ভাৰতৰ সাম্প্ৰতিক সময়ত সংবিধান দিৱসৰ তাৎপৰ্য কি? যিসকলে ভাৰতৰ স্বাধীনতা আন্দোলনৰ বিষয়ে জানে তেওঁলোকে ভাৰতৰ সংবিধানৰ উৎপত্তিৰ পটভূমিটোও বুজি পায়। ‘প্ৰস্তাৱনা’ আৰু ‘মৌলিক অধিকাৰ’ক সংবিধানখনৰ আত্মা বুলি কোৱা হয়। কিন্তু যোৱা দহ বছৰে আমি দেখিছোঁ কি? সুপৰিকল্পিত আৰু পদ্ধতিগতভাৱে মোদী চৰকাৰে সংবিধানৰ উদ্দেশ্য আৰু লক্ষ্যৰ উলঙ্ঘা কৰি আহিছে। এই ক্ষেত্ৰত আমাৰ চকুৰ আগত জলজল পটপট হৈ থকা তিনিটা ঘটনাৰ কথা আমি উল্লেখ কৰিব পাৰোঁ। তাৰে প্ৰথমটো হৈছে মণিপুৰৰ ভাতৃঘাতী সংঘৰ্ষ। এবছৰ আগতে ৰাজ্য চৰকাৰৰ প্ৰৰোচনাতে দুটা সম্প্ৰদায়ৰ মাজত আৰম্ভ হোৱা সংঘৰ্ষই আমাৰ চকুৰ আগতে ৰাজ্যখন চাৰখাৰ কৰি পেলালে। অথচ মোদী চৰকাৰ নিৰ্বিকাৰ।
প্ৰধানমন্ত্ৰী মোদীৰ এনে মনোভাব যেন মণিপুৰত ক’তো একো হোৱাই নাই।দ্বিতীয় কথাটো হৈছে আদানীৰ দুৰ্নীতি আৰু বিত্তীয় খেলিমেলি। যোৱা সময়ছোৱাত বিৰোধীক দুৰ্বল কৰাৰ এটা ডাঙৰ কৌশল হ’ল ধনাঢ্য বিৰোধী ৰাজনীতিকৰ বিৰুদ্ধে হোৱাই নোহোৱাই ই ডি , চি বি আই লগাই দি হয় তেওঁলোকক বি জে পিৰ ফলীয়া কৰা নহয় তেওঁলোকক জেললৈ নিক্ষেপ কৰি তেওঁলোকৰ লগতে তেওঁলোকৰ দলটোক দুৰ্বল কৰা। কিন্তু আদানীৰ বিৰুদ্ধে এতিয়ালৈকে অৰ্থনৈতিক অপৰাধৰ ইমান অভিযোগ উঠিছে, অথচ সেই সম্পৰ্কে চৰকাৰ নিৰ্বিকাৰ। যোৱা বছৰ হিন্দেনবাৰ্গ ৰিচাৰ্চে আদানীৰ বৃহৎ বিত্তীয় খেলিমেলি আৰু দুৰ্নীতিৰ বিৰুদ্ধে বিশদ তথ্য-পাতি সদৰি কৰি এক প্ৰতিবেদন প্ৰকাশ কৰিছিল।তাক লৈ কিমান দিনলৈ সদন উত্তাল হৈ আছিল।ঘটনা গৈ উচ্চতম ন্যায়ালয় পাইছিল।
চেবিক উচ্চতম ন্যায়ালয়ে গোটেই ঘটনাটোৰ তদন্ত কৰি প্ৰতিবেদন দিবলৈ কৈছিল।কিন্তু আদানীৰ হাতৰ মুঠিত থকা চেবিয়ে বহুদিনলৈ তদন্তটো পিছুৱাই ৰাখি মূৰকত আদানীৰ সপক্ষেই ৰায় দিছিল। উচ্চতম ন্যায়ালয়েও তেনেকৈয়ে বিষয়টো সামৰি থৈছিল।এতিয়া সৌসিদিনা আদানীয়ে সৌৰ শক্তিৰ ঠিকা পাবলৈ ভাৰত চৰকাৰৰ শীৰ্ষ বিষয়াক ২২০০ কোটি টকাৰ উৎকোচ দিয়া কাৰণে আমেৰিকাৰ যুক্তৰাষ্ট্ৰীয় আদালতে গৌতম আদানী, সাগৰ আদানী আৰু আদানী গ্ৰুপৰ কাৰ্যবাহী বিষয়াৰ বিৰুদ্ধে গ্ৰেপ্তাৰী পৰোৱানা জাৰি কৰিছে।