সংবিধান সেৱক নামৰ এক সংস্থাৰ উদ্যোগত আৰু বৰপেটা জিলাৰ বৃহত্তৰ গোমাফুলবাৰী অঞ্চলৰ সচেতন-শিক্ষিত সমজুৱাৰ সহযোগত বৃহস্পতিবাৰে গোমাফুলবাৰী মাদ্ৰাছা ছেণ্টাৰ প্ৰাংগণত বিয়লি ৪ বজাত অনুষ্ঠিত হয় এক “সংবিধান সভা”।
উক্ত সভাত নাগৰিকত্বৰ সমস্যা, সংবিধান, বাল্য বিবাহ আৰু শিক্ষা সমস্যাকে আদি কৰি অন্যান্য আৰ্থ-সামাজিক আৰু ৰাজনৈতিক বিষয়ত সবিস্তাৰে আলোচনা কৰা হয়। আন্তঃৰাষ্ট্ৰীয় খ্যাতিসম্পন্ন লেখক, ৰাষ্ট্রীয় মানৱ অধিকাৰ আয়োগৰ প্ৰাক্তন সদস্য তথা অৱসৰপ্ৰাপ্ত ভাৰতীয় অসামৰিক সেৱা বিষয়া হৰ্ষ মান্দেৰ, বিশিষ্ট সমাজ বিজ্ঞানী তথা জামিয়া মিলিয়া ইছলামীয়াৰ অধ্যাপক মুনিৰুল হুছেইন, আমষ্টাৰডামৰ ভৃজে বিশ্ববিদ্যালয়ৰ গৱেষক ছাত্ৰ আব্দুল কালাম আজাদ আদিয়ে ভাষণ প্ৰদান কৰে এই সভাত।
বিশিষ্ট সাংবাদিক মাইনুল হক চৌধুৰীৰ সভাপতিত্বত অনুষ্ঠিত হোৱা সভাখনৰ আঁত ধৰে ৰকিবুল হাচান খানে আৰু সভাৰ বিষয়বস্তু বাখ্যা কৰে যুৱ লেখক তথা সমাজকৰ্মী আশ্ৰাফুল হুছেইনে।
ভাষণ প্ৰসংগত হৰ্ষ মান্দেৰে দেশত চলি থকা অসাম্য আৰু বিশেষ কিছু জনগোষ্ঠীৰ বিৰুদ্ধে হৈ থকা বৰ্ধিত আক্ৰমণ সম্পৰ্কে উষ্মা প্ৰকাশ কৰে। তেওঁৰ ভাষণত ডিটেনচন কেম্পৰ ভিতৰত বিদেশী হিচাপে বন্দী হৈ থকা লোকসকলৰ প্ৰতি সহানুভূতি আৰু অধিকাৰৰ প্ৰশ্ন উত্থাপন কৰা দেখা যায়।
উল্লেখযোগ্য যে হৰ্ষ মান্দেৰে এইবাৰৰ অসম ভ্ৰমণত বিদেশীৰ অপবাদত ডিটেনচন কেম্পত বন্দী হৈ থকাৰ লগতে বিদেশীৰ নামত অত্যাচাৰৰ বলি হৈ থকা কেইবাটাও পৰিয়ালত উপস্থিত হৈ তেওঁলোকৰ যন্ত্ৰণাৰ অংশীদাৰ হোৱাৰ লগতে একেলগে ন্যায়ৰ যুজঁ দিয়াৰ সাহস আৰু প্ৰতিশ্ৰুতি দিয়ে।
ইপিনে সভাত আব্দুল কালাম আজাদে বাল্য বিবাহ, শিক্ষা সমস্যা সম্পৰ্কে সংবিধান আৰু আইনৰ দিশসমূহ বাখ্যা কৰে।
এই সভাতে বৃহত্তৰ গোমাফুলবাৰী অঞ্চলৰ ৯জন যুৱকক “সংবিধান সেৱক” হিচাপে সন্মান জনোৱাৰ লগতে তেওঁলোকৰ হাতত তুলি দিয়া হয় একোখনকৈ ভাৰতীয় সংবিধান। সংবিধান সেৱকসকলে জনগণৰ সাংবিধানিক অধিকাৰ সম্পৰ্কে সমাজ আৰু দেশৰ হকে কাম কৰাৰ শপত বাক্যও পাঠ কৰে।
