দেশত কৰ’নাভাইৰাছত আক্ৰান্তৰ সংখ্যা ৫৬২ গৰাকীলৈ বৃদ্ধি পাইছে।
উত্তৰ-পূবৰ মণিপুৰ আৰু মিজোৰামত এগৰাকীকৈ কৰ’নাভাইৰাছ আক্ৰান্ত চিনাক্ত হৈছে। অসমত এতিয়ালৈকে কোনো আক্ৰান্ত হোৱাৰ খবৰ অহা নাই।
দেশত ৪০ গৰাকী কৰ’নাভাইৰাছ আক্ৰান্তক চিকিৎসালয়ৰ পৰা যাবলৈ দিয়া হৈছে। ১০ গৰাকী লোকে এই ৰোগত প্ৰাণ হেৰুৱাইছে।
শেহতীয়াকৈ তামিলনাডুত এগৰাকী লোকে প্ৰাণ হেৰুওৱাৰ খবৰ আহিছে।
কৰ’নাভাইৰাছত আটাইতকৈ বেছিকৈ আক্ৰান্ত ৰাজ্যখন হৈছে কেৰালা। ৰাজ্যখনত ১০৯ গৰাকী কৰ’নাভাইৰাছ আক্ৰান্ত চিনাক্ত হৈছে।
মহাৰাষ্ট্ৰতো কৰ’নাভাইৰাছ আক্ৰান্তৰ সংখ্যাই ১০০ৰ সীমা অতিক্ৰম কৰিছে।
কৰ্নাটকত ৪৬ গৰাকী কৰ’নাভাইৰাছ আক্ৰান্ত চিনাক্ত হৈছে।
তেলেংগানা আৰু উত্তৰ প্ৰদেশত ৩৫ গৰাকীকৈ ৰোগী চিনাক্ত হৈছে। তেলেংগানাত আক্ৰান্তৰ ভিতৰত আছে ১০ গৰাকী বিদেশী নাগৰিক।
উত্তৰ প্ৰদেশতো এগৰাকী বিদেশী নাগৰিক আক্ৰান্ত হৈছে।
গুজৰাটত ৩৩ গৰাকী আৰু দিল্লীত ৩০ গৰাকী কৰ’নাভাইৰাছ আক্ৰান্ত চিনাক্ত হৈছে।
তামিলনাডুত ১৮ গৰাকী আৰু লাডাখত ১৩ গৰাকী ৰোগী চিনাক্ত হৈছে।
পশ্চিম বংগ, মধ্য প্ৰদেশ আৰু অন্ধ্ৰ প্ৰদেশত নগৰাকীকৈ ৰোগী চিনাক্ত হৈছে।
জম্মু-কাশ্মীৰত সাতগৰাকী আৰু হিমাচল প্ৰদেশ আৰু বিহাৰত তিনগৰাকীকৈ ৰোগী চিনাক্ত হৈছে।
ওড়িছাত দুগৰাকী আৰু পুডুচেৰি আৰু ছত্তিশগড়ত এগৰাকীকৈ ৰোগী চিনাক্ত হৈছে।
প্ৰধান মন্ত্ৰী নৰেন্দ্ৰ মোদীয়ে ইতিমধ্যে কৰ’নাভাইৰাছ প্ৰতিহত কৰাৰ বাবে সমগ্ৰ দেশত ২১ দিনৰ লকডাউন ঘোষণা কৰিছে।
প্ৰধান মন্ত্ৰীয়ে দেশৰ প্ৰত্যেকজন লোককে মহামাৰীবিধক গুৰুত্বসহকাৰে লৈ ঘৰতে থাকিবলৈ আহ্বান জনাইছে।
