জনসাধাৰণৰ সুৰক্ষাৰ বাবে দায়বদ্ধ আৰক্ষীয়েই জনতাৰ ত্ৰাসৰ কাৰণ হৈ পৰাৰ উদাহৰণ দেশত সহজেই উপলব্ধ। সৌ সিদিনা উত্তৰ প্ৰদেশত আৰক্ষী চকীৰ ভিতৰতে এগৰাকী মহিলা আৰক্ষীৰ দ্বাৰা বলাৎকাৰৰ বলি হোৱাৰ চাঞ্চল্য মাৰ নাযাওঁতেই এইবাৰ ৰাজস্থানত আৰক্ষী বিষয়াৰ অসৎ চৰিতাৰ্থৰ বলি হৈছে এগৰাকী যুৱতী।
ৰাজস্থানৰ ঝালাৱাৰ জিলাত এগৰাকী ২৫ বছৰীয়া জনজাতীয় মহিলাক বলাৎকাৰ কৰাৰ অভিযোগ উঠিছে এজন সহকাৰী উপ- পৰিদৰ্শকৰ বিৰুদ্ধে।
ইতিমধ্যে অভিযুক্ত আৰক্ষী বিষয়াজনক গ্ৰেপ্তাৰ কৰা হৈছে আৰু কৰ্তব্যৰ পৰা নিলম্বিত কৰা হৈছে বুলি ৰাজ্যখনৰ শীৰ্ষ আৰক্ষী বিষয়াই জানিবলৈ দিছে।
আৰক্ষীয়ে জানিবলৈ দিয়া মতে, ধৰ্ষণৰ অভিযোগ উত্থাপন কৰা মহিলাগৰাকীয়ে জানুৱাৰীত শহুৰেকৰ বিৰুদ্ধে ভলভা আৰক্ষী চকীত এটা গোচৰ ৰুজু কৰিছিল।
ভলতা আৰক্ষী চকীৰ সহকাৰী উপ-পৰিদৰ্শক জগদীশ প্ৰসাদ (৫৯) উক্ত গোচৰৰ তদন্তকাৰী বিষয়া আছিল।
তেওঁ মহিলাগৰাকীক তদন্তৰ অজুহাতত সঘনাই ফোন কল কৰি অসুবিধাত পেলাইছিল বুলি ভুক্তভোগী মহিলাগৰাকীয়ে অভিযোগ কৰিছিল।
সোমবাৰে নিশা মহিলাগৰাকীয়ে গাঁৱৰে এক বিবাহ অনুষ্ঠানত অংশ গ্ৰহণ কৰাৰ সময়ত আৰক্ষী বিষয়া প্ৰসাদে তেওঁক বাহিৰলৈ মাতি আনে আৰু বাইকত বহাই এখন বনাঞ্চললৈ নি ধৰ্ষণ কৰে বুলি মহিলাগৰাকীয়ে অভিযোগ কৰে।
পিছত মহিলাগৰাকীয়ে নিজ স্বামীক এই বিষয়ে অৱগত কৰে আৰু মঙলবাৰে সন্ধিয়া তেওঁলোকে প্ৰসাদৰ বিৰুদ্ধে একেখন আৰক্ষী থানাত অভিযোগ দাখিল কৰে।
তেওঁলোকৰ অভিযোগৰ ২৪ ঘণ্টাৰ ভিতৰতে প্ৰসাদক গ্ৰেপ্তাৰ কৰা হয় বুলি স্থানীয় চক্ৰ বিষয়া গিৰধৰ সিঙে জানিবলৈ দিয়ে।
আৰক্ষী বিষয়াজনৰ বিৰুদ্ধে ভাৰতীয় দণ্ডবিধিৰ ধাৰা ৩৭৬ (২) (ক) (আই) আৰু অনুসূচীত জাতি আৰু অনুসূচীত জনজাতি (অত্যাচাৰ প্ৰতিৰোধ) আইন, ১৯৮৯ ৰ অধীনত গোচৰ ৰুজু কৰা হৈছে বুলিও সিঙে লগতে উল্লেখ কৰে।
প্ৰাথমিক তদন্তৰ পিছত ঝালাৱাৰৰ আৰক্ষী অধীক্ষক মনিকা সেনে প্ৰসাদক ৰাজস্থান আৰক্ষী সেৱাৰ পৰা বৰ্খাস্ত কৰে আৰু অৱসৰৰ পিছত তেওঁৰ সকলো লাভালাভ জব্দ কৰাৰ নিৰ্দেশ দিয়ে।
