অৱশেষত জামিন লাভ কৰি আজি মুকলি আকাশৰ তললৈ আহিল বিতৰ্কিত আৰক্ষী উপ পৰিদৰ্শক জোনমণি ৰাভা। গ্ৰেপ্তাৰ হোৱাৰ পৰা এমাহ চাৰি দিন কাৰাগাৰত কটোৱাৰ পাছত আজি জামিন লাভ কৰিলে জোনমণি ৰাভাই।
মাজুলী জিলা সত্ৰ ন্যায়াধীশ আদালতে আজি বিতৰ্কিত আৰক্ষী বিষয়াগৰাকীৰ জামিন আবেদন মঞ্জুৰ কৰে।
উল্লেখ্য যে, চলিত বৰ্ষৰ ৪ জুনৰ দিনা প্ৰবঞ্চনাৰ অভিযোগত গ্ৰেপ্তাৰ হৈছিল জোনমণি।
মাজুলী আৰক্ষী থানাত তিনিগৰাকী ব্যৱসায়ীয়ে তৰা তিনিটা গোচৰৰ ভিত্তিত মাজুলী আৰক্ষীয়ে গ্ৰেপ্তাৰ কৰিছিল জোনমণি ৰাভাক।
ব্যৱসায়ী ক্ৰমে ৰাম অৱতাৰ শৰ্মা, অজিত বৰাই যোৱা ১০মে’ত আৰু ৰঞ্জন কুটুমে যোৱা ১৩মে’ত গড়মূৰ থানাত ৰুজু কৰাক্ৰমে 20/22, 21/22 U/S 120(B)/170/406/419/420/468/471/472 IPC,22/22 US 120-B/170/406/419/420 IPC ধাৰাৰ গোচৰৰ ভিত্তিত গ্ৰেপ্তাৰ কৰিছিল মাজুলী আৰক্ষীয়ে।
উল্লেখযোগ্য যে প্ৰৱঞ্চক ভাৱী স্বামী ৰাণা পগাগে অ এন জিচিত কাম দিয়াৰ টোপ দি লাখে লাখে টকা আত্মস্যাৎ কৰাৰ কামত জড়িত হোৱাৰ অভিযোগত নাম সাঙুৰ খাইছিল ভাবী পত্নী তথা আৰক্ষী উপ-পৰিদৰ্শক জোনমনি ৰাভাৰ।
মাজুলীৰ তিনিগৰাকী ব্যৱসায়ীয়ে এজাহাৰত এছ আই জোনমনি ৰাভাক মূল অভিযুক্ত হিচাপে উল্লেখ কৰিছিল।
