লোকসভা নিৰ্বাচনৰ দিন চমু চাপি অহাৰ সময়তে বিৰোধী মিত্ৰজোঁট INDIAই লাভ কৰিছে সকাহ। আভ্যন্তৰীণ কন্দল তথা বিপৰ্যয়ত জৰ্জৰিত হোৱাৰ পিছতো কিঞ্চিত গতি লৈছে মিত্ৰজোঁটে।
আজি মিত্ৰজোঁটৰ দুই অংশীদাৰ দিল কংগ্ৰেছ আৰু ডি এম কেই তামিলনাডুত আসন বুজাবুজি প্ৰায় সম্পূৰ্ণ কৰিছে বুলি সূত্ৰই প্ৰকাশ কৰিছে। তাৎপৰ্যপূৰ্ণভাৱে কমল হাছানৰ মক্কল নিধি মৈয়ামেও সহযোগিতা আগবঢ়াইছে এই বুজাবুজিত।
সূত্ৰ অনুসৰি, ৰাজ্যখনত কংগ্ৰেছে দহখন আসন পোৱাৰ সম্ভাৱনা আছে। আানহাতে দুই বাওঁপন্থী দল চি পি আই আৰু চি পি আই এমক দুখনকৈ আসন, ইণ্ডিয়ান ইউনিয়ন মুছলিম লীগ আৰু কংগু ডেছা মাক্কাল কাট্চিক এখনকৈ আসন আবণ্টন দিয়া হৈছে।
তদুপৰি, বিদুথলাই চিৰুথাইগাল কট্চীকো দুখন আসন আবণ্টন দিয়া হৈছে বুলি সূত্ৰই প্ৰকাশ কৰিছে। ইফালে ২০২৫ চনৰ ৰাজ্যসভা নিৰ্বাচনৰ বাবে কমল হাছানৰ দলটোক এখন আসন আবণ্টন দিয়া হৈছে বুলি প্ৰকাশ পাইছে। প্ৰখ্যাত অভিনেতাগৰাকীয়ে ইয়াৰ মাজতে কৰিছে এক বিশেষ মন্তব্য।
কমল হাছানৰ মন্তব্য, দেশৰ কল্যাণৰ বাবে তেওঁ ডি এম কে নেতৃত্বাধীন মিত্ৰজোঁটত যোগদান কৰিছে। “মই প্ৰতিদ্বন্দ্বিতা নকৰো। মই দেশৰ স্বাৰ্থত ডিএমকে নেতৃত্বাধীন মিত্ৰজোঁটত যোগদান কৰিছো, কোনো পদৰ বাবে নহয়।”- তেওঁ কয়।
চেন্নাইস্থিত ডি এম কেৰ মুখ্য কাৰ্যালয়ত মুখ্যমন্ত্ৰী ষ্টালিনক সাক্ষাৎ কৰাৰ পিছতে কমল হাছানে মিত্ৰজোঁটৰ প্ৰতি সমৰ্থন ঘোষণা কৰে।
