মণিপুৰ সমস্যাক লৈ কংগ্ৰেছকে ধৰি বিৰোধী দলসমূহে নৰেন্দ্ৰ মোদীৰ মৌনতা ভংগৰ বাবে সংসদত অনাস্থাৰ প্ৰস্তাৱ আগবঢ়ায়। প্ৰধানমন্ত্ৰী নৰেন্দ্ৰ মোদীয়ে অনাস্থা প্ৰস্তাৱৰ প্ৰতি সঁহাৰি জনাই মণিপুৰৰ পৰিস্থিতি সন্দৰ্ভত আলোচনা কৰে।
শুকুৰবাৰে প্ৰধানমন্ত্ৰীৰ এই ভাষণক সমালোচনা কৰি সংবাদমেল অনুষ্ঠিত কৰে কংগ্ৰেছ নেতা ৰাহুল গান্ধীয়ে। তেওঁ কয়, “মণিপুৰ জ্বলি আছে আৰু প্ৰধানমন্ত্ৰীয়ে হাঁহিছে”।
ৰাহুলৰ এই মন্তব্যৰ প্ৰতুত্তৰ দিয়ে কেন্দ্ৰীয় মন্ত্ৰী অনুৰাগ ঠাকুৰে। তেওঁ কয়, মণিপুৰত হিংসাৰ বীজ সিঁচিছে কংগ্ৰেছে।
শুকুৰবাৰে সংবাদ সংস্থা এএনআইৰ সৈতে হোৱা এক সাক্ষাৎকাৰত কেন্দ্ৰীয় ক্ৰীড়া মন্ত্ৰী অনুৰাগ ঠাকুৰে কয, “প্ৰধানমন্ত্ৰী নৰেন্দ্ৰ মোদীয়ে অনাস্থা প্ৰস্তাৱক সম্বোধন কৰি মণিপুৰ তেওঁৰ হৃদয়ৰ অংশ বুলি কয়। মণিপুৰত হিংসাত্মক ঘটনাক লৈ উদ্বেগ প্ৰকাশ কৰে প্ৰধানমন্ত্ৰীয়ে। নাৰীৰ ওপৰত হোৱা অত্যাচাৰৰ কথাও তেওঁ কয়। দোষীসকলৰ বিৰুদ্ধে কঠোৰ ব্যৱস্থা গ্ৰহণ কৰা হৈছে আৰু ভৱিষ্যতেও এই ব্যৱস্থা গ্ৰহণ কৰা হ’ব বুলিও তেওঁ কয়। প্ৰধানমন্ত্ৰীৰ আগত গৃহমন্ত্ৰীয়েও সংসদত মণিপুৰৰ সন্দৰ্ভত সবিশেষ উল্লেখ কৰে। আনকি গৃহমন্ত্ৰী নিজে মণিপুৰলৈ যায় আৰু তাতে ৪ দিন থাকে। গৃহ ৰাজ্য মন্ত্ৰীগৰাকীও ২৪ দিন মণিপুৰতে থাকে।”
ইয়াৰ পিছত তেওঁ কংগ্ৰেছক আকৌ আক্ৰমণ কৰি কয়, “কিন্তু কংগ্ৰেছে সংসদ আৰু মণিপুৰত অশান্তিৰ সৃষ্টি কৰিছে। বেয়া শব্দ ব্যৱহাৰ কৰি অশ্লীল কথা কোৱাটো কংগ্ৰেছৰ অভ্যাসত পৰিণত হৈছে।”
ৰাহুল গান্ধীৰ বিতৰ্কিত মন্তব্যৰ কথা উল্লেখ কৰি কেন্দ্ৰীয় মন্ত্ৰীগৰাকীয়ে কয়, ‘কোনো ভাৰতীয় নাগৰিকে ভাৰত মাতৃক হত্যা কৰাৰ কথা ভাবিব পাৰেনে? ‘টুকৰে টুকৰে গেঙ’ৰ অংশ হোৱাসকলেহে তেনেকৈ ভাবিব পাৰে।
অনুৰাগ ঠাকুৰে মণিপুৰৰ কথাত কংগ্ৰেছে গুৰুত্ব নিদিয়ে আৰু সদায় বাতৰিৰ শিৰোনামত কেনেকৈ থাকিব পাৰি সেই বিষয়েহে চিন্তা কৰে বুলি অভিযোগ উত্থাপন কৰে।
‘মণিপুৰত যদি কোনোবাই হিংসাৰ বীজ সিঁচিছিল, সেয়া আছিল ৰাহুল গান্ধীৰ পৰিয়াল আৰু কংগ্ৰেছ দলে। উত্তৰ-পূব ভাৰতত আজি যি ঘৃণা বিদ্যমান, তাৰ কাৰণ হ’ল নেহৰু-গান্ধী পৰিয়াল।” – শেষত কংগ্ৰেছ আৰু গান্ধী পৰিয়ালক আক্ৰমণ কৰি কেন্দ্ৰীয় মন্ত্ৰী অনুৰাগ ঠাকুৰে এইদৰে কয়।
