দেশৰ মুখ্য ন্যায়াধীশ ৰঞ্জন গগৈয়ে কেন্দ্ৰীয় অনুসন্ধান সংস্থা (চিবিআই)ক উচ্চতম ন্যায়ালয়ৰ নথি পঞ্জীয়নত (ৰেজিষ্ট্ৰী) তেওঁলোকৰ বিষয়া নিয়োগ কৰিবলৈ নিৰ্দেশ দিছে। এই কথা নিশ্চিত কৰিছে চিবিআইৰ সঞ্চালক ঋষি কুমাৰ শুক্লাই।
‘’উচ্চতম ন্যায়ালয়ে আমাক ডেপুটেশ্যনত বিষয়া পঠাবলৈ নিৰ্দেশ দিছে,’’-শুক্লাই কয়। অৱশ্যে, কিমানজন বিষয়া, কি পৰ্যায়ৰ বিষয়া আদি বিতং তথ্য প্ৰকাশৰ পৰা তেওঁ বিৰত থাকে। হিন্দুস্তান টাইমছে এই বাতৰি প্ৰকাশ কৰিছে।
উচ্চতম ন্যায়ালয়ৰ এই সিদ্ধান্তৰ কিছু যুক্তি আছে। এক বিশ্বস্ত সূত্ৰই জানিব দিয়া মতে মুখ্য ন্যায়াধীশগৰাকীয়ে আৰক্ষী অধীক্ষক, জ্যেষ্ঠ আৰক্ষী অধীক্ষক আৰু আনকি পৰিদৰ্শক পৰ্যায়ৰ বিষয়া পঠাবলৈ কৈছে যিসকলে নথি পঞ্জীয়নৰ কামকাজ নিৰীক্ষণ কৰিব।
তেওঁলোকে গোচৰসমূহৰ তালিকা প্ৰস্তুত কৰোতে যাতে কোনো সুযোগ দিয়া নহয় আৰু কৰ্মচাৰীসকলে অধিবক্তাসকলক কোনো তথ্য সৰবৰাহ কৰিব নোৱাৰে সেয়া নিশ্চিত কৰিব তথা নথি পঞ্জীয়নত নিযুক্ত কৰ্মচাৰীসকলৰ যোগ্যতা-যথাৰ্থতাও আনকি পৰীক্ষা কৰিব।
আনহাতে, নথি পঞ্জীয়ন বিভাগৰ এক সূত্ৰই জানিবলৈ দিয়ে যে চিবিআই বিষয়াসকলে নথি পঞ্জীয়নৰ কামকাজত দৃষ্ট নাৰাখে। ‘’তেওঁলোকে ন্যায়ালয়ত নতুনকৈ নিযুক্ত লোকসকলৰ বিশ্বাসযোগ্যতা পৰীক্ষণৰ বাবে আন সংস্থাৰ সৈতে অকল সম্পৰ্কৰক্ষী বিষয়া হিচাপেহে কাম কৰিব।
বৰ্তমান ব্যৱস্থাৰ অধীনত একমাত্ৰ স্থানীয় আৰক্ষী থানাৰ পৰ্যায়তহে ভেৰিফিকেশ্যন কৰা হয়। সেয়েহে আন থানাৰ অধীনত বা আন ৰাজ্যত তেওঁৰ বিৰুদ্ধে থকা গোচৰৰ বিষয়ে জানিব পৰা নাযায়। এতিয়া এই সন্দৰ্ভত গভীৰ অনুসন্ধান হ’ব।
আনহাতে, প্ৰথমবাৰৰ বাবে উচ্চতম ন্যায়ালয়ত চিবিআইৰ বিষয়া নিযুক্ত হ’ব। চিবিআইক দেশত হোৱা যিকোনো ধৰণৰ দুৰ্নীতিৰ তদন্তৰ বাবে ইতিমধ্যে আইনগতভাৱে ক্ষমতা প্ৰদান কৰা হৈছে যদিও উচ্চতম ন্যায়ালয়ৰ অনুমতি অবিহনে উচ্চতৰ ন্যায়ালয়ৰ সৈতে সম্পৰ্কিত কোনো তদন্তৰ ক্ষমতা ইয়াৰ নাই।
নাম প্ৰকাশত অনিচ্ছুক এগৰাকী প্ৰাক্তন চিবিআই সঞ্চালকে কয়,’’ চিবিআই আৰু উচ্চতম ন্যায়ালয়ৰ ইতিহাসত এইটো প্ৰথমবাৰৰ বাবে ঘটিছে। দিল্লী স্পেছিয়েল এষ্টাব্লিছমেন্ট এক্ট অনুসৰি, আন বিভাগলৈ ডেপুটেশ্যনলৈ যোৱাত চিবিআইৰ সন্মতি নাই। কিন্তু দেশৰ মুখ্য ন্যায়াধীশেই যিহেতু চিবিআইৰ বিষয়া ডেপুটেশ্যনত বিচাৰিছে, গতিকে বিষয়টোত কোনো জটিলতা নাই।‘’
উল্লেখযোগ্য যে, অলপতে মুখ্য ন্যায়াধীশগৰাকীয়ে এগৰাকী ব্যৱসায়ীৰ সৈতে সম্পৰ্কিত এটা গোচৰৰ নিৰ্দেশ সলনি কৰাৰ অভিযোগত আদালতৰ দুজন কৰ্মচাৰীক বৰ্খাস্ত কৰিছিল।