মধ্যপ্ৰাচ্যৰ উত্তেজনা সন্দৰ্ভত সোমবাৰে সংসদৰ দুয়োটা সদনত এক বিবৃতি দিব বৈদেশিক পৰিক্ৰমা মন্ত্ৰী এছ জয়শংকৰে। যদিও বৈদেশিক মন্ত্ৰীয়ে সংসদ ভাষণ দিয়াৰ পূৰ্বে চৰকাৰৰ এই পদক্ষেপকলৈ একপ্ৰকাৰ অনাস্থা প্ৰকাশ কৰিছে বিৰোধী দল কংগ্ৰেছে।
কংগ্ৰেছে দাবী কৰে যে বৈদেশিক মন্ত্ৰীৰ বক্তব্য নহয়, আৰব বিশ্বৰ যুদ্ধ পৰিস্থিতিৰ ওপৰত সংসদত বিশদ আলোচনা হ’ব লাগে। কংগ্ৰেছৰ সাধাৰণ সম্পাদক জয়ৰাম ৰমেশে কয় যে বৈদেশিক মন্ত্ৰীৰ বক্তব্যত নতুন কথাৰ সম্ভাৱনা কম। ধৰি ল’ব পাৰি যে ইয়াৰ দ্বাৰা এতিয়ালৈকে যি ঘটিছে সেয়াহে প্ৰতিফলিত হ’ব। কিন্তু সাম্প্ৰতিক পৰিস্থিতকলৈ ভাৰতৰ বৈদেশিক নীতি সন্দৰ্ভত সম্পূৰ্ণ আলোচনা হোৱাটো বিচাৰিছে কংগ্ৰেছে।
প্ৰসংগক্ৰমে এসপ্তাহ পূৰ্বে কংগ্ৰেছ নেত্ৰী ছোনিয়া গান্ধীয়ে বাতৰি কাকতত এটা প্ৰবন্ধ লিখি আমেৰিকা আৰু ইজৰাইলৰ যৌথ আক্ৰমণৰ সন্দৰ্ভত নৰেন্দ্ৰ মোডী চৰকাৰৰ মৌনতাক তীব্ৰ সমালোচনা কৰিছিল। ইয়াৰ উত্তৰ দিয়ে বিজেপিয়ে। ছোনিয়াই অভিযোগ কৰে যে বৰ্তমানৰ পৰিস্থিতিত ইৰাণৰ সৈতে ভাৰতৰ দীৰ্ঘদিনীয়া সম্পৰ্কক নতুন দিল্লীয়ে আওকাণ কৰি আছে।
ইৰাণৰ সৰ্বোচ্চ ধৰ্মগুৰু আয়াতুল্লাহ আলী খামেনেইৰ মৃত্যুত ভাৰতৰ প্ৰতিক্ৰিয়াই কূটনৈতিক মহলত আলোড়নৰ সৃষ্টি কৰে। ইজৰাইল আৰু আমেৰিকা বাহিনীয়ে ইৰাণৰ সৰ্বোচ্চ ধৰ্মগুৰুক হত্যা কৰা ঘটনাক লৈ ভাৰত চৰকাৰৰ কোনো মন্ত্ৰীয়ে শোক প্ৰকাশ কৰা নাই। পাঁচ দিনৰ পাছত বৈদেশিক সচিব বিক্ৰম মিশ্ৰীয়ে দিল্লীত থকা ইৰাণৰ দূতাবাসত উপস্থিত হৈ সকলো নথিত স্বাক্ষৰ কৰে।
তদুপৰি ভাৰত চৰকাৰে মানৱীয় কাৰণত কেৰালাৰ কোচি বন্দৰত ইৰাণৰ এখন জাহাজ ৰখাবলৈ অনুমতি দিছিল।
কংগ্ৰেছৰ সাধাৰণ সম্পাদক জয়ৰাম ৰমেশে কয় যে ২০০৩ চনত অটল বিহাৰী বাজপেয়ীয়ে প্ৰধানমন্ত্ৰী হৈ থাকোঁতে সংসদত ইৰাকত আমেৰিকাৰ আক্ৰমণৰ সন্দৰ্ভত আলোচনাৰ আয়োজন কৰিছিল। ভাৰতীয় সংসদে আমেৰিকাৰ এই আক্ৰমণক গৰিহণা দি প্ৰস্তাৱ গৃহীত কৰিছিল। এই পৰ্যন্ত চৰকাৰৰ কোনেও মূল বিৰোধী দল কংগ্ৰেছৰ এই দাবীক লৈ কোনো মন্তব্য কৰা নাই।
কংগ্ৰেছৰ সূত্ৰ অনুসৰি, চলিত সংসদৰ অধিৱেশনত দলটোৱে আমেৰিকাৰ সৈতে শেহতীয়াকৈ ভাৰতৰ কৃষি চুক্তিৰ সন্দৰ্ভতো বিতং আলোচনা বিচাৰিব। তদুপৰি জম্মু-কাশ্মীৰক সম্পূৰ্ণ ৰাজ্যৰ মৰ্যাদা ঘূৰাই দিয়াৰ বাবে সংসদত শীঘ্ৰে সৰ্বদলীয় আলোচনাৰ দাবী জনাইছে দলটোৱে।
