মৰিগাঁও জিলাৰ টেঙাগুৰি বজাৰত আজি বিয়লি আঞ্চলিক দল অসম গণ পৰিষদৰ লাহৰীঘাট বিধান পৰিষদৰ উদ্যোগত আৰু টেঙাগুৰি পঞ্চায়ত পৰিষদৰ সহযোগত যোগদান সভা এখন অনুষ্ঠিত হয়।
লাহৰীঘাট বিধান পৰিষদৰ সভাপতি গুলজাৰ হুছেইনৰ সভাপতিত্বত অনুষ্ঠিত যোগদান সভাখনত টেঙাগুৰি অঞ্চলৰ ডেৰ শতাধিক লোকে আনুষ্ঠানিকভাৱে আঞ্চলিক দলটোত যোগদান কৰে।
উল্লেখযোগ্য যে কংগ্ৰেছৰ দুৰ্গৰূপে খ্যাত লাহৰীঘাট সমষ্টিত এইবাৰ আঞ্চলিক দলটোৰ প্ৰতি যুৱ প্ৰজন্মৰ ভোটাৰসকল অধিক আকৰ্ষিত হোৱা পৰিলক্ষিত হৈছে।
এই যোগদান সভাখনতে সমষ্টিটোৰ ধৰ্মীয় সংখ্যালঘু পৰিষদৰ পূৰ্ণাংগ সমিতিখন গঠন কৰা হয়। সমিতিখনত আব্দুল মজিদক সভাপতি আৰু আনোৱাৰ হুছেইনক সম্পাদক হিচাপে লৈ ৩১ জনীয়া সদস্যৰে সমষ্টি সমিতিখন গঠন হয়।
সভাখনত আমন্ত্ৰিত অতিথিৰূপে কেন্দ্ৰীয় সাধাৰণ পৰিষদৰ সদস্য জীৱন বৰা, খালিছউদ্দিন আহমেদ আৰু মৰিগাঁও জিলা সমিতিৰ সম্পাদক উপেন খাটনিয়া উপস্থিত থাকি আগন্তুক ২০২১ৰ বিধান সভাৰ নিৰ্বাচনত সমষ্টিটোৰ সকলো ৰাইজকে একত্ৰিত হৈ আঞ্চলিক দলটোৰ সম্ভাব্য প্ৰাৰ্থী গৰাকীক ভোট প্ৰদান কৰি মিত্ৰ দল বিজেপিৰ সৈতে চৰকাৰ গঠন কৰিবলৈ আহ্বান জনায়।
আঞ্চলিক দলটো কেন্দ্ৰীয় সদস্য খালিছউদ্দিন আহমেদ আৰু জিলা সম্পাদক উপেন খাটনিয়াই কয় যে এতিয়া কংগ্ৰেছৰ দিন আৰু ঘূৰি নাহে।