পশ্চিমবংগৰ মুৰ্শিদাবাদৰ ভৰতপুৰত এক আমোদজনক তথা বিতৰ্কিত ঘটনা পোহৰলৈ আহিছে। বিধানসভা নিৰ্বাচনৰ সময়ছোৱাত বিজেপি প্ৰাৰ্থী অনামিকা ঘোষ আৰু কংগ্ৰেছ প্ৰাৰ্থী মহম্মদ আজাহাৰুদ্দিনৰ এজেন্ট উদ্দীপন দাসৰ মাজত প্ৰেমৰ সম্পৰ্ক গঢ়ি উঠিছিল।
অভিযোগ অনুসৰি তেওঁলোকে বেআইনীভাৱে বিবাহ পাশতো আৱদ্ধ হৈছে। এই ঘটনাৰ প্ৰতিবাদ কৰাৰ বাবেই উদ্দীপন দাসৰ পত্নী পূৰ্ণিমা দাসক মাৰপিট কৰি ঘৰৰ পৰা খেদি পঠিওৱা হৈছে। এই সন্দৰ্ভত সুবিচাৰ বিচাৰি এতিয়া ভুক্তভোগী মহিলাই ছ’চিয়েল মিডিয়াৰ জৰিয়তে শুভেন্দু অধিকাৰী আৰু ৰাজ্যিক বিজেপি সভাপতি শমীক ভট্টাচাৰ্যৰ ওচৰত আকুল আবেদন জনাইছে।
হৈ যোৱা বিধানসভা নিৰ্বাচনৰ সময়ত ভৰতপুৰ সমষ্টিৰ পৰা বিজেপিৰ প্ৰাৰ্থী হৈছিল অনামিকা ঘোষ। আনহাতে কংগ্ৰেছ প্ৰাৰ্থী আজাহাৰুদ্দিনৰ এজেন্ট আছিল উদ্দীপন দাস। নিৰ্বাচনী প্ৰচাৰৰ সময়তে তেওঁলোকৰ মাজত পৰিচয় হয় আৰু ক্ৰমে এই পৰিচয় প্ৰেমলৈ ৰূপান্তৰ হয়। উদ্দীপন দাসৰ পত্নী পূৰ্ণিমা দাসে অভিযোগ কৰা মতে, যেতিয়াই তেওঁ এই অবৈধ সম্পৰ্কৰ প্ৰতিবাদ কৰিছিল, তেতিয়াই স্বামীয়ে তেওঁৰ ওপৰত নানা ধৰণে অত্যাচাৰ চলাইছিল। পৰৱৰ্তী সময়ত দুটা সন্তানৰ সৈতে পূৰ্ণিমাক ঘৰৰ পৰা খেদি নিজৰ পিতৃক গৃহলৈ পঠিয়াই দিয়া হয়।
পূৰ্ণিমা দাসে জানিবলৈ দিয়ে যে সকলো সীমা চেৰাই যোৱা ২৭ জুলাইত তেওঁৰ স্বামী উদ্দীপনে বিজেপি নেত্ৰী অনামিকা ঘোষক বেআইনীভাৱে বিয়া কৰায়। ইয়াৰ পাছত তেওঁ আৰক্ষীৰ কাষ চাপিছিল যদিও কোনো সুবিচাৰ নাপালে। অৱশেষত আন কোনো উপায় নাপাই তেওঁ ছ’চিয়েল মিডিয়াত এটা ভিডিঅ’ প্ৰকাশ কৰি নিজৰ দুখৰ কথা দাঙি ধৰে।
ভিডিঅ’টোত তেওঁ কয় যে নিৰ্বাচনৰ সময়ৰ পৰাই তেওঁলোকৰ সম্পৰ্ক আৰম্ভ হৈছিল আৰু এতিয়া দুটা সন্তানৰ সৈতে তেওঁ পিতৃক গৃহত আশ্ৰয় লৈ আছে। সকলো ফালৰ পৰা নিৰাশ হৈ তেওঁ এতিয়া সমাজ মাধ্যমৰ জৰিয়তে সুবিচাৰৰ অন্তিম আশা পুহি ৰাখিছে।