যদিহে আদানীৰ সৌৰ শক্তিৰ প্ৰকল্পত আমেৰিকাৰ বিনোয়োগকাৰীৰ ধন নাথাকিলহেঁতেন তেন্তে সেই সম্পৰ্কেও আমি একোৱেই নাজানিলোহেঁতেন। কিন্তু আমেৰিকাৰ বিনিয়োগকাৰী জড়িত হৈ আছে বুলিয়ে এতিয়া জোলোঙাৰ মেকুৰী ওলাই পৰিছে। যি নৰেন্দ্ৰ মোদী চৰকাৰে অৰ্থনৈতিক অপৰাধৰ দোহাই দি হোৱাই নোহোৱাই বিৰোধী ৰাজনৈতিক নেতাৰ বিৰুদ্ধে ই ডি, চি বি আই লগাই দিয়ে, সেই নৰেন্দ্ৰ মোদী চৰকাৰ কিন্তু আদানীৰ বিৰুদ্ধে গ্ৰেপ্তাৰী পৰোৱানা জাৰি হোৱাৰ পিছতো আদানী সম্পৰ্কে এতিয়ালৈকে নীৰৱ, নিশ্চুপ।পক্ষপাতিত্বৰ ইয়াতকৈ আৰু কি ডাঙৰ উদাহৰণ লাগে? তৃতীয় আৰু শেহতীয়া ঘটনাটো হৈছে মহাৰাষ্ট্ৰৰ নিৰ্বাচন। কি কৌশলেৰে এন চি পি আৰু শিৱসেনাক দুভাগ কৰি বিজেপিয়ে উদ্ধৱ থাকৰেক মুখ্যমন্ত্ৰী পদৰ পৰা আঁতৰাই সিন্ধেক মুখ্যমন্ত্ৰী পাতিছিল সেই কলংক কাহিনী আমি সকলোৱে জানো।কিন্তু যোৱা লোকসভা নিৰ্বাচনৰ সময়ত মহাৰাষ্ট্ৰৰ জনসাধাৰণে বিজেপিক তাৰ উচিত প্ৰত্যুত্তৰ দিছিল।
সেইবাবে এতিয়া জনসাধাৰণকো চেৰাই গৈ ৰাষ্ট্ৰযন্ত্ৰ, নিৰ্বাচন আয়োগ আৰু ধনবলৰ যোগেদি অভাবনীয়ভাৱে বিজেপি মহাযুঁটি চৰকাৰে বিধানসভা নিৰ্বাচনত নিজৰ সাফল্য দেখুৱাইছে।এইটো হৈছে এতিয়া আমাৰ দেশৰ গণতন্ত্ৰৰ অৱস্থা।আৰু অসমত আমি কি দেখিছোঁ? এইখন হৈছে গছকটাৰ উৎসৱ পতা চৰকাৰ।বিকাশৰ নামত ৰাজ্যখনৰ সম্পদ বনিয়াক গতাই দি আমাৰ সমূহীয়া বিনাশ মাতি অনা চৰকাৰ, যিখন চৰকাৰত মুখ্যমন্ত্ৰীৰ মুখৰ কথাই আইন।আমাৰ দেশ আৰু ৰাজ্যত এই অন্ধকাৰ শাসনৰ কেতিয়া ওৰ পৰিব কোনেও ক’ব নোৱাৰে। সমুখৰ পথ জটিল আৰু কাইটীয়া। কিন্তু বিকল্প এটাই – এই নৈৰাজ্য আৰু অপশাসনৰ বিৰুদ্ধে জনসাধাৰণৰ ঐক্যবদ্ধ আন্দোলন। এই আন্দোলনৰ নেতৃত্ব দিব লাগিব বিৰোধী ৰাজনৈতিক দলে। আজিৰ সংবিধান দিৱসৰ সেইটোৱেই সংকল্প হোৱা উচিত।
অসম নাগৰিক সমাজ আৰু ভাৰত জোড়ো অভিযান, অসম
(টোকাঃ এয়া এক প্ৰেছ বিবৃত্তিহে৷ইয়াত নৰ্থইষ্ট নাওৰ কোনো প্ৰত্যক্ষ অথবা পৰোক্ষ সম্পৰ্ক নাই৷তদুপৰি উক্ত দুয়োটা সংগঠনৰ সমৰ্থনো নৰ্থইষ্ট নাৱে নকৰে৷)
