চতিয়াৰ বিধায়ক পদ্ম হাজৰিকাৰ নেতৃত্বত সমষ্টিটোৰ প্ৰায় চাৰি হাজাৰ নিবনুৱা যুৱক-যুৱতীয়ে নিজৰ “জব কাৰ্ড”ৰ উপাৰ্জনক মূলধনৰূপে খটুৱাই সামূহিক উৎপাদনৰ পথত আগবাঢ়িছে।
সমষ্টিটোৰ ১৯ খন গাওঁ পঞ্চায়ত আৰু এখন নগৰ সমিতিত বিধায়কগৰাকীৰ প্ৰচেষ্টাত গঠিত হৈছে মুঠ ২০০টা আত্ম সহায়ক গোট।
গোটসমূহৰ জৰিয়তে যুৱক-যুৱতীসকল ব্যস্ত হৈছে খেতি আৰু পশুপালনৰ জৰিয়তে উৎপাদন আৰু স্ব-নিয়োজনৰ বাটত।
প্ৰতিটো গোটত ২০ গৰাকীকৈ যুৱক-যুৱতী আছে আৰু তেওঁলোকে বিভিন্ন স্থানত খেতি আৰু পশুপালনৰ পাম গঢ় দিছে।
পামসমূহত মূলধন হিচাপে খটোৱা মুঠ ১৭,৪৯,৬৭,০০০ টকা এই যুৱক-যুৱতীসকলৰ “জব কাৰ্ড”ৰ কষ্টোপাৰ্জিত ধন।
এই উদ্যমী যুৱক-যুৱতীসকলক অসম চৰকাৰৰ কৃষি বিভাগ আৰু পশুপালন আৰু পশু চিকিৎসা বিভাগে প্ৰশিক্ষণ দিয়াৰ ব্যৱস্থা কৰিছে।
বিধায়কৰ প্ৰচেষ্টাত এই আত্মসহায়ক গোটসমূহে মুখ্য মন্ত্ৰীৰ সমগ্ৰ গ্ৰাম্য উন্নয়ন যোজনাৰ অধীনত ৫ কোটি টকাৰ অৰ্থ সাহায্য লাভ কৰিছে।
যোৱা প্ৰায় এবছৰধৰি এই গোটসমূহৰ উৎপাদন অসমৰ লগতে বাহিৰৰ বজাৰলৈ ৰপ্তানি হৈছে।
খেতিৰ বাবে বিশ্বৰ ভিতৰতে অন্যতম অনন্য ভৌগোলিক অনুকূলতা থকা অসমে নিজ ৰাজ্যৰ প্ৰয়োজনীয় সামগ্ৰীখিনি উৎপাদন কৰিব পৰা হোৱা নাই।
এনে সময়ত বিধায়ক হাজৰিকাই নেতৃত্ব দিয়া পথটো ৰাজ্যৰ যিকোনো সমষ্টিৰ বাবেই আদৰ্শ হ’ব পাৰে।
অসমৰ আন ঠাইতো কিছু উৎপাদনমুখী কাম হৈছে, কিন্তু বিধায়কৰ নেতৃত্বত এনে উদ্যোগৰ বিষয়ে এতিয়াও জানিব পৰা হোৱা নাই।
