মুখ্যমন্ত্ৰী হিমন্ত বিশ্ব শৰ্মাই আজি অসমৰ আটাইকেইখন জিলাৰ আৰক্ষী অধীক্ষকসকলৰ সৈতে এক বৈঠকত মিলিত হয়।
তৈল নগৰী দুলীয়াজানত অনুষ্ঠিত আৰক্ষী অধীক্ষকসকলৰ এই বৈঠকত মুখ্যমন্ত্ৰী হিমন্ত বিশ্ব শৰ্মাই কয় —’ মই এনে এজন আৰক্ষী অধীক্ষক বিচাৰো যিয়ে মোক ক’ব পাৰে নিৰাপত্তা অবিহনেই আপুনি মোৰ জিলা ভ্ৰমণ কৰিব পাৰিব’।
মুখ্যমন্ত্ৰীগৰাকীয়ে তেওঁৰ এনে ব্যক্তব্যৰ জৰিয়তে আৰক্ষী অধীক্ষকসকললৈ এই বাৰ্তা প্ৰেৰণ কৰিব বিচাৰে যে ৰাজ্যৰ প্ৰতি খন জিলাতে আইন-শৃংখলা পৰিস্থিতি এনে যাতে যি কোনো লোকেই সেই জিলা নিৰ্ভয়ে আৰু নিৰাপদে ভ্ৰমণ কৰিব পাৰে।
মুখ্যমন্ত্ৰীয়ে কয় যে কেৱল মুখ্যমন্ত্ৰীৰ নিৰাপত্তা সুনিশ্চিত কৰাতেই আৰক্ষী প্ৰশাসনৰ কাম শেষ হৈ নাযায়।
আৰক্ষীয়ে প্ৰতিগৰাকী সাধাৰণ লোকৰ জীৱন আৰু সম্পত্তিৰ নিৰাপত্তা সুনিশ্চিত কৰিব লাগিব।
উল্লেখ্য মুখ্যমন্ত্ৰী হিমন্ত বিশ্ব শৰ্মাই গুৱাহাটীত থকাৰ সময়ত তেওঁৰ নিৰাপত্তা আধালৈ হ্ৰাস কৰিব বুলি ইতিমধ্যে ঘোষণা কৰিছে।
মুখ্যমন্ত্ৰীয়ে আনকি বিজেপি নেতাসকলকো তেওঁলোকৰ ব্যক্তিগত নিৰাপত্তাৰক্ষী ত্যাগ কৰিবলৈ আহ্বান জনাইছিল।
