এটাৰ পাছত আন এটা বেমাৰৰে লেথা নিচিঙা SI কেলেংকাৰিৰ মুল অভিযুক্ত অক্ষয় চান্দ বৈদ্য চি আই ডিৰ জালত পৰিল।
এছ আই পৰীক্ষা অনুষ্ঠিত কৰাৰ এটা অন্যতম প্ৰতিষ্ঠান অক্ষয় টেলিকমিউনিকেশ্যনৰ স্বত্বাধিকাৰী অক্ষয় চান্দ বৈদ্যই বহু দিন ধৰি বিভিন্ন ৰোগ হোৱা বুলি অজুহাত দেখুৱাই প্ৰথমে মাৰোৱাৰী মেটাৰনিটী হাস্পতাল আৰু তাৰ পাছত মহানগৰীৰ এপ’ল’ হাস্পতালত চিকিৎসাধীন হৈ আছিল।
আজি বিয়লিভাগত এপ’ল’ হাস্পতালৰ পৰা যাবলৈ দিয়াৰ সময়তে চিআইডিৰ এটা দলে গ্ৰেপ্তাৰ কৰে অক্ষয়ক।
গ্ৰেপ্তাৰ কৰিয়েই পোনে পোনে কামৰূপ মুখ্য ন্যায়িক দণ্ডাধীশৰ আদালতত হাজিৰ কৰোৱা হয় অক্ষয়ক।
চিআইডিয়ে আদালতত ৬ দিনৰ বাবে বৈদ্যক নিজৰ জিম্মাত বিচাৰিব যদিও আদালতে কিমান দিনৰ জিম্মাত দিব সেয়া বৰ্তমানলৈকে সিদ্ধান্ত হোৱা নাই।
বাতৰি সংগ্ৰহ কৰাৰ সময়লৈকে আদালতৰ ভিতৰতে আছিল অক্ষয় চান্দ বৈদ্য।
উল্লেখযোগ্য যে, প্ৰথমে বমি আৰু ভৰিৰ বিষৰ বাবে মাৰোৱাৰী মেটাৰনীটি হাস্পতালত ভৰ্তি হৈছিল অক্ষয় চান্দ বৈদ্য। তাৰ পাছতেই উন্নত চিকিৎসাৰ বাবে খ্ৰীষ্টানবস্তিস্থিত এপ’ল’ হাস্পতালত ভৰ্তি হৈছিল অক্ষয় চান্দ।
অভিযোগ অনুসৰি SI কেলেংকাৰীত জড়িত থকা বুলি পোহৰলৈ অহাৰ পাছতেই অক্ষয় চান্দৰ বঙাইগাঁৱৰ বাসগৃহত চিআইডিয়ে তদন্ত চলাইছিল। কিন্তু তাৰ কেইঘন্টামান পাছতে ৰহস্যজনকভাৱে বিতৰ্কিত ব্যৱসায়ীজনৰ গুদামঘৰত অগ্নিকাণ্ড সংঘটিত হয়।
অভিযোগ উঠিছে যে SI কেলেংকাৰিৰ নথি-পত্ৰ বা প্ৰমাণ নষ্ট কৰাৰ বাবেই এই অগ্নিকাণ্ডৰ ঘটনা সংঘটিত কৰিছিল অক্ষয় চান্দে নিজে।
এতিয়া সমগ্ৰ বিষয় ৰহস্যৰ আৱৰ্তত সোমাই পৰিছে। চিআইডিৰ তদন্তৰ অন্তত সকলো কথা পোহৰলৈ আহিব।