নিবনুৱা সমস্যাৰে ভাৰাক্ৰান্ত অসমত চাকৰি কৰি আছে বাংলাদেশী মহিলাই।গুৱাহাটীতেই আকৰ্ষণীয় পদত চাকৰি পাইছে বাংলাদেশী মহিলাই।
অসমৰ নিবনুৱাৰ পেটত গোৰ মাৰি বাংলাদেশী মহিলাক চাকৰি দিছে টপচেম চিমেন্টে।
মেগা প্লাজাত থকা টপচেম চিমেন্টৰ কৰ্পোৰেট কাৰ্যালয়ত ছিনিয়ৰ মেনেজাৰ হিচাপে নিযুক্ত হৈ আছে মুনেৰা আজম নামৰ মহিলাগৰাকী।
গুৱাহাটীত থকা বাংলাদেশৰ সহকাৰী উচ্চায়ুক্ত শ্বাহ মহম্মদ তনভিৰ মনছুৰৰ পত্নী মুনেৰা।
এটা সূত্ৰৰ পৰা জানিব পৰা মতে বাংলাদেশী কূটনীতিকগৰাকীৰ পত্নীয়ে যোৱা মাৰ্চ মাহৰ পৰা গুৱাহাটীত চাকৰি কৰি আছে আছে।
যি সময়ত ক’ৰ’না অতিমাৰী আৰু লকডাউনৰ বাবে ভাৰতত সকলো খণ্ডৰ মাৰ্কেটিং আৰু ছেলছৰ কাৰ্যবাহীসকলে চাকৰি হেৰুৱাইছে বা দৰমহা কৰ্তন হৈছে, তেনে সময়তে বাংলাদেশী কূটনীতিকৰ পত্নীক চাকৰিৰ ‘স্পেচিয়েল অফাৰ’ দিছে টপমেপ চিমেন্টে। যি কথাই সকলোৰে চকু কপালত তুলিছে।
নৰ্থইষ্ট নাওক এই বিষয়ে সবিস্তাৰে বাতৰি প্ৰকাশ পোৱাৰ পাছতে বিভিন্ন মহলত প্ৰতিক্ৰিয়াৰ সৃষ্টি হৈছে।
থলুৱা উচ্চ শিক্ষিত যুৱক-যুৱতীক বঞ্চনা কৰা টপচেম চিমেন্টেৰ এই কাৰ্যক ধিক্কাৰ দিছে বিভিন্ন দল সংগঠনে।
মুনেৰা আজমৰ এই নিযুক্তি সন্দৰ্ভত ফোনযোগে মন্তব্য কৰিছে প্ৰদেশ কংগ্ৰেছৰ নেত্ৰী ববিতা শৰ্মাই।
তেওঁ কয় ‘টপচেম চিমেন্টৰ ইমান ডাঙৰ পদত মহিলাগৰাকীয়ে কেনেকৈ চাকৰি পাব পাৰে? তেওঁ বিদেশৰ পৰা অহা এগৰাকী মহিলা। তেওঁক ৱৰ্ক পাৰ্মিট লাগিব। হঠাৎ আহি তেওঁ কাম কৰিব নোৱাৰে। কেন্দ্ৰীয় গৃহ মন্ত্ৰ্যালয়ে এই কথা নিৰীক্ষণ কৰিব লাগে যে তেওঁক কাম কৰিবলৈ ভিছা দিছে নেকি?
ইপিনে, থলুৱা নিবনুৱা উচ্চ শিক্ষিত যুৱক-যুৱতীক ইয়াত নিযুক্তি দিব লাগে বুলি উল্লেখ কৰি তেওঁ লগতে কয়, ‘কি ভিত্তিত এগৰাকী বিদেশীক এই পদত নিযুক্তি দিলে? আমাৰ ইয়াত তেনেকুৱা কোৱালিফাইড লোক নাই নেকি? এগৰাকী উচ্চ পদত থকা ব্যক্তিৰ পত্নী হিচাপে তেওঁ ভাৰতত চাকৰি কৰাৰ কোনো অৰ্থ থাকিব নোৱাৰে। তেওঁ যদি কামটো কৰিব বিচাৰিছে তেন্তে বাংলাদেশত কৰিব লাগে।‘
আনহাতে, আঞ্চলিক গণ মৰ্চাৰ নেত্ৰী মীৰা বৰঠাকুৰেও থলুৱাক বঞ্চনা কৰা টপচেম চিমেন্টৰ এই কাৰ্যক ধিক্কাৰ দিছে।
তেওঁ কয়, ‘বিজেপি চৰকাৰে থলুৱা যুৱক-যুৱতীৰ ওপৰত পূৰ্বৰে পৰা মাধমাৰ শোধাই আহিছে। তাৰোপৰি ব্যক্তিগত কোম্পানীসমূহে থলুৱা লোকক বৃদ্ধাংগুষ্ঠ দেখুৱাই তেওঁলোকৰ কাম-কাজ কৰা আৰম্ভ কৰিছে।‘
‘এই চৰকাৰ যদি আৰু শাসনত থাকে তেন্তে দুদিনমানৰ পাছত খিলঞ্জীয়াৰ অস্তিত্ব নাথাকিব। বাংলাদেশীমূলৰ লোকসকল অসমত আহি তেওঁলোকে আমাক দাস হিচাপে কাম-কাজ কৰাব। ৱৰ্ক পাৰ্মিট বা চৰকাৰী নীতি-নিৰ্দেশনা থাকিলে বেলেগ কথা। কিন্তু যিহেতু টপচেম চিমেন্টে কৰিছে গতিকে তাত চৰকাৰী নীতি-নিৰ্দেশনাৰ কথা নাই তেওঁলোকে মই-মতালিৰে কৰিছে।‘ বৰঠাকুৰে লগতে কয়।
