নাগৰিকত্ব সংশোধনী বিধেয়কৰ বিৰুদ্ধে দেশৰ বিৰোধী শক্তি সমূহক একত্ৰিত কৰাৰ উদ্দেশ্যেৰে দিল্লী আৰু কলকাতাত কেইবাটাও ৰাজনৈতিক দলৰ নেতাৰ সৈতে প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই আলোচনাত মিলিত হয়।
শুকুৰবাৰে তেওঁ নতুন দিল্লীত প্ৰাক্তন কেন্দ্ৰীয় মন্ত্ৰী যশোৱন্ত সিনহা আৰু ৰাজ্যসভাৰ সাংসদ শাৰদ যাদৱৰ সৈতে পৃথকে পৃথকে মিলিত হোৱাৰ পিছত কলকাতালৈ আহি অন্ধ্ৰ প্ৰদেশৰ মুখ্য মন্ত্ৰী চন্দ্ৰবাবু নাইডুক সাক্ষাৎ কৰে।
উল্লেখযোগ্য যে অসম তথা উত্তৰ-পূৰ্বৰ বিভিন্ন দল-সংগঠন আৰু খিলঞ্জীয়া ৰাইজে তীব্ৰ বিৰোধিতা কৰি থকাৰ পিছতো বিজেপিয়ে ইতিমধ্যে নাগৰিকত্ব সংশোধনী বিধেয়ক লোকসভাত গৃহীত কৰাইছে। বিধেয়কখন এতিয়ালৈ ৰাজ্যসভাত গৃহীত হোৱা নাই যদিও ৩১ জানুৱাৰিৰ পৰা হ’বলগীয়া ৰাজ্যসভাৰ অধিৱেশনত বিজেপিয়ে ইয়াক উত্থাপন কৰি গৃহীত কৰোৱাৰ সম্ভাৱনা আছে।
গতিকে ইয়াৰ প্ৰাক-মূহুৰ্তত বিৰোধী পক্ষৰ এই নেতাকেইজনৰ সৈতে প্ৰফুল্ল মহন্ত মিলিত হোৱাটো তাৎপৰ্যপূৰ্ণ হিচাপে বিবেচিত হৈছে। কিয়নো বিধেয়কখন লোকসভাত গৃহীত হ’ল যদিও ৰাজ্যসভাত বিজেপিৰ সংখ্যগৰিষ্ঠতা নাই। গতিকে বিধেয়কখন ৰাজ্যসভাত গৃহীত কৰোৱাৰ ক্ষেত্ৰত বিজেপি অসুবিধাৰ সন্মুখীন হ’ব। তেনে সময়ত বিৰোধীৰ ঐক্যবদ্ধ শক্তিয়ে এইক্ষেত্ৰত বিশেষভাৱে গুৰুত্ব লাভ কৰিব।
‘কেন্দ্ৰৰ বিজেপি নেতৃত্বাধীন চৰকাৰৰ বিৰোধী ৰাজনৈতিক দলসমূহৰ পৰা নাগৰিকত্ব সংশোধনী বিধেয়কৰ বিৰুদ্ধে সহমতত উপনীত হোৱাৰ বাবেই তেওঁলোকৰ সৈতে আলোচনাত মিলি হৈছো’, প্ৰফুল্ল কুমাৰ মহন্তই নৰ্থ-ইষ্ট নাওক কয়।
উল্লেখযোগ্য যে, আজি কলকাতাত পশ্চিমবংগৰ মুখ্য মন্ত্ৰী মমতা বেনাৰ্জীৰ আহ্বানত অনুষ্ঠিত বিজেপি বিৰোধী বিশাল সমাবেশত অংশগ্ৰহণৰ বাবে চন্দ্ৰবাবু নাইডু কলকাতাত উপস্থিত হৈছিল।
অৱশ্যে মহন্ত কালিৰ পৰা কলকাতাত আছিল যদিও আজি তাত অনুষ্ঠিত সমাবেশত তেওঁ অংশ লোৱা নাই বুলি নৰ্থ-ইষ্ট নাওক জানিবলৈ দিয়ে।