গোলাঘাট নিৰ্বাচন জিলাৰ অধীনৰ ৯৫ নং গোলাঘাট আৰু ৯৬ নং খুমটাই সমষ্টিত ভোটগ্ৰহণ প্ৰক্ৰিয়াত নিয়োজিত অসামৰিক আৰু আৰক্ষী বিষয়াসকলৰ মঙলবাৰে এখন যুটীয়া বৈঠক অনুষ্ঠিত হয়।
গোলাঘাটৰ সতী সাধনী কলাক্ষেত্ৰৰ প্ৰেক্ষাগৃহত অনুষ্ঠিত সভাত গোলাঘাট জিলাৰ আৰক্ষী অধীক্ষক পুষ্পৰাজ সিঙে ভোটগ্ৰহণত নিয়োজিত আৰক্ষী আৰু অসামৰিক বিষয়াসকলক সহযোগিতাৰে কাম কৰিবলৈ আহ্বান জনায়।
আৰক্ষী আৰু অসামৰিক খণ্ডৰ চেক্টৰ আৰু জ’নেল বিষয়াসকলৰ মাজত সু-সমন্বয় ৰক্ষা কৰিব পাৰিলেহে সমগ্ৰ প্ৰক্ৰিয়াটো সুচাৰুৰূপে সম্পন্ন হ’ব বুলি তেওঁ মত প্ৰকাশ কৰে।
তেওঁ কয় যে নাগালেণ্ডৰ সৈতে থকা সীমান্ত অঞ্চলৰ লগতে জটিল ভোটগ্ৰহণ কেন্দ্ৰসমূহত অৰ্ধ সামৰিক বাহিনী নিয়োগ কৰা হ’ব। প্ৰতিটো ভোটগ্ৰহন কেন্দ্ৰত নিৰাপত্তা ব্যৱস্থা সুনিশ্চিত কৰা হ’ব বুলি তেওঁ দৃঢ়তাৰে প্ৰকাশ কৰে।
সিঙে লগতে যিকোনো আইন শৃংখলাজনিত পৰিস্থিতিত আৰক্ষীৰ নিয়ন্ত্ৰণ কক্ষৰ নম্বৰ ০৩৭৭৪-২৮৫০৩৩ আৰু ৬০২৬৯-০০৫৩৩ ত যোগাযোগ কৰিবলৈ আহ্বান জনায়।
অনুষ্ঠানত অংশ লৈ জিলা উপায়ুক্ত তথা জিলা নিৰ্বাচন বিষয়া বিভাষ চন্দ্ৰ মোদীয়ে বিষয়াসকলক নিজৰ ভোটগ্ৰহণ কেন্দ্ৰ আৰু তাত নিয়োজিত অন্য বিষয়া-কৰ্মচাৰীসকলৰ বিষয়ে জানিবলৈ আৰু বিতং তথ্যৰ বাবে “প’ল সম্পৰ্ক” নামৰ মোবাইল এপ ব্যৱহাৰ কৰিবৰ বাবে আহ্বান জনায়।
ভোটগ্ৰহণ কেন্দ্ৰৰ ১০০ মিটাৰ ব্যাসাৰ্ধৰ ভিতৰত যাতে কোনো ধৰণৰ অপ্ৰয়োজনীয় ভিৰ নহয়, সেইয়া সুনিশ্চিত কৰিবলৈ তেওঁ বিষয়াসকলৰ প্ৰতি পৰামৰ্শ আগবঢ়ায়।
সমগ্ৰ প্ৰক্ৰিয়াটোত কোভিড-১৯ৰ নীতি-নিৰ্দেশনাসমূহ যাতে পালন কৰা হয়, তাৰ বাবেও সজাগ হ’বলৈ তেওঁ বিষয়াসকলক নিৰ্দেশ দিয়ে।
অনুষ্ঠানটোৰ আঁত ধৰে অতিৰিক্ত উপায়ুক্ত ৰক্তিম বৰুৱাই। সভাত জিলা পৰিষদৰ মুখ্য কাৰ্যবাহী বিষয়া অভিজিৎ বৰুৱা আৰু বিভিন্ন বাহিনীৰ কমাণ্ডাৰসকলৰ লগতে জিলা প্ৰশাসন আৰু আৰক্ষী প্ৰশাসনৰ ভালেমান বিষয়া উপস্থিত আছিল।