প্ৰাক্তন মন্ত্ৰী তথা কংগ্ৰেছৰ জ্যেষ্ঠ নেতা ৰকিবুল হুছেইনৰ সৈতে সংঘাতত লিপ্ত হৈ হাজো সমষ্টিত কংগ্ৰেছৰ গুৰি ধৰোতা দুলু আহমেদ নিলম্বিত হোৱাৰ পাছত তথা ৰাজ্যসভাৰ অসমৰ সাংসদ সঞ্জয় সিঙে কংগ্ৰেছ ত্যাগ কৰি বিজেপিত যোগদান কৰাৰ পাছতে শুকুৰবাৰে দলৰ সামগ্ৰীক পৰিস্থিতি সন্দৰ্ভত প্ৰতিক্ৰিয়া প্ৰকাশ কৰিছে বিৰোধী দলপতি দেবব্ৰত শইকীয়াই।
শইকীয়াই কংগ্ৰেছৰ ভিতৰচ’ৰা অনুশাসনহীনতাত ভুগিছে বুলি অকপটে স্বীকাৰ কৰিবলৈ বাধ্য হয়।
‘আমাৰ দলত দলীয় অনুশাসনৰ অভাৱ হৈছে। অনুশাসনহীনতাত দলটো জৰ্জৰিত হৈ আছে। এই কথা বহুবাৰ কৈ অহা হৈছে যে দলীয় অনুশাসন বৃদ্ধি কৰিব লাগিব’। শুকুৰবাৰে নতুন বিধায়ক আৱাসত সম্বোধন কৰা এখন সংবাদমেলত সাংবাদিকৰ প্ৰশ্নৰ উত্তৰ হিচাপে এনেদৰে অকপট স্বীকাৰোক্তি কাঢ়ে বিৰোধী দলপতিগৰাকীয়ে।
উক্ত সংবাদমেলৰ জৰিয়তে দলৰ হাইকামাণ্ডলৈ আহ্বান জনাই শইকীয়াই কয় ‘কংগ্ৰেছত যি অনুশাসনহীনতা হৈছে, ইয়াক কি উপায়েৰে নাইকিয়া কৰিব পৰা যায়, তাৰ বাবে দলীয় হাইকামাণ্ডে চেষ্টা কৰিব লাগে।‘
ইপিনে, নিলম্বিত হাজোৰ নেতা দুলু আহমেদক নিলম্বনৰ সিদ্ধান্ত প্ৰদেশ কংগ্ৰেছে ল’ব নোৱাৰে বুলিও মন্তব্য কৰে শইকীয়াই।
শইকীয়াই কয় ‘দুলু আহমেদক নিলম্বনত কিছু ভুল হৈছে বুলি ভাবিছো। তেওঁ যিহেতু এ আই চি চিৰ মেম্বাৰ গতিকে নিলম্বন কৰাৰ আগতে হাই কামাণ্ডক কথাটো জনাব লাগিছিল। এ আই চি চিৰ সদস্যৰ বিৰুদ্ধে প্ৰদেশ কংগ্ৰেছে অনুশাসনমূলক সিদ্ধান্ত ল’ব নোৱাৰে বুলি সংবিধানত উল্লেখ আছে’।
আনহাতে নিজৰ পূৰ্বৰ ভুলৰ পৰা নিশিকিলে কংগ্ৰেছৰ সকলোৰে বিপদ হ’ব বুলিও শইকীয়াই তাৎপৰ্য্যপূৰ্ণ মন্তব্য কৰে।
তদুপৰি, বুধবাৰে ৰাজ্য সভাৰ সাংসদ সঞ্জয় সিঙক অসমৰ পৰা ৰাজ্যসভালৈ প্ৰক্ষেপ কৰাটোৱেই ভুল আছিল বুলি আওপকীয়াকৈ স্বীকাৰ কৰে শইকীয়াই।
‘মনমোহন সিং বাহিৰৰ মানুহ হ’লেও অসমৰ মানুহৰ বহুতো সেৱা কৰিছিল। মোৰ দেউতাৰ দিনতে তেওঁ ৰাজ্যসভাৰ সাংসদ হিচাপে নিৰ্বাচিত হৈছিল। অসমলৈ আগবঢ়োৱা অৱদানৰ বাবে তেওঁক আমি ধন্যবাদ জ্ঞাপন কৰো।
সঞ্জয় সিঙক প্ৰাৰ্থীত্ব দিয়াৰ সময়ত যথেষ্ট বিতৰ্ক হৈছিল। কাগজে পত্ৰই কংগ্ৰেছক বহু সমালোচনা কৰা হৈছিল যদিও দলৰ নিয়ম মনা সৈনিক হিচাপে হাইকামাণ্ডৰ যিকোনো কথা মানি গৈছিলো বুলি শইকীয়াই কয়।
পদত্যাগী সিঙক উদ্দেশ্য কৰি শইকীয়াই কয় ‘ৰত্নাকৰো বাল্মিকী হৈছিল। আমিও ভাবিছিলো তেওঁৰ বেয়া গুণখিনি ভাল হ’ব। তেওঁৰ স্বভাৱৰ কোনো পৰিৱৰ্তন নহ’ল, তেওঁক আমি শুদ্ধ কৰিব নোৱাৰাটোৱেই আমাৰ ভুল।‘