দেশত এগৰাকী মহিলাকৰ্মীয়ে কথা কৈ থকাৰ মাজতে চিআইএছএফৰ বিষয়াক চৰ সোধোৱা ঘটনা সংঘটিত হৈছে৷ইতিমধ্যে জয়পুৰ বিমানবন্দৰৰ চিচিটিভি ফুটেজ ছ’চিয়েল মিডিয়াত ভাইৰেল হৈ পৰিছে। খবৰ ওলাইছে যে মহিলাগৰাকীয়ে স্পাইচজেট এজেন্সীত কাম কৰি আছিল। কিন্তু কি কাৰণে তেওঁ কিয় কৰিছিল সেয়া জানিব পৰা হোৱা নাই৷ইফালে সমগ্ৰ ঘটনা সন্দৰ্ভত চিআইএছএফে তদন্তৰ দাবী জনাইছে।
ইতিমধ্যে গ্ৰেপ্তাৰ কৰা হৈছে মহিলা কৰ্মী অনুৰাধা ৰাণীক। চিআইএছএফৰ মতে, বিমানবন্দৰৰ নিৰাপত্তাৰক্ষীৰ গেট এখনৰ জৰিয়তে অনুমতি অবিহনে অনুৰাধাই প্ৰৱেশ কৰিবলৈ ওলাইছিল। তেতিয়াই তেওঁক ডিউটি অফিচাৰ গিৰিৰাজ প্ৰসাদৰ সৈতে এঠাইত আবদ্ধ কৰা হৈছিল। ইয়াৰ পাছতে মহিলাগৰাকীয়ে গিৰিৰাজক আঘাত কৰে। সেই সময়ত কোনো মহিলা চিআইএছএফৰ কৰ্মী উপস্থিত নাছিল বাবে মহিলাগৰাকীক ৰখাই থোৱা বুলি চিআইএচএফে উল্লেখ কৰিছে। অৱশ্যে বিমান কৰ্তৃপক্ষই আৰু বিমানকৰ্মীয়ে এই অভিযোগ নস্যাৎ কৰিছে৷
ইপিনে চিআইএচএফৰ বিষয়াৰ বিৰুদ্ধে অভিযোগ কৰা হৈছে যে তেওঁ মহিলা কৰ্মীগৰাকীক যৌন নিৰ্যাতন চলাবলৈ চেষ্টা কৰিছিল! বিমানবন্দৰ কৰ্তৃপক্ষই দাবী কৰে যে মহিলা কৰ্মীগৰাকীৰ হাতত বৈধ এণ্ট্ৰি কাৰ্ড আছিল। কিন্তু তেতিয়াও গিৰিৰাজে তেওঁক আবদ্ধ কৰি বেয়া মন্তব্য কৰিলে। অৱশ্যে বিষয়াগৰাকীয়ে অভিযোগসমূহক মিছা বুলি খাৰিজ কৰে।