ইপিনে, টপচেম চিমেন্টৰ এই কাৰ্যৰ তীব্ৰ বিৰোধিতা কৰি মন্তব্য প্ৰকাশ কৰিছে ৰাইজৰ দলৰ মুখ্য আহ্বায়ক ৰুবুল দাসেও।
‘এইখন চৰকাৰৰ বাংলাদেশী প্ৰীতি আছে সেই কথা স্পষ্ট। সেয়েহে বাংলাদেশৰ কুটনীতিকৰ পত্নীয়ে ব্যক্তিগত প্ৰতিষ্ঠানত কাম কৰাৰ পাছতো তেওঁলোকে বাধা আৰোপ কৰিব পৰা নাই বা সেইগৰাকী মহিলাৰ বিৰুদ্ধে ব্যৱস্থা গ্ৰহণ কৰিব পৰা নাই।‘ দাসে আমাৰ সাংবাদিকৰ আগত কয়।
তেওঁ লগতে কয়, ‘অসমৰ নিৱনুৱাসকলৰ জীৱনক লৈ এইখন চৰকাৰে হেতালি খেলিছে। এইক্ষেত্ৰত কেন্দ্ৰীয় গৃহ মন্ত্ৰ্যালয় আৰু ৰাজ্যৰ গৃহ বিভাগৰ অধীনৰ চোৰাংচোৱা সংস্থাসমূহ ব্যৰ্থ হৈছে কিয়নো তেওঁলোকৰ চকুত ধুলি দি ব্যক্তিগত প্ৰতিষ্ঠানে বাংলাদেশী মহিলাক নিযুক্তি দিছে। কিয়নো ৱৰ্ক পাৰ্মিট অবিহনে কোনেও এনেদৰে বহিঃৰাষ্ট্ৰত চাকৰি কৰিব নোৱাৰে।‘
চৰকাৰক দাবী জনাই দাসে কয় যে এইগৰাকী মহিলাৰ বিৰুদ্ধে ব্যৱস্থা গ্ৰহণ কৰি অতি শীঘ্ৰে গ্ৰেপ্তাৰ কৰিব লাগে।
ইপিনে, টপচেম চিমেন্টৰ কাৰ্যৰ বিৰুদ্ধে সৰৱ হ’ল ছাত্ৰ মুক্তি সংগ্ৰাম সমিতিৰ ৰাজ্যিক সাধাৰণ সম্পাদক দেৱব্ৰত শইকীয়াও।
তেওঁ কয়, ‘টপচেম চিমেন্টে অসমৰ পৰাই ৰাজ সাহায্য লৈ অতি কম কৰৰ বিনিময়ত ব্যৱসায় চলাই আছে। তেওঁলোকে উচ্চ হাৰত চিমেন্ট অসমতে বিক্ৰী কৰি অসমৰ ৰাইজক ঠগি আছে। বাংলাদেশৰ কুটনীতিকৰ পত্নীয়ে অসমত চাকৰি কৰি আছে ইয়াতকৈ লাজৰ কথা একোৱেই থাকিব নোৱাৰে।‘
‘বাংলাদেশৰ শীৰ্ষ ৰাজনৈতিক বিষয়াক তেল মাৰিবলৈ বা তেওঁলোকৰ ব্যৱসায় বাংলাদেশত চলাই নিবলৈ তেওঁলোকে এনেদৰে নিযুক্তি দিছে। ই অসমক ঠগি লুটি-পুতি খোৱা কাৰবাৰটোৱেই বুজাইছে। বিজেপি চৰকাৰে একো ব্যৱস্থা গ্ৰহণ নকৰে কিয়নো টপচেম চিমেন্টে বিজেপিক কোটি কোটি টকাৰ ঘৰত চান্দা দিয়ে। গতিকে তেওঁলোকে চকু মুদা কুলিৰ ভাও ধৰিছে।‘ শইকীয়াই লগতে ক্ষোভ প্ৰকাশ কৰি কয়।
ইপিনে, আন এটা উল্লেখনীয় বিষয় যে এগৰাকী কূটনীতিকৰ পত্নী হোৱা হেতুকে মুনেৰা আজমক ভাৰতলৈ আহিবলৈ ‘ডিপ্লমেট ভিছা’ৰ দৰকাৰ হৈছে। আনহাতে এজন বিদেশীয়ে ভাৰতত চাকৰি কৰিবলৈ ‘এমপ্লইমেন্ট ভিছা’ৰ প্ৰয়োজন। প্ৰশ্ন হয়, অসমত চাকৰি কৰিবলৈ মুনেৰা আজমে ভিছা সলনি কৰি লৈছে নেকি?
টপচেম চিমেন্টে ভিছা সলনি কৰি হ’লেও মুনেৰা আজমে চাকৰি কৰাত গুৰুত্ব দিলে কিয়?
প্রাথমিক অনুসন্ধানত পোবা তথ্য মতে মুনেৰা আজমৰ মাৰ্কেটিং এণ্ড ছেলছৰ ছিনিয়ৰ মেনেজাৰ পদৰ বাবে কোনো ‘বিশেষ দক্ষতা নাই’।
তাৰ পাছতো গুৱাহাটীত থকা বাংলাদেশৰ সহকাৰী উচ্চায়ুক্তৰ পৰা ‘কিছু সুবিধা’ পোৱাৰ বাবেই ‘কৃতজ্ঞতাৰ চিন’ স্বৰূপে তেওঁৰ পত্নীক চাকৰি দিলে নেকি টপচেম চিমেন্টে?
