অন্ধ্ৰ প্ৰদেশৰ মুখ্যমন্ত্ৰী এন. চন্দ্ৰবাবু নাইডুৱে শনিবাৰে দিল্লীত প্ৰধানমন্ত্ৰী নৰেন্দ্ৰ মোডীক সাক্ষাৎ কৰি ঋণগ্ৰস্ত দক্ষিণৰ ৰাজ্যখনৰ বাবে আৰ্থিক সাহায্য বৃদ্ধিৰ দাবী জনায়। ইয়াৰ লগতে তেওঁ কেন্দ্ৰীয় বিত্তমন্ত্ৰী নিৰ্মলা সীতাৰমনকো সাক্ষাৎ কৰে। তাত ৰাজ্যৰ লগত জড়িত বহু বিষয়ৰ ওপৰত আলোচনা কৰা হয়। তেলেগু দেশম পাৰ্টিৰ মুৰব্বীগৰাকীয়ে সীতাৰমনক অন্ধ্ৰপ্ৰদেশৰ দুৰ্বল আৰ্থিক অৱস্থাৰ বিষয়ে অৱগত কৰি ৰাজ্যখনৰ উন্নয়নৰ বাবে কেইবাখনো আঁচনিৰ অধীনত বৰ্ধিত সহায় বিচাৰে।
১৬ গৰাকী লোকসভা সদস্যৰে টিডিপি বিজেপি নেতৃত্বাধীন এনডিএ চৰকাৰৰ এক প্ৰধান মিত্ৰ দল। এইবাৰ বিজেপিয়ে পূৰ্ণ সংখ্যাগৰিষ্ঠতাৰে চৰকাৰ গঠন কৰিব নোৱাৰিলে। সেয়ে এন ডি এৰ অংশ হৈ থকা নাইডু আৰু নীতিশ কুমাৰৰ এই চৰকাৰত গুৰুত্বপূৰ্ণ ভূমিকা আছে।
লগতে পঢ়কঃ তুৰ্কীৰ সংসদৰ অধিৱেশন চলি থকাৰ সময়তে সাংসদৰ মাজত মাৰপিট, আহত দুই সাংসদ
সূত্ৰসমূহৰ মতে কেন্দ্ৰীয় বাজেটৰ পিছত মোডীৰ সৈতে হোৱা প্ৰথমখন বৈঠকত নাইডুৱে অন্ধ্ৰপ্ৰদেশৰ বাবে কৰা বৃহৎ ঘোষণাৰ বাবে তেওঁক ধন্যবাদ জনায়। ইয়াৰ ভিতৰত নতুন ৰাজধানীৰ উন্নয়নৰ বাবে ১৫ হাজাৰ কোটি টকাৰ পুঁজিও অন্তৰ্ভুক্ত আছে।
অন্ধ্ৰ প্ৰদেশৰ মুখ্যমন্ত্ৰী এন চন্দ্ৰবাবু নাইডুৱেও শনিবাৰে কেন্দ্ৰীয় গৃহমন্ত্ৰী অমিত শ্বাহক সাক্ষাৎ কৰি ৰাজ্যখনৰ সমস্যা সন্দৰ্ভত আলোচনা কৰে। শ্বাহক সাক্ষাৎ কৰাৰ পূৰ্বে নাইডুৱে বিত্তমন্ত্ৰী নিৰ্মলা সীতাৰমণ আৰু বিমান মন্ত্ৰী কে ৰামমোহন নাইডুক সাক্ষাৎ কৰিছিল। এই বৈঠকত নাইডুৱে ঋণগ্ৰস্ত দক্ষিণৰ ৰাজ্যখনৰ পুনৰ নিৰ্মাণৰ বাবেও চৰকাৰী সহায় আৰু পুঁজি বিচাৰিছিল। এই বৈঠকবোৰত টিডিপিৰ আগশাৰীৰ নেতাকে ধৰি বহু সাংসদ আৰু কেন্দ্ৰীয় মন্ত্ৰী কে. ৰামমোহন নাইডু আৰু পেম্মাছানি চন্দ্ৰশেখৰ মুখ্যমন্ত্ৰীৰ লগত আছিল।
এন ডি এ চৰকাৰৰ মূল মিত্ৰদল টিডিপিয়ে ৰাজ্যৰ আৰ্থিক সংকটৰ বিষয়টোক লৈ আৰম্ভণিৰে পৰাই সৰৱ হৈ আহিছে। ইয়াৰ সমান্তৰালকৈ আৰ্থিক প্ৰত্যাহ্বানৰ সৈতে মোকাবিলা কৰিবলৈ কেন্দ্ৰীয় সাহায্যও বৃদ্ধিৰ দাবী জনাইছে মুখ্যমন্ত্ৰীগৰাকীয়ে।
লগতে পঢ়কঃ প্ৰতি ১ঘণ্টাত ভাৰতত ধৰ্ষণ কৰা হয় চাৰিগৰাকী নাৰীক! ৯৫% ঘটনাতেই ধৰ্ষণকাৰী হয় মহিলাৰ চিনাকি লোক…
ইয়াৰ পূৰ্বে শুকুৰবাৰে অন্ধ্ৰৰ মুখ্যমন্ত্ৰী নাইডুৱে পোলাভাৰম প্ৰকল্পৰ ডায়েফ্ৰাম দেৱাল নিৰ্মাণৰ বাবে জল শক্তি মন্ত্ৰীক সাক্ষাৎ কৰিছিল। কেন্দ্ৰীয় চৰকাৰে নিযুক্তি দিয়া বিশেষজ্ঞ পেনেলৰ প্ৰতিবেদনৰ পিছতে মুখ্যমন্ত্ৰীয়ে ডায়েফ্ৰাম দেৱাল আৰু অন্যান্য প্ৰকল্পৰ বুনিয়াদী আধাৰ সময়মতে আৰু নিৰাপদভাৱে সম্পূৰ্ণ কৰাৰ বাবে কেন্দ্ৰ-ৰাজ্যৰ উন্নত সমন্বয়ৰ আহ্বান জনাইছে। লগতে মুখ্যমন্ত্ৰী নাইডুৱে কেন্দ্ৰীয় জল আয়োগৰ বিষয়াসকলক ডায়েফ্ৰাম দেৱাল, ইচিআৰএফৰ বান্ধ আৰু আনুষংগিক বহু কামত শীঘ্ৰে অনুমোদন দিবলৈ অনুৰোধ জনায়।
