তুৰ্কীৰ সংসদত কেইবাজনো সাংসদৰ মাজত মাৰপিটৰ ঘটনা সংঘটিত হৈছে। শুকুৰবাৰে (১৬ আগষ্ট) সংসদৰ এজন ক্ষমতা হেৰুওৱা বিৰোধী সদস্যৰ গ্ৰেপ্তাৰক লৈ বিতৰ্ক চলাৰ সময়তে এই মাৰপিটৰ ঘটনা সংঘটিত হয়।
৩০ মিনিট ধৰি চলি থকা এই মাৰপিটৰ ঘটনাত কমেও দুজন সাংসদ আহত হোৱাৰ লগতে সংসদীয় শুনানি স্থগিত ৰখা হয়।
শেষত সাংসদসকলে এক ভোটদানত অংশগ্ৰহণ কৰি অধিবক্তা তথা মানৱ অধিকাৰ কৰ্মী জন আটালাইৰ সংসদীয় কাৰ্যভাৰ পুনৰ ঘূৰাই অনাৰ বাবে বিৰোধীয়ে লোৱা পদক্ষেপক নাকচ কৰে। যোৱা বছৰ কাৰাগাৰৰ পৰাই প্ৰচাৰ চলাই আটালয়াই নিজৰ সমষ্টিত জয় লাভ কৰিছিল।
শাসকীয় এ কে পিৰ সদস্য আলপাই অকালানে বাওঁপন্থী ৱৰ্কাৰছ পাৰ্টি অৱ তুৰস্কৰ সদস্য আহমেদ ছিকক আক্ৰমণ কৰাৰ পিছতে এই যুঁজৰ সূচনা হয়। আটলায়াৰ প্ৰতি চৰকাৰে কৰা ব্যৱহাৰক গৰিহণা দিয়ে আহমেদ ছিকে।
লগতে পঢ়কঃ মাত্ৰ ৩৭ বছৰ বয়সতে থাইলেণ্ডৰ নতুন প্ৰধানমন্ত্ৰী! কোন এই পেটাংটাৰ্ণ শ্বিনাৱাট্ৰা?
আহমেদে কয়, “আটালায়াক সন্ত্ৰাসবাদী বুলি কোৱাটো আচৰিত কথা নহয়। সকলো নাগৰিকে জনা উচিত যে এই দেশৰ আটাইতকৈ ডাঙৰ সন্ত্ৰাসবাদী হৈছে সংসদৰ বেঞ্চত বহি থকা লোকসকল।”
সংসদত উপস্থিত এ এফ পিৰ এজন সাংবাদিকে জনোৱা মতে, প্ৰাক্তন ফুটবল খেলুৱৈ তথা এ কে পিৰ সদস্য আলপাই অকালানে ছিকৰ মন্তব্যত ক্ষোভিত হৈ ছিকক মাটিত পেলাই দিয়ে। মাটিত পৰি থকাৰ সময়তে ছিকক কেইবাবাৰো ঘুচা মাৰিছিল এ কে পিৰ সদস্যই। পিছত বহু সাংসদে এই মাৰপিটত যোগদান কৰে।
অনলাইনত পোষ্ট কৰা ভিডিঅ’ত দেখা গৈছে এই যুঁজ। পিছত সংসদৰ মজিয়াৰ পৰা তেজৰ দাগ পৰিষ্কাৰ কৰা দেখা যায় কৰ্মচাৰীক।
ৰিপাব্লিকান পিপলছ পাৰ্টিৰ এজন ডেপুটি আৰু পিপলছ ইকুৱেলিটি এণ্ড ডেম’ক্ৰেচি পাৰ্টিৰ এজন ডেপুটি মূৰত আঘাতপ্ৰাপ্ত হয়।
মূল বিৰোধী চি এইচ পি দলৰ মুৰব্বী অজগুৰ অজেলে এই ঘটনাক গৰিহণা দি কয় যে এই পৰিস্থিতি দেখি মই লাজ পাইছো। তুৰস্কৰ সংসদৰ অধ্যক্ষই কয় যে যুঁজ আৰম্ভ কৰা ডেপুটি দুজনক শাস্তি দিয়া হ’ব।
লগতে পঢ়কঃ টাইব্ৰেকাৰত ৩৪টা পেনাল্টি! কল্পনা কৰিব পাৰিনে? ঐতিহাসিক জয় সাৱ্যস্ত নেদাৰলেণ্ডৰ ক্লাবৰ
সতীৰ্থ বাওঁপন্থী সাংসদসকলে তেওঁক বাধা দিবলৈ চেষ্টা কৰাৰ পিছতো জানুৱাৰী মাহত উত্তেজনাপূৰ্ণ সংসদীয় অধিৱেশনৰ পিছত আটালাই সংসদীয় আসন হেৰুৱাইছিল।
২০২২ চনত এটা বিতৰ্কিত গোচৰত আটালাক ১৮ বছৰৰ কাৰাদণ্ড বিহা হৈছিল। একেটা গোচৰতে বঁটা বিজয়ী তুৰ্কী দানবীৰ ওছমান কাভালাক যাৱজ্জীৱন কাৰাদণ্ডৰ শাস্তি প্ৰদান কৰা হয়।
কাৰাগাৰৰ পৰাই ৪৮ বছৰীয়া আটালাই প্ৰচাৰ চলাই ২০২৩ চনৰ মে’ মাহত ভূমিকম্পই বিধ্বস্ত হাটাই প্ৰদেশৰ সংসদীয় আসনৰ পৰা নিৰ্বাচিত হয়। তেওঁ বাওঁপন্থী টি আই পি দলৰ সদস্য। সংসদত দলটোৰ তিনিখন আসন।
এই বিজয়ৰ ফলত ৰাষ্ট্ৰপতি এৰদোগানৰ সমৰ্থক আৰু বিৰোধী নেতাৰ মাজত আইনী অচলাৱস্থাৰ সৃষ্টি হৈছিল, যিয়ে যোৱা বছৰ তুৰস্কক সাংবিধানিক সংকটৰ মাজলৈ ঠেলি দিছিল।
উচ্চতম ন্যায়ালয়ৰ ৰায়ৰ পিছতে জানুৱাৰী মাহত আটালায়াক সংসদৰ পৰা বহিষ্কাৰ কৰাৰ সিদ্ধান্ত লোৱা হৈছিল। এই ৰায়দানত তেওঁৰ শাস্তি বাহাল ৰাখি তেওঁৰ সংসদীয় ক্ষমা বাতিলৰ পথ মুকলি কৰা হয়। কিন্তু ১ আগষ্টত দেশৰ সাংবিধানিক আদালতে এই ৰায়ক “বাতিল” বুলি ঘোষণা কৰে।
লগতে পঢ়কঃ “আৰ জি কৰৰ যুৱতী চিকিৎসকৰ ছবি বা নাম প্ৰকাশ নকৰিব, আইনমতে নিষিদ্ধ”, ক’লে উচ্চ ন্যায়ালয়ে
শুকুৰবাৰে (১৬ আগষ্ট) এ কে পি আৰু কট্টৰ জাতীয়তাবাদী আন্দোলন পাৰ্টিৰ ডেপুটিসকলে একত্ৰিত হৈ বিৰোধী দলক পৰাস্ত কৰে।
ইয়াৰ পূৰ্বেও তুৰস্কৰ সংসদে চৰকাৰে “সন্ত্রাসবাদী” বুলি গণ্য কৰা বহু বিৰোধী ৰাজনীতিবিদ বিশেষকৈ কুর্দসকলৰ শাস্তি উঠাই নিদিয়াৰ বাবে ভোটদান কৰিছিল৷
