দিল্লীত বিজেপিৰ হৈ প্ৰচাৰ চলাবলৈ গৈ “লঘু” হ’ল মুখ্য মন্ত্ৰী সোণোৱাল?
অহা ৮ ফেব্ৰুৱাৰিত বিধানসভাৰ নিৰ্বাচন অনুষ্ঠিত হ’ব লগীয়া দিল্লীত বিজেপিৰ হৈ প্ৰচাৰ চলাবলৈ গৈ অসমৰ মুখ্য মন্ত্ৰী সোণোৱাল এক প্ৰকাৰৰ লঘু হয়।
উত্তৰ-পূবৰ গুৰুত্বপূৰ্ণ ৰাজ্যখনৰ মুখ্য মন্ত্ৰী সোণোৱালে এখন বুথ পৰ্য্যায়ৰ সভাতহে এমুঠিমান বিজেপি কৰ্মীৰ আগত ভাষণ দিবলৈ সুযোগ পায়।
সোণোৱালে ২৭ জানুৱাৰিত আনছাৰি নগৰ ৱেষ্ট সমষ্টিৰ প্ৰাৰ্থী সুনীল যাদৱৰ হৈ প্ৰচাৰ চলাইছিল বুলি অসম বিজেপিৰ এটা বিবৃতিৰ পৰা জানিব পৰা গৈছে।
বিবৃতিটোত কোৱা মতে, সভাখনত অসমৰ মুখ্য মন্ত্ৰীজনে দিল্লীক বিশ্বৰ শ্ৰেষ্ঠ মহানগৰ কৰি গঢ়ি তুলিবলৈ বিজেপিৰ প্ৰাৰ্থী যাদৱক ভোট দিবলৈ আহ্বান জনায়।
মুখ্য মন্ত্ৰী সৰ্বানন্দ সোণোৱালেও তেওঁৰ ফেইচবুক পেইজত উক্ত সভাখনৰ দুখন আলোক ছবি শ্বেয়াৰ কৰিছে, য’ত মাত্ৰ ২৫/৩০জন মান দলীয় কৰ্মীহে দেখা যায়।
এই দৃশ্য দেখি ছ’চিয়েল মিডিয়াত অনেকেই মন্তব্য কৰিছে যে অসমৰ মুখ্য মন্ত্ৰীজন দিল্লীত এখন বুথ পৰ্য্যায়ৰ সভাত প্ৰচাৰ চলোৱাৰ বাবেহে যোগ্য নেকি?
বহুতে দৃশ্যটোৰ জৰিয়তে মুখ্য মন্ত্ৰী সোণোৱালৰ “গুৰুত্বহীনতা” প্ৰকাশ পোৱা বুলিও ক’ব খুজিছে।
ছ’চিয়েল মিডিয়াত বিভিন্নজনে কটাক্ষও কৰিছে সোণোৱালক।
আনহাতে একাংশৰ টিপ্পনী, “হিমন্তৰ অৱস্থা চাব লগীয়া হ’ব”।
উল্লেখ কৰিব পাৰি যে দিল্লীৰ বিধানসভাৰ নিৰ্বাচনত প্ৰচাৰ চলাবলৈ মুখ্য মন্ত্ৰী সোণোৱালৰ উপৰি বিত্ত মন্ত্ৰী হিমন্ত বিশ্ব শৰ্মাও যোৱাৰ কথা আছে।
দিল্লীত বৰ্তমান শাসনত থকা অৰবিন্দ কেজৰিৱালৰ আম আদমি পাৰ্টিৰ খোপনি অতিকৈ মজবুত।