বিভিন্ন সময়ত বিভিন্ন বিষয়ক লৈ মতাদৰ্শ ভিন্ন হ’লেও দেশৰ দুৰ্যোগৰ সময়ত সকলো এক, এই কথাই প্ৰমাণিত কৰি অসম আৰোগ্য নিধিলৈ সাহায্য অসম জাতীয়তাবাদী যুৱ ছাত্ৰ পৰিষদৰ।
মঙলবাৰে সন্ধিয়া স্বাস্থ্য মন্ত্ৰীক সাক্ষাৎ কৰে অসম জাতীয়তাবাদী যুৱ ছাত্ৰ পৰিষদৰ সভাপতি পুতুল দত্ত আৰু সাধাৰণ সম্পাদক পলাশ চাংমাইৰ নেতৃত্বত যোৱা এটা দলে।
স্বাস্থ্য মন্ত্ৰীক সাক্ষাৎ কৰি অসম আৰোগ্য নিধিলৈ ১ লাখ ৫১ হাজাৰ টকাৰ চেক প্ৰদান কৰে সংগঠনটোৱে।
ইয়াৰ পাছতে এই সম্পৰ্কে নিজৰ ফেচবুক প্ৰফাইলত লিখি চাংমায়ে কয়, “দেশৰ দুৰ্যোগৰ সময়ত চৰকাৰক সহায়ৰ হাত আগবঢ়োৱাটো দায়িত্বশীল নাগৰিকৰ কৰ্তব্য। অসম জাতীয়তাবাদী যুৱ ছাত্র পৰিষদৰ এনে মহানুভৱতা ইতিহাসৰ পৃষ্ঠাত লিপিবদ্ধ হৈ ৰব। দল মত পাৰ্থক্য বাদ দিয়ক। অসম জাতীয়তাবাদী যুৱ-ছাত্ৰ পৰিষদ ৰাজ্যবাসীৰ প্ৰতিটো সংকট আৰু দুৰ্যোগৰ প্ৰতি সদা সচেতন”।
অনাগত সময়তো অসম জাতীয়তাবাদী যুৱ-ছাত্ৰ পৰিষদে অসমৰ ৰাইজৰ ৰাজহুৱা স্বাৰ্থ জড়িত এনে বিষয়ত পাৰ্য্যমানে সহযোগিতা আগবঢ়াই যাব বুলি তেওঁ উল্লেখ কৰে।
অসমবাসী ৰাইজক উদ্দেশ্যি তেওঁ কয় ” ক’ভিদ- ১৯ এক মাৰাত্মক মহামাৰী, এই ৰোগৰ অদ্যপি কোনো ভেকচিন বা ঔষধ ওলোৱা নাই। সুৰক্ষিত থকাটোৱেই ইয়াৰ পৰা পৰিত্ৰাণৰ একমাত্ৰ উপায়। সেয়ে সামাজিক দূৰত্ব বজাই ৰখাৰ লগতে সকলোৱে স্বাস্থ্য বিভাগৰ নীতি-নিৰ্দেশনা মানি চলক।”
