“আৱেগিকভাবে কথা ক’লে জাতি ৰক্ষা নপৰে ৷” এই মন্তব্য ৰাজ্যৰ মুখ্য মন্ত্ৰী সৰ্বানন্দ সোণোৱালৰ ৷
আজি বৰপেটা জিলাৰ হাউলীত এই মন্তব্য কৰে মুখ্যমন্ত্ৰী গৰাকীয়ে ৷
হাউলী শংকৰদেৱ শিশু নিকেতনৰ ৰূপালী জয়ন্তীৰ কাৰ্যসূচীত মুখ্য অতিথি হিচাপে অংশ গ্ৰহণ কৰি মুখ্যমন্ত্ৰী গৰাকীয়ে লগতে কয় যে, আৱেগিকভাবে কথা ক’লে ভাষাও ৰক্ষা নপৰে ৷
তেওঁ কয়,’’জাতি আৰু ভাষাক ৰক্ষা কৰিবলৈ হলে অসমখনক অধ্যয়ন কৰি ভাল পাব লাগিব ৷’’
তেওঁ লগতে কয় যে মাটি ভেটি সুৰক্ষিত নহ’লে কৃষ্টি সংস্কৃতি সৰক্ষিত নহয়৷ অসমীয়া কৃষ্টি সংস্কৃতি সুৰক্ষিত কৰাৰ বাবে চৰকাৰে খিলঞ্জীয়া লোকক মাটিৰ পট্টা দিয়াৰ কাম আৰম্ভ কৰা বুলিও তেওঁ কয় ৷
আনহাতে, শিক্ষানুষ্ঠান সন্দৰ্ভত তেওঁ কয় যে, শিক্ষানুষ্ঠানবোৰত নিয়মানুবৰ্তিতা, শৃংখলাবদ্ধতা, পৰিস্কাৰ পৰিচ্ছনতা, শিক্ষাৰ পৰিবেশ আদি থাকিব লাগে ৷
শিক্ষানুষ্ঠানবোৰৰ সফলতা বিফলতাবোৰ পৰিচালনা সমিতিয়ে পৰ্যালোচনা কৰি আৰু অধিক উন্নত কৰাৰ বাবে তেওঁ আহ্বান জনায় ৷
ৰাজ্যৰ বিভিন্ন প্ৰান্তত থকা শংকৰদেৱ শিশু নিকেতনে সুকীয়া মৰ্যাদা দাঙি ধৰিবলৈ সক্ষম হোৱা বুলিও মুখ্য মন্ত্ৰী গৰাকীয়ে উল্লেখ কৰে ৷