পুৰীৰ বিজেপি প্ৰাৰ্থী সম্বিত পাত্ৰৰ ‘জিভা পিছলিল’! জগন্নাথ-মোডীৰ বিতৰ্কিত মন্তব্যকলৈ সৰৱ বিৰোধী

ওড়িশাৰ পুৰীৰ বিজেপি প্ৰাৰ্থী সম্বিত পাত্ৰই জগন্নাথদেৱক ​​লৈ অবাঞ্চিত মন্তব্য কৰি বিতৰ্কত লিপ্ত হৈছে। ইপিনে, বিৰোধীয়ে সেই মন্তব্যক লৈ সৰৱ হৈ পৰিছে। ওড়িশাৰ মুখ্যমন্ত্ৰী নবীন পাটনায়কে পাত্ৰক তীব্ৰ সমালোচনা কৰিছে।

সোমবাৰে প্ৰধানমন্ত্ৰী নৰেন্দ্ৰ মোডী প্ৰচাৰৰ বাবে পুৰীলৈ গৈছিল। জগন্নাথ মন্দিৰতো তেওঁ পূজা দিছিল। তাৰ পিছত সম্বিত পাত্ৰ সাংবাদিকসকলৰ মুখামুখি হ’ল। তেতিয়াই মোডীয়ে পুৰীত প্ৰচাৰ কৰিবলৈ অহা সন্দৰ্ভত তেওঁ কয়, জগন্নাথদেৱ হেনো প্ৰধানমন্ত্ৰী নৰেন্দ্ৰ মোডীৰ ভক্ত!

বিষয়টোক লৈ বিতৰ্কৰ সৃষ্টি হ’ব পাৰে বুলি আগজাননী পোৱাৰ লগে লগে ঘটনাস্থলীত উপস্থিত থকা বিজেপি নেতাৰ একাংশই কয় যে জিভা পিছলিয়ে সম্বিতে এনে কথা ​​কৈছে। আচলতে বিজেপি প্ৰাৰ্থীগৰাকীয়ে ক’ব বিচাৰিছিল যে মোডী জগন্নাথৰ ভক্ত।

লগতে পঢ়কঃ ধৰ্ষণৰ অভিযোগত গ্ৰেপ্তাৰ নগাঁও লোকসভা সমষ্টিৰ প্ৰাৰ্থী

সম্বিতে দৰাচলতে কি কৈছিল? তেওঁ কৈছিল, ‘প্ৰধানমন্ত্ৰী মোডীক চাবলৈ আজি লাখ লাখ লোক আহিছিল। জগন্নাথ নিজেই মোডীৰ ভক্ত। আৰু আমি সকলোৱেই মোডীৰ পৰিয়াল। মই মোৰ আৱেগক নিয়ন্ত্ৰণ কৰিব পৰা নাই। আৰু আজি সকলো ওড়িয়াবাসীৰ বাবে এক স্মৰণীয় দিন।”

এই ঘটনা পোহৰলৈ অহাৰ পিছতে নবীন পাটনায়কে তীব্ৰ আক্ৰমণ চলায়। এক্স হেণ্ডলত তেওঁ লিখিছে, “মহাপ্ৰভুক মানৱ ভক্ত বুলি কোৱাটো ঈশ্বৰৰ অপমান। ইয়াৰ ফলত সমগ্ৰ বিশ্বতে বিয়পি থকা কোটি কোটি উড়িয়া আৰু জগন্নাথ-ভক্তৰ আৱেগত আঘাত হানিছে।”

ইপিনে, এনে মন্তব্যৰ বাবে যেতিয়া বিতৰ্ক তীব্রতৰ হ’বলৈ ধৰিলে, তেতিয়া সম্বিত নিজেই স্পষ্টীকৰণৰ বাবে নামি পৰিল। তেওঁ নবীন পাটনায়কৰ এই পোষ্টটো ৰিটুইট কৰি তাত লিখিছে, ‘আজি মই প্ৰধানমন্ত্ৰী নৰেন্দ্ৰ মোডীৰ সফল ৰোড শ্ব’ৰ পিছত বহু সংবাদ মাধ্যমক অসংখ্য বাইট দিলোঁ। সকলোতে কৈছোঁ যে মোডী শ্ৰীজগন্নাথ মহাপ্ৰভুৰ ভক্ত। কিন্তু ভুলতে এবাৰ ওলোটা কথা কৈছিলো। অনুগ্ৰহ কৰি এইটোক ইছ্যু নকৰিব। আমাৰ বহুতেই জিভা পিছলি ভুল কথা কৈ পেলাও।

অৱশ্যে সেই টুইটৰ প্ৰতি এতিয়াও কোনো সঁহাৰি দিয়া নাই পাটনায়কে।  ৰাজনৈতিক বিশেষজ্ঞসকলে ওড়িশাৰ মুখ্যমন্ত্ৰীয়ে কি উত্তৰ দিয়ে তালৈ লক্ষ্য কৰি আছে।