লোকসভা নিৰ্বাচনত শোচনীয় পৰাজয়ৰ পাছত বিৰোধী কংগ্ৰেছে বিজেপিৰ বৃহৎ জয়ক সমগ্ৰ দেশত হোৱা ধৰ্মীয় আবেগৰ ফল বুলি অভিহিত কৰিছে। এই আবেগেই বিজেপিক লাভান্বিত কৰাৰ বিপৰীতে কংগ্ৰেছক বিপৰ্যস্ত কৰিছে।
কংগ্ৰেছ দলৰ বাবে বিজেপি সৃষ্ট ধৰ্মীয় আবেগ শংকাৰ কাৰণ হৈ পৰাৰ কথা প্ৰকাশ কৰিছে অসমৰ প্ৰাক্তন মুখ্য মন্ত্ৰী তৰুণ গগৈয়ে। সোমবাৰে দিচপুৰৰ চৰকাৰী বাসভৱনত সংবামেল সম্বোধন কৰি প্ৰাক্তন মুখ্য মন্ত্ৰীগৰাকীয়ে এই কথা জানিবলৈ দিছে।
‘’এয়া আমাৰ বাবে অতি কঠিন সময়। ধৰ্মীয় আবেগৰ বিৰুদ্ধে যুঁজ দিয়াটো সহজ কথা নহয়’’,-তৰুণ গগৈয়ে সংবাদমেলত কয়।
দেশৰ আগশাৰীৰ প্ৰবীণ ৰাজনীতিক গৰাকীয়ে শেহতীয়া নিৰ্বাচনত বিজেপিয়ে ধনবল আৰু প্ৰচাৰ, বিভাজনৰ ৰাজনীতি, ধৰ্মৰ নামত আবেগ সৃষ্টিৰে যি ৰাজনৈতিক কৌশল লৈছিল তাত জয়ী হোৱা বুলি মন্তব্য কৰে। বিশেষকৈ ধৰ্মৰ নামত আবেগ সৃষ্টিৰে সকলো ইছ্যুৰ পৰা ফালৰি কটা বুলিও তেওঁ প্ৰকাশ কৰে।
‘’২০১৪ চনত নৰেন্দ্ৰ মোদীয়ে দুৰ্নীতি, ক’লা ধন, মূল্যবৃদ্ধি, নিবনুৱা সমস্যা আদি ইছ্যু লৈ আমাক পৰাজিত কৰিছিল। ২০১৪ চনত বিজেপি নিৰ্বাচনত অৱতীৰ্ণ হৈছিল উন্নয়নৰ কথা কৈ আৰু দুৰ্নীতিৰ বিৰুদ্ধে। কিন্তু ২০১৯ৰ নিৰ্বাচন তেনে কোনো ইছ্যুৰ ওপৰত নহ’ল। মোদীয়ে দিয়া প্ৰতিশ্ৰুতি কিমান পূৰণ কৰিলে সেয়া ৰাইজৰ আগত প্ৰকাশ নকৰিলে। তাকে নকৰি কৌশলেৰে এই ইছ্যু বিলাকৰ পৰা ফালৰি কাটিছে’’,-তৰুণ গগৈয়ে সংবাদমেলত কয়।
তেওঁ লগতে কয় যে এইবাৰ মোদীয়ে জাতীয়তাবাদৰ কথা কৈছে, কিন্তু এই জাতীয়তাবাদ ভাৰতীয় জাতীয়তাবাদ নহয়, ‘হিন্দুত্ব’ জাতীয়তাবাদৰহে কথা কৈছে বুলিও তৰুণ গগৈয়ে কয়।
‘’পাকিস্তানৰ পৰা আমাৰ আশংকা আছে আৰু দেশক কেৱল মোদীয়েহে ৰক্ষা কৰিব পাৰিব’’ এনেধৰণৰ ভাৱ মানুহৰ মনত সুমুৱাই দিয়া হৈছে বুলিও গগৈয়ে লগতে কয়।
নাগৰিকত্ব সংশোধনী বিধেয়ক, কাগজ কল, ৬ জনগোষ্ঠীৰ জনজাতিকৰণ আদিক লৈ কিছুদিন আগলৈ উত্তাল হৈ থকা অসমতো বিজেপিৰ ধনবল আৰু ধৰ্মীয় আবেগৰ প্ৰকোপত সকলো নিঃচিহ্ন হৈ যোৱা বুলি তেওঁ মন্তব্য কৰে।
একেখন সংবাদমেলতেই গগৈয়ে অসমৰ পৰা নিৰ্বাচিত হোৱা বিজেপি প্ৰাৰ্থীসকলে ‘’সংসদত কি মাত মাতিব, তেওঁলোকে নিমাতি কইনা হৈ থাকিব’’ বুলিও মন্তব্য কৰে। ইয়াৰ বিপৰীতে তেওঁ নিজেই ১৯৭১ চনৰ পৰা সাংসদ হৈ থাকোতে সদনত অসমৰ হৈ কেনেদৰে মাত মাতিছিল সেয়া চাবলৈ আহ্বান জনায়।
