য উন্মোচন কৰাত সহায় কৰিব পাৰে।
শিল্পীগৰাকীৰ মৃত্যুৰ মাত্ৰ তিনিদিন পিছতে শৰ্মাৰ পৰিয়ালে হঠাতে ধীৰেণপাৰাৰ অৰ্কিড হিলভিউ এপাৰ্টমেণ্টত থকা ফ্লেট খালী কৰাৰ কথাটোৱে অঞ্চলটোৰ স্থানীয় লোকসকলৰ মাজত কৌতুহল বৃদ্ধি কৰিছে।
চুবুৰীয়াসকলে এই প্ৰস্থান আকস্মিক আৰু সন্দেহজনক বুলি বৰ্ণনা কৰাৰ পিছত চিআইডিৰ বিষয়াসকলে ২০১৯ চনৰ পৰা পৰিয়ালটোৱে বাস কৰা ফ্লেট ৩এ-ত অভিযান চলায়।
দণ্ডাধীশৰ তত্বাৱধানত দলটোৱে কেইবা ঘণ্টা ধৰি আৰ্থিক আৰু আনুষংগিক প্ৰমাণ বিচাৰি অভিযান চলাইছিল।
কৰ্তৃপক্ষই যদিও কোনো ধৰণৰ তথ্যপাতি জব্দ হোৱাৰ কথা নিশ্চিত কৰা নাই, তথাপিও পৰিয়ালটোৰ ৰহস্যজনক নিৰুদ্দেশত ৰাজহুৱা জল্পনা-কল্পনা তীব্ৰতৰ হৈ পৰিছে।
একেটা অভিযানৰ অংশ হিচাপে শৰ্মাৰ বাসগৃহত চলোৱা আৰক্ষীৰ অভিযানৰ সময়ত ধীৰেনপাৰাত উত্তেজনাৰ সৃষ্টি হয়। প্ৰতিবাদকাৰীয়ে নিৰাপত্তাৰক্ষীৰ সৈতে সংঘৰ্ষত লিপ্ত হয়, আৰক্ষীৰ ওপৰত শিলগুটি নিক্ষেপ কৰে।
ইয়াৰ প্ৰত্যুত্তৰত জনতাক ছত্ৰভংগ দিয়াবলৈ আৰক্ষীয়ে লাঠি চালনা কৰে। অভিযানৰ সময়ত আৰক্ষী বিষয়াক আক্ৰমণ কৰাৰ অভিযোগত ভিক্টৰ দাস আৰু অজয় ফুকনকে ধৰি ছয়জন ব্যক্তিক আটক কৰে।
ইফালে মুখ্য তদন্তকাৰী বিষয়া ৰজি কলিতাই নিশা ৮:৩০ বজাত মুখ্যমন্ত্ৰী হিমন্ত বিশ্ব শৰ্মাক শেহতীয়া পৰিস্থিতিৰ বিষয়ে অৱগত কৰাৰ সম্ভাৱনা আছে।
সূত্ৰসমূহে প্ৰকাশ কৰিছে যে মুখ্যমন্ত্ৰীয়ে বৈঠকৰ পিছতে চলি থকা তদন্তৰ মূল সবিশেষ জনসাধাৰণৰ আগত প্ৰকাশ কৰিব পাৰে।
তদন্ত আগবঢ়াৰ লগে লগে চিআইডিৰ এই পদক্ষেপে নিৰীক্ষণৰ অধীনত থকা ব্যক্তিৰ ব্যাপক নেটৱৰ্কৰ ইংগিত দিয়ে।
সমন্বিত অভিযান, আটক আৰু সিদ্ধাৰ্থ শৰ্মাৰ পৰিয়ালৰ পলায়নে জুবিন গাৰ্গৰ অকাল মৃত্যুক লৈ গুৰুতৰ প্ৰশ্নৰ উত্থাপন কৰিছে।
২৩ ছেপ্টেম্বৰত সম্পূৰ্ণ ৰাজ্যিক সন্মানেৰে দাহ কৰা জুবিন গাৰ্গৰ উত্তৰাধিকাৰ লাখ লাখ লোকৰ হৃদয়ত প্ৰতিধ্বনিত হৈ আছে। প্ৰাণৰো প্ৰাণৰ শিল্পীগৰাকীৰ ন্যায়ৰ বাবে উন্মুখ হৈ ৰৈছে শোকাহত জনতা।
