মুখ্য মন্ত্ৰী সৰ্বানন্দ সোণোৱালে আজি পশ্চিম কাৰ্বি আংলং জিলাৰ বৈঠালাংচুত ৯ মেগাৱাট শক্তি সম্পন্ন মিনট্ৰিয়াং ক্ষুদ্ৰ জলবিদ্যুৎ প্ৰকল্প ষ্টেজ-১ উদ্ধোধন কৰে। অসম চৰকাৰ, নাবাৰ্ড, এ আই এফ এ আৰু এ পি জি চি এলৰ উমৈহতীয়া ১৪৫.৯৫ কোটি টকাৰ পুঁজিৰ এই প্ৰকল্পটো ৰূপায়ন কৰা হৈছে।
ভাষণ প্ৰসংগত মুখ্য মন্ত্ৰীয়ে কয় যে ৰাজ্যখনৰ প্ৰচুৰ জল-সম্পদৰ প্ৰতি লক্ষ্য ৰাখি চৰকাৰে ক্ষুদ্ৰ জলবিদ্যুৎ প্ৰকল্প স্থাপনৰ ওপৰত গুৰুত্ব দিছে। বৰ্তমানৰ চৰকাৰে ২০৩০ চনৰ ভিতৰত অসমত ৬ হাজাৰ মেগাৱাট বিদ্যুৎ শক্তি উদপাদনৰ লক্ষ্য লোৱা বুলিও তেওঁ কয়।
আনহাতে বৈঠালাংচুত অনুষ্ঠিত উক্ত অনুষ্ঠানতে মুখ্য মন্ত্ৰী গৰাকীয়ে ৰাজ্যিক পৰ্যায়ৰ প্ৰধান মন্ত্ৰী কিষাণ সন্মান নিধি আনুষ্ঠানিকভাৱে শুভাৰম্ভ কৰে।
কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং, শক্তি বিভাগৰ ৰাজ্যিক (স্বতন্ত্ৰ) মন্ত্ৰী তপন কুমাৰ গগৈ, বৈঠালাংচু বিধানসভা সমষ্টিৰ বিধায়ক ড০ মনসিং ৰংপিয়ে বক্তব্য প্ৰদান কৰা এই অনুষ্ঠানত অসম শক্তি উৎপাদন কোম্পানী লিমিটেডৰ অধ্যক্ষ বি কে পিপাৰচেনীয়া, পৰিচালন সঞ্চালক কল্যাণী বৰুৱা আদি উপস্থিত থাকে।
